شارشى الاڭنىڭ شىنارى

استانا. قازاقپارات - بۇگىن - ايگىلى بوكسشى سەرىك قوناقبايەۆ دۇنيە ەسىگىن اشقان كۇن!

جەتپىس توعىزعا دەيىن ماسكەۋدىڭ بوكس قاقپاسى قازاق جىگىتتەرى ءۇشىن تارس جابىق بولدى.

ءبىزدىڭ باتىرلاردى ەلارالىق تۋرنيرلەرگە، ك س ر و ۇلتتىق قۇراماسىنىڭ جيىندارىنا شاقىرىپ تۇردى. ءبىراق وليمپيادا ويىندارىنا، الەم جانە ەۋروپا چەمپيوناتتارىنا ماڭايلاتقان جوق. ءتىپتى جەڭىپ تۇرعان بوكسشىڭا ك س ر و چەمپيوناتىنىڭ التىن مەدالىن دە قيمايتىن.

وسى بۇعاۋدى، تۋراسىن ايتساق، يمپەريانىڭ تاسقامالىن ءبىرىنشى بوپ ون توعىز جاستاعى سەرىك قوناقبايەۆ بۇزدى.

ءالى ەسىمدە، جەتپىس توعىزدىڭ مامىر ايىندا گەرمانيانىڭ كەلن قالاسىنداعى ەۋروپا چەمپيوناتىندا كوركىنە كوز توياتىن سەرىك قوناقبايەۆ جارق ەتە قالدى. سەرىكپەن بىرگە سول تۇستاعى ازعانتاي عانا قازاق جۇرتى ءدۇر ەتە ءتۇستى.

اقمولانىڭ ءبىر قيىرىنداعى قاراشا اۋىلدا جاتىپ، سەرىكپەن جارىسا جۇدىرىق سىلتەدىك، سەرىكپەن بىرگە تۇعىر تورىنە ۇمتىلدىق. قوناقبايەۆ نەمىستىڭ اتاقتى بوكسشىسى، تاجىريبەلى كريۋگەردى ۇتقاندا قالاي شاتتاندىق دەسەڭىزشى. ال يتالياندىق پاتريتسيو وليۆانى جەڭگەندەگى سەزىمدى تىلمەن جەتكىزۋ قيىن.

سەرىك اعام قازاق ءۇشىن اقجولتاي بوكسشى بولدى. سول جىلى سول ەكپىنمەن الەم كۋبوگىندا جەكە-دارا شىقتى. كەلەسى جىلى قازاق بوكسشىلارىنىڭ تۇسىنە عانا كىرىپ جۇرگەن وليمپيادا تورىندە ات ويناتتى.

اللا تاعالانىڭ قۇدىرەتىن كورمەيسىز بە، قازاق بوكسشىلارىنان ءبىرىنشى ەۋروپا چەمپيونى، ءبىرىنشى الەم كۋبوگىنىڭ جەڭىمپازى، ءبىرىنشى ك س ر و چەمپيونى، ءبىرىنشى وليمپيادا جۇلدەگەرى، ءبىرىنشى الەم چەمپيوناتىنىڭ جۇلدەگەرى، كەڭەس وداعى بوكسشىلارىنان الەم كۋبوگىن ەكى مارتە ۇتقان ءبىرىنشى بوكسشى، دەگەن سپورتىمىزداعى تۇساۋكەسەر جەڭىستەر قوناقبايەۆتىڭ ماڭدايىنا جازىلعان ەكەن.

تاعى ءبىر عاجاپ دەرەك: 1979-جىلى ا ي ب ا- نىڭ رەيتينگىندە 20 جاستاعى سەرىك قوناقبايەۆ دۇنيە ءجۇزى بويىنشا 63.5 كەلى سالماقتىڭ كوشىن باستاپ شىعا كەلدى. بۇل دا بۇعان دەيىن بىردە-ءبىر قازاق بوكسشىسىنا باعىنباعان اسقارالى شىڭ بولاتىن.

قازىر سەرىك كەرىمبەك ۇلى ازيا بوكس فەدەراتسياسىنىڭ پرەزيدەنتى. ون توعىزىندا ۇلتىنىڭ مەرەيىن كوتەرىپ، ابىرويىن اسىرعان اردا ازامات بۇگىن 58 گە تولىپ وتىر.

سەرىك اعا، اللا تاعالا ءسىزدى وسى ابىرويىڭىزدان ايىرماسىن. قانداي يگىلىككە دە تۋعان حالقىڭىزبەن بىرگە جەتۋىڭىزگە شىن پەيىلدەن تىلەكتەسپىن! جاراتقان يە سىزگە ەكى دۇنيە باقىتىن ءناسىپ ەتسىن!

قىدىربەك رىسبەكتىڭ facebook پاراقشاسىنان