نىعماتۋلين ەلەۋسىز قۇقىق بۇزۋشىلىق ءۇشىن جازادان بوساتۋدى قولدادى

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا كەلتىرىلگەن كىشىگىرىم زالال ءۇشىن جاۋاپكەرشىلىكتەن بوساتۋ تۋرالى نورمانى قايتارۋ ماسەلەسى كوتەرىلدى، دەپ حابارلايدى قازاقپارات.

 دەپۋتات انار جايىلعانوۆانىڭ سوزىنە قاراعاندا، 2015 -جىلعا دەيىن اكىمشىلىك قۇقىق بۇزۋشىلىق تۋرالى كودەكسىندە كەلتىرىلگەن كىشىگىرىم زالال ءۇشىن ازامات جاۋاپكەرشىلىكتەن بوساتىلاتىنى تۋرالى نورما قامتىلعان. قولدانىستاعى كودەكستە جانە بۇگىن قاراستىرىپ وتىرعان وزگەرىستەردە بۇل نورما ەسكەرىلمەن.

«تاجىريبە كورسەتىپ وتىرعانداي، بۇل ينستيتۋتتى قايتارۋ كەرەكتىگىن بايقاتىپ وتىر. اتاپ ايتقاندا، كاسىپكەرلەر ءوز قىزمەتىندە ەشبىر ارام نيەتسىز ەلەۋسىز قۇقىق بۇزۋشىلىققا جول بەرىپ جاتادى جانە وسى ورايدا كەلتىرىلگەن زالالدا ەلەۋلى ەمەس. دەگەنمەن وسىنىڭ سالدارىنان تۋىندايتىن جاۋاپكەرشىلىكتىڭ سالماعى وتە اۋىر. سوندىقتان كودەكسكە كەلتىرىلگەن كىشىگىرىم زالال ءۇشىن جاۋاپكەرشىلىكتەن بوساتۋ تۋرالى نورمانى قايتارۋ ءجون دەپ سانايمىن»، - دەدى جايىلعانوۆا «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا.

 ءوز كەزەگىندە ادىلەت ءمينيسترى مارات بەكەتايەۆ زاڭ جوباسىن ازىرلەۋ بارىسىندا بۇل باستاما كوتەرىلگەنىن، كىشىگىرىم زالالدىڭ ولشەمىن ايقىنداۋعا تالپىنىس بولعانىن اتاپ ءوتتى. وكىنىشكە قاراي، بۇل ماسەلەدە مەملەكەتتىك ورگاندارمەن ءوزارا كەلىسىمگە قول جەكىزىلمەگەن.

«دەپۋتاتتاردىڭ بۇل تاقىرىپتاعى ۇسىنىسىن تولىقتاي قولدايمىن»، - دەدى مينيستر. وسى ماسەلەنى تالقىلاۋ بارىسىندا ءماجىلىس ءتوراعاسى نۇرلان نىعماتۋلين پاۆلودار قالاسىندا تۇراتىن جەكە كاسىپكەردىڭ حاتىن وقىپ بەردى.

«پارلامەنت ماجىلىسىنە پاۆلوداردىق جەكە كاسىپكەر تۇرسىنحانوۆتان كەلگەن حاتتى وقىپ بەرگىم كەلەدى. حاتتا: «پارلامەنت ماجىلىسىندە اكىمشىلىك كودەكستىڭ تالقىلانىپ جاتقانىن ەسكەرە وتىرىپ، پاۆلودار قالاسى مەملەكەتتىك كىرىستەر باسقارماسى اراسىندا تۋىنداعان ماسەلەنى جاريالاۋدى ءجون كوردىم. 2016 -جىلى مەن  318150 تەڭگە ايىپپۇل سالىنىپ، ليسەنزيانى توقتاتا تۇرۋ ءارى ونى قايتارۋ تۇرىندەگى اكىمشىلىك جاۋاپكەرشىلىككە تارتىلدىم. وسىنداي اۋىر جازا بولماشى قاتەلىككە بولا، ياعني ەسەپتەۋ قاتەلىگىنەن تۋىندادى. مەن ليسەنزيالىق الىم اياسىندا  212100 تەڭگەنىڭ ورنىنا  212000 تەڭگە تولەگەن ەكەنمىن، ياعني 100 تەڭگە كەم تولەدىم. پاۆلوداردىڭ مەملەكەتتىك كىرىستەر باسقارماسى ماعان ايىپپۇل جازىپ، ليسەنزيا قايتارىلدى»، - دەلىنگەن.

قاراڭىزدار نە بولىپ جاتقىنىن! ءسىز جاڭا (ادىلەت مينيسترىنە قاراتا ايتتى) ەكى- ءۇش مەم ورگان «كىشىگىرىم زالال» نە ەكەنىن تۇجىرىمداي الماي وتىرعانىن ايتتىڭىز. وسىنداي جاعدايلار ءجيى كەزدەسەدى. ءبىز بيزنەس ءۇشىن قولايلى جاعداي جاساپ جاتىرمىز دەپ مالىمدەپ ءجۇرمىز. جوعارىدا اتالعان نورمانى قايتارۋ كەرەك. جازا دەڭگەيى جاسالعان قۇقىق بۇزۋشىلىقپەن سايكەس بولۋى ءتيىس»، - دەپ ۇسىندى نۇرلان نىعماتۋلين.

 تالقىلاۋ بارىسىندا ازىرلەۋشىلەر جۇمىس توبىمەن بىرگە وسى ماسەلەنى مۇقيات قاراپ، ەگەر زيان كەلتىرىلمەسە، جاۋاپكەرشىلىكتەن بوساتۋعا مۇمكىندىك بەرەتىن زاڭ جوباسىن ەكىنشى وقىلىمدا قاراعانعا دەيىن پىسىقتاۋ قاجەتتىگى اتاپ ءوتىلدى.

 اۆتور: رۋسلان عابباسوۆ