ەلوردادا «قازاق قىزى» بايقاۋى ءوتتى
«بولاشاققا باعدار: رۋحاني جاڭعىرۋ» باعدارلاماسى اياسىندا استانا قالالىق ىشكى ساياسات باسقارماسى وتباسىلىق، مادەني، رۋحاني قۇندىلىقتاردى ناسيحاتتاۋعا جانە قىز بالالاردىڭ مادەني- ادەپتىلىك دەڭگەيىن ارتتىرۋعا، وتباسىندا قىز بالالاردى تاربيەلەۋ بويىنشا «قازاق قىزى» اتتى قالالىق قىز بالالار بايقاۋىن وتكىزدى.
«بايقاۋ استانا قالاسى كوللەدج ستۋدەنتتەرى اراسىندا وتكىزىلۋدە. بايقاۋدىڭ ەرەكشەلىگى دە سول، تەك كوللەدج ستۋدەنتتەرى عانا قاتىسا الادى جانە 16 مەن 22 جاس ارالىعىنداعى بويجەتكەن ارۋلار» ، دەپ اتاپ ءوتتى «قازاقستان جاستارى كونۆەنتىنىڭ» جق ديرەكتورىنىڭ ورىنباسارى مارات مۇحامەدجان ۇلى.
شارانىڭ ماقساتى - ەلباسىنىڭ «بولاشاققا باعدار: رۋحاني جاڭعىرۋ» باعدارلاماسىن ناسيحاتتاۋ. بويجەتكەن قىزداردىڭ بويىنا قازاق قىزدارىنا ءتان ىزەتتىلىك پەن يناباتتىلىقتى قالىپتاستىرۋ.
«ەلباسى ماقالاسىندا ءار ۇلتتىڭ ۇلتتىق قاسيەتى بولادى دەلىنگەن. انا ءبىر قولىمەن بەسىكتى، ءبىر قولىمەن الەمدى تەربەتەدى. ۇلتتى ۇلت ەتەتىن سول ۇلتتىڭ قىزدارى، سول سەبەپتى دە «رۋحاني جاڭعىرۋ» باعدارلاماسى اياسىندا قىزداردىڭ تاربيەسىنە باسا نازار اۋدارىپ، ۇلت بولاشاعىن ويلاۋدىڭ قامى رەتىندە وتكىزىلىپ وتىر. ەگەر ايەل انا تىلىندە سويلەسە، ۇلت انا تىلىندە سويلەيدى»، دەپ ايتتى قوعام قايراتكەرى ورازكۇل اسانعازى قىزى.
بايقاۋ ءتورت كەزەڭنەن تۇرادى. اتاپ ايتساق: «مەن قازاقتىڭ قىزىمىن» تانىستىرۋ، «ونەرلى ورگە جۇزەر» ونەر كورسەتۋ، «قىز ەركەم - كەستەسىمەن كوركەم» ويۋ- ورنەك ويۋ، «بىلگەنگە مارجان» ءبىلىم سايىسى. وسى شارانىڭ الدىڭدا استانا قالاسى اكىمدىگىنىڭ قولداۋىمەن كوللەدج ستۋدەنتتەرىنىڭ اراسىندا ورازكۇل اسانعازى قىزى «بويجەتكەن نازارىنا» اتتى لەكتسيالار وقىعان. وندا قازاق قىزىنا ءتان تاربيە، يناباتتىلىق، يبالىلىق، ىزەتتىلىك جايى ءسوز بولعان.
«شارا وسىمەن ەكىنشى جىل قاتارىنان وتكىزىلىپ وتىر. ماقساتى قىزداردىڭ تاربيەسىنە اسا ءمان بەرۋ. قازاق حالقى قىزدارعا يناباتتى، يبالى، دۇنيەگە ۇرپاق اكەلەتىن ارداقتى جان دەپ قارايدى. بىزدە سول بابالار تاربيەسىن جالعاستىرۋ ويىندا وتكىزۋدەمىز»، - دەدى ىشكى ساياسات باسقارماسى باسشىسىنىڭ ورىنباسارى قايرات قامباروۆ.
شاراعا استانا قالاسىنىڭ كوللەدج ستۋدەنتتەرى، اتا- انالار، كوللەدج ۇستازدارى قاتىستى.
