شىعىستىڭ ءىنجۋ- مارجاندارىن زەرتتەيتىن عىلىمي كەشەن اشىلدى
دەپ حابارلايدى قازاقپارات altaynews.kz سايتىنا سىلتەمە جاساپ.
«شىرايلى شىعىس - تالايدى تابيعاتىمەن تامساندىرعان عاجايىپتار مەكەنى. كەڭ بايتاق ەلىمىزدىڭ سولتۇستىك- شىعىس بولىگىندە ورنالاسقان كيەلى جەرىمىزدىڭ استى دا، ءۇستى دە بايلىققا تولى. ەل ەكونوميكاسىن نىعايتۋدا ءوڭىرىمىزدىڭ ۇلەسى زور»، - دەدى ءبىلىم ورداسىنىڭ پرورەكتورى يرينا روۆنياكوۆا.
«جاراتىلىس تانۋ عىلىمدارى جانە تەحنولوگيالار» فاكۋلتەتىنىڭ دەكانى نۇرلىحان تەمىربەكوۆ ايتىپ وتكەندەي، 65 جىلدىق تاريحى بار قارا شاڭىراقتىڭ مەرەيتويىنا وراي اشىلىپ وتىرعان بۇل كەشەننىڭ ستۋدەنتتەر مەن ماگيسترانتتاردىڭ عىلىممەن اينالىسۋىندا ماڭىزى زور. پروفەسسورلار اننا ەگورينا، كونستانتين پروكوپوۆ جانە پولشانىڭ ادام ميتسكيەۆيچ اتىنداعى ۋنيۆەرسيتەتىنىڭ پروفەسسورى، بوتانيك- عالىم پەتر شكۋليادج جاڭا كەشەننىڭ اشىلۋىمەن قۇتتىقتاپ، شىعىستىڭ ءىنجۋ- مارجاندارى جايىندا مول ماعلۇمات بەرەتىن كەشەندى ارالاپ كوردى.
كەشەندە ءوڭىرىمىزدىڭ باعالى جەر قويناۋى مەن مينەرالدار الەمى، ايماقتىڭ 19 ءتۇرلى ورمانى مەن تاۋ- تاسىن مەكەندەيتىن ايۋ، قاسقىر، تۇلكى سياقتى اڭدارى قويىلعان. ۇلار، اق تىرنا، كوكقۇتان، دالا قىرانى، بۇركىت، وگىز شاعالا سىندى قۇستار الەمى ءبىر بولەك. مۇراجاي سورەلەرىنەن سەگىزاياق، كالمار، اكۋلانىڭ جۇزبەقاناتى مەن جۇلدىزدى سكاتتى دا كەزدەستىرۋگە بولادى. قيىن- كەرىش، اشۋتاس، دەلبەگەتاي، اقباۋىر سىندى زايسان قازانشۇڭقىرى كەرەمەتتەرىنىڭ ءوزى ءبىر توبە. كەشەننىڭ اشىلۋ سالتاناتىنا جينالعان كوپشىلىك باتىس التاي، مارقاكول مەملەكەتتىك قورىقتارى مەن كاتونقاراعاي ۇلتتىق پاركى جايىنداعى قۇندى دەرەكتەرگە دە قانىق بولدى.
«كەندى التايدىڭ كەستەلى كەلبەتىنە كوز تويمايدى. اسپانمەن تالاسقان اسقارالى شىڭدارى، ەركەلەي اققان وزەن- كولدەرى، وسىمدىكتەر مەن جانۋارلار دۇنيەسى، جەراستى كەن ورىندارى تاڭداي قاقتىرماي قويمايدى. كەشەندى ازىرلەگەندە، ماقتانۋعا تۇرارلىق وسى مالىمەتتىڭ بارىمەن قامتۋعا تىرىستىق. عىلىمي- ءبىلىم بەرۋ كەشەنىنىڭ اشىلۋى بيولوگيا عىلىمدارىنىڭ دوكتورى، پروفەسسور انار مىرزاعالييەۆانىڭ باستاماسىمەن قولعا الىنعان ەدى. كەشەندى جابدىقتاۋدا كافەدرا مەڭگەرۋشىسى الماش كىتاپبايەۆا كوپ ەڭبەك ءسىڭىردى»، - دەدى مەيماندارعا ەكسپوناتتار جايىندا اڭگىمەلەپ بەرگەن بيولوگيا كافەدراسىنىڭ اعا وقىتۋشىسى باعدات كارمەنوۆا.
