قىزمەتكەرلەرىن جۇمىستا كوپ ۇستايتىن باسشىلارعا قاتاڭ شارالار قولدانىلادى
اتالعان توپ ءتۇرلى قىزمەتكەرلەردى جۇمىستا زاڭسىز ۇستاۋ فاكتىلەرىن انىقتاۋ ماقساتىندا ءتۇرلى مەملەكەتتىك ورگاندارعا جوسپاردان تىس تەكسەرۋ جۇرگىزىپ كەلەدى.
«ق ر ب ع م، ەڭبەك جانە حالىقتى الەۋمەتتىك قورعاۋ مينيسترلىگى سەكىلدى وزگە دە ۇيىمدارعا تۇراقتى تۇردە بارىپ تۇرامىز. كوپتەگەن ادامدار ءبىزدىڭ جۇمىسىمىزعا وڭ باعا بەرۋدە. ءبىز مەملەكەتتىڭ، ونىڭ ىشىندە مەملەكەتتىك قىزمەت ىستەرى اگەنتتىگىنىڭ حالىقتى شەنەۋنىكتەردىڭ وزبىرلىعىنان قورعاۋ بويىنشا جۇمىس ىستەپ جاتقانىن كورسەتكىمىز كەلەدى»، - دەيدى عالىم بايتۇق.
ونىڭ ايتۋىنشا، باسشىلىقتىڭ قانداي دا ءبىر سەبەپپەن ۇيگە قايتپاۋىنان قىزمەتكەرلەرگە دە ءوز جۇمىس ورىندارىندا قالۋعا تۋرا كەلەدى.
«ەشكىمگە دە جاسىرىن ەمەس، باسشى جۇمىستا وتىرسا، قول استىنداعى قىزمەتكەرلەرى دە ءوز جۇمىس ورىندارىنان كەتۋگە ىڭعايسىزدانادى. باسشى ءوز كابينەتىندە نارد ويناپ وتىرعان شىعار، كىم بىلەدى؟ سوندىقتان، شەنەۋنىكتى جۇمىستا ۇزاق وتىرۋىنان پايدالى اسەر كوەففيتسيەنتى كوبەيمەيدى»، - دەپ اتاپ ءوتتى قىزمەتكەرلەر قۇقىعىن قورعاۋشى.
مۇنداي جاعدايلاردى ع. بايتۇق مەملەكەتتىك ورگان جۇمىستارىنىڭ جۇيەسىزدىگى جانە مۇنداي ۇيىمدار مەن ءبولىم جەتەكشىلىگىنىڭ بىلىكسىزدىگى دەپ اتادى. قوعام قايراتكەرى مۇنداي ماسەلەلەر تۋىنداعان جاعدايدا قىزمەتكەرگە قوسىمشا تولەم جاساۋعا شاقىردى.
«ەگەر ورگان جۇيەلى جۇمىس ىستەسە، ەشكىم جۇمىس كۇنىنەن كەيىن كەڭسەدە قالمايدى. ماسەلەن، ق ر ادىلەت مينيسترلىگىندە ۋاقىت ءتارتىبى قاتاڭ ساقتالادى جانە ەشكىم جۇمىستان كەيىن قالمايدى. قوسىمشا جۇمىس ءۇشىن اقى تولەنۋى ءتيىس جانە كۇنىنە ەكى ساعاتتان ارتىق قالدىرۋعا بولمايدى. ارينە، مۇندا قىزمەتكەردىڭ كەلىسىمى اسا ماڭىزدى»، - دەيدى ع. بايتۇق.
سونىمەن بىرگە، ع. بايتۇق زاڭدى ورەسكەل بۇزعان مەكەمەلەردى اتاپ كورسەتتى.
«ءبىز استانا اكىمدىگىن، وڭىرلەردى جانە مينيسترلىكتەردى تەكسەرىپ شىقتىق. توبىمىزدىڭ حابارلاۋىنشا، ق ر ءبىلىم جانە عىلىم مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىكتەرى قىزمەتكەرلەرگە قاتىستى ءبىرقاتار قۇقىقبۇزۋشىلىقتارعا جول بەرگەن»، - دەدى ول.
سونداي-اق، بايتۇق كەلەسى جىلدان باستاپ، ءوز قىزمەتكەرلەرىنىڭ قۇقىعىن بۇزعان باسشىلارعا قاتىستى قاتاڭ شارالار قولدانىلاتىنىن حابارلادى.
«ءبىزدىڭ تەكسەرۋ جۇمىستارى جازالاۋ ءۇشىن ەمەس، ەڭبەك شارتتارىن جاقسارتۋ ءۇشىن جۇرگىزىلەدى. جىل سوڭىندا مەملەكەتتىك قىزمەت ىستەرى اگەنتتىگىندە ارنايى مونيتورينگ توبىنىڭ اۋقىمدى وتىرىسى وتەدى. توپ قۇرامىندا ءتۇرلى قوعام بەلسەندىلەرى بار. وتىرىس اياسىندا ءبىز تەكسەرگەن ۇيىمداردىڭ جاۋاپتى حاتشىلارىن شاقىرىپ، رەيد ەسەپتەرىن كورسەتەمىز»، - دەدى ع. بايتۇق.
«كەلەسى جىلدان باستاپ، تەكسەرىستەر قاتاڭداي تۇسەدى، - دەپ جالعاستىردى بايتۇق. - وندا ءبىز قىزمەتكەرلەردىڭ كەلگەن جانە كەتكەن ۋاقىتى تىركەلەتىن تۋرنيكەتتەر دەرەگىن تەكسەرەمىز، بەينەجازبالاردى قارايمىز. ودان بولەك، جۇمىستا كوبىرەك وتىرعان قىزمەتكەرلەرگە تولەنگەن اقى تۋرالى بۋحالتەرلىك ەسەپتى تەكسەرەمىز. تەكسەرۋ ناتيجەلەرى مەن بۋحالتەرلىك ەسەپ سايكەس كەلمەسە، قاتاڭ شارالار قولدانىلادى».
