قىزداردىڭ ءجۇرىسى
شوپىرلاردىڭ قاسىندا. وتكەن- كەتكەنگە قاراپ، وتكەن-كەتكەندى اڭگىمە قىلىپ دەگەندەي. تومەن جاقتان نالوگوۆىيدىڭ، انا تۇستان ق ب ت ۋ(قازاق-بريتان تەحنيكالىق ۋنيۆەرسيتەتى)، مىنا تۇستان تاعى ءبىر مەكەمەنىڭ قىزدارى كەلە جاتادى. «قاعاناتقا»(اسحانانىڭ اتى - رەد،) قاراي. تاماقتانۋعا. سونىڭ ءبارى ءبىزدىڭ الدىمىزدان وتەدى. ءبىز سول ۇرمادا تۇرامىز عوي. تۇرايىق دەپ تۇرمايمىز.
تۇرار جەرىمىز دە تۇرىسار جەرىمىز دە وسى. تۇرعاننان كەيىن ءجاي تۇرمايسىڭ، قاراي تۇراسىڭ. شوپىرلار تۇرعىسىنان ايتىپ تۇرمىن. ا تاك مەن ونشا كوپ قارامايمىن. قاراسام دا عىلىمي- زەرتتەۋلەر تۇرعىسىنان قارايمىن. ال انالار تاپ-تازا جىگىتتىك كوزبەن قارايدى. جاس قوي ەندى. ال ءبىز ەرتە قارتايعان جاندارمىز. ءجا، اقتالا بەرمەي سوزگە كوشەيىك.
ول شوپىر جىگىتتەر قىزداردىڭ بادەنىنە (تۇرىنە، فيگۋراسىنا) قارايدى. ال، مەن جۇرىستەرىن قىزىقتايمىن. ءار قىزدىڭ ءجۇرىسى ءارتۇرلى. جانە ءار قىزدىڭ ەكى ءتۇرلى ءجۇرىسى بار. اسحاناعا كەلە جاتقانداعى جۇرىستەرى بولەك تە شىققاننان كەيىنگى جۇرىستەرى مۇلدە بولەك. كەلە جاتقاندا اياقتارىن تىق-تىق باسىپ تەز-تەز كەلە جاتادى.
«وشىرەت كوبەيىپ كەتپەسە ەكەن» دەگەن اسىعىستىق بار جانە اش قارىننىڭ اسەرى بار. ال شىققانداعى جۇرىستەرى مۇلدە باسقا. باعاناعى جىلدامدىق ەكى ەسەگە ازايعان. اسىقپاي، اياقتى باپپەن باسىپ كەلە جاتادى. ەكى-ءۇش قىز شىقسا ءتىپتى كەرەمەت. ماڭعاز، مامىراجاي، سابىرلى. ويسىز بولسا دا ساليقالى قادامدار. قارىن تويعان، ۋايىم جوق.
بۇل ءبىر ساعاتتىڭ ىشىندەگى، اسحاناعا كىرۋ مەن شىعۋداعى ايىرما عانا. ال، ەندى مەزگىلدەگى ايىرمانى قاراڭىز. كۇن جىلى كەزدە قىزدار ءاربىر قادامىن سانمەن باسادى. ارقاسى تىرىسپاعان، دەنەسى قۇرىسپاعان. الپىس ەكى تامىرى ءيىپ، ءومىر ءسۇيىپ بارا جاتادى. ال، اياق-استى كۇن سالقىنداپ، جاڭبىردىڭ سوڭى قارعا اينالىپ، سۋىق ازىناپ كەتكەندە كورىڭىز. باياعى ءساندى جۇرىستەردىڭ ءبىرى دە جوق. ادامدى جۇرىسىنە قاراپ تانۋ كەرەك بولسا، ءوز ايەلىڭدى تانىماي قالاسىڭ. ايىرۋ قيىن. ءبارى ءبىر عانا پوحودكا تاۋىپ الادى. ارىعى دا، تولىعى دا، ۇزىنى دا، قىسقاسى دا. ارقا تىرىسقان، دەنە قۇرىسقان. ول كەزدە نەنىڭ ءساندى ءجۇرىس؟ تااك تۇسىندىرە المادىم- اۋ دەيمىن ءيا. وندا انمەن، كۇيمەن تۇسىندىرەيىن.
«قاعاناتقا بارا جاتقاندا قىزدار:
چيپ- چيپ- چيپ،
چيپ- چيپ- چيپ،
ماريا ماگدالەنا ارۋىم»- دەگەن ءان سياقتى جىلدام كەتىپ بارا جاتادى.
ال شىققانداعى جۇرىستەرى مىناعان كەلەدى:
ارماندى دارا قۋمايمىز،
قۇستىڭ قوس قاناتىندايمىز،
تاۋلاردى بەتكە الىپ ءنانانىم- ءنانانىم.
نەمەسە: ءبىز ەكەۋمىز بايشەشەكتەي ەرتە گۇلدەدىىىىىك.
***
ال جازداعى پوحودكالارىنا قاراساڭىز سەكەن تۇرىسبەكوۆتىڭ «كوڭىل تولقىنىن» ەلەستەتۋگە بولادى.
ال مىنا كۇن قاقا تۇرعانداعى جۇرىستەرى «سارى ارقا»، مەن «ادايدى» تارتىپ بارا جاتادى عوي. دىڭعى- دىڭعى- دىڭعى- دىڭعى- دىڭعى- دىڭعى دەپ بارا جاتادى.
وبشىم نە كەرەك جۇرىسىنە قاراپ قىزداردى تانۋعا بولادى.
***
«ماڭ- ماڭ باسىپ، ماڭ باسىپ،
چۋدولارىن چاڭ باسىپ» جۇرەتىن كەزگە جەتۋلەرىنە تىلەكتەسپىن.
قىزدارعا قاراۋعا بولادى. ءبىراق سۇلۋلىقتى تاماشالاۋشى، تابيعاتقا ءسۇيسىنۋشى ادام رەتىندە عانا. ناپسىڭە يە بولساڭ بولدى دەگەندى ءبىر جەردەن ەستىگەسىن ءجاي ادام رەتىندە قاراعاندا ويلاعان ويىمىز عوي. مەن كوپ قارامايمىن نەگىزى. شوپىرلار عوي كوپ قارايتىن.
جازۋشى بەيبىت سارىبايدىڭ الەۋمەتتىك پاراقشاسىنان الىندى
