بۇگىن بايقوڭىردا زىمىراندار ۇشپايتىن - قارالى كۇن
1960-جىلعى 24- قازاندا ۇشىرىلىم الدىنداعى جۇمىستار ءجۇرىپ جاتقان ر-16 بالليستيكالىق زىمىراندا جارىلىس بولدى. زىمىراندى ۇشۋعا دايىنداپ جاتقان اسكەريلەر، ماماندار - جالپى 76 ادام قايعىلى وقيعادان قازا تاپتى.
تاعى 49 ادامدى كۇيىك شالىپ، ونىڭ دا كوپشىلىگى اۋرۋحانادا جان تاپسىردى. 1963-جىلعى 24- قازاندا عارىش ايلاعىندا تاعى دا تراگەديا بولدى.
«ر-9ا» قۇرلىقارالىق بالليستيكالىق زىمىرانىن سىناقتان وتكىزۋ كەزىندە، جانارماي قۇيىلعان زىمىراننىڭ شاحتالىق-ىسكە قوسۋ قۇرىلعىسىندا ءورت شىعىپ، 8 ادام مەرت بولدى. سودان بەرى 24- قازان «بايقوڭىر» عارىش ايلاعىندا قارالى كۇن رەتىندە بەلگىلەنگەن.
بۇل كۇنى عارىش ايلاعىنىڭ ۇشىرىلىم كەشەندەرى مەن الاڭدارىندا بۇكىل جۇمىس توقتاتىلىپ، قالا تۇرعىندارى مەن قوناقتارى باۋىرلاستار زيراتىنا بارىپ، اپاتتان قازا تاپقانداردى ەسكە الادى.
بۇگىن 1960 جانە 1963-جىلدارى عارىشتىق-زىمىران تەحنيكالارىن سىناقتان وتكىزۋ كەزىندە اجال قۇشقان زىمىرانشىلارعا ورناتىلعان مەموريالدىڭ الدىندا جالپى قالالىق ميتينگ ءوتتى. وعان عارىش كەشەنىنىڭ باسشىلارى، «قازعارىش»، «روسكوسموس» ماماندارى، قالاداعى كاسىپورىنداردىڭ قىزمەتكەرلەرى، وقۋشىلار، ستۋدەنتتەر، سونداي-اق تۇرعىندار جينالدى.
