تاريحي «قازاق حاندىعى» سەريالىنىڭ ەكىنشى ماۋسىمى تۇسىرىلە باستادى
تاريحي سەريال ق ر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلۋدە.
«پرەزيدەنت نۇرسۇلتان نازاربايەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «جاڭا تۇرپاتتى جاڭعىرۋدىڭ ەڭ باستى شارتى - ۇلتتىق مادەنيەتىڭدى، ۇلتتىق كودىڭدى ساقتاي ءبىلۋ ەكەنىن اتاپ وتكەن بولاتىن. ەلباسىمىزدىڭ وسى جولداۋى فيلمنىڭ يدەياسىنا نەگىز بولدى. ەندى مىنە، ازداعان دەمالىستان كەيىن، جاساعان جۇمىسىڭا رەجيسسەر رەتىندە ەمەس، قاراپايىم كورەرمەن رەتىندە باعا بەرىپ، اتقارعان جۇمىستىڭ ءبارى دە بەكەر بولماعانىن ءتۇسىندىم. اۋقىمدى سەريالدىڭ ەكىنشى ماۋسىمىن قولعا الىپ وتىرمىز. ءتۇسىرۋ توبىنا ساتتىلىك تىلەيمىن»، - دەدى فيلمنىڭ رەجيسسەرى رۇستەم ءابدىراش.
ون بولىمنەن تۇراتىن جاڭا ماۋسىمنىڭ سەناري اۆتورلارى دا بۇرىنعى سەناريستەر بولماق. بۇل تۋىندىدا قازاق حاندارىنىڭ سىعاناق قالاسى ءۇشىن كورشى مەملەكەتتەرمەن كۇرەسى سۋرەتتەلەدى.
«تاريحي تۋىندىنىڭ ءبىرىنشى ماۋسىمى كەرەيدىڭ حان تاعىنا وتىرۋىمەن اياقتالسا، ەكىنشى ماۋسىمدا قازاق مەملەكەتتىلىگىنىڭ قالىپتاسۋى مەن دامۋى، جانىبەكتىڭ تاققا وتىرۋى سۋرەتتەلەدى»، - دەيدى رەجيسسەر.
«قازاق حاندىعى. التىن تاق» سەريالى جاز ايىنان باستاپ دايىندىق كەزەڭدە بولعان. وسى ۋاقىت ارالىعىندا رەجيسسەرلىك سەناري جازىلىپ، قوسالقى رولدەرگە كاستينگ وتكىزىلدى. رەجيسسەر حيكايانىڭ اكتەرلەر قۇرامى وزگەرمەگەنىن، الايدا، جاڭا ماۋسىمدا جاڭا كەيىپكەرلەردىڭ پايدا بولاتىنىن جەتكىزدى.
ەستەرىڭىزگە سالا كەتسەك، قازاق حاندىعىنىڭ 550 جىلدىعىنا ارنالعان تاريحي تەلەحيكاياسىنىڭ ءبىرىنشى ماۋسىمى ۇستىمىزدەگى جىلى ناۋرىز ايىندا تۇساۋى كەسىلگەن بولاتىن.
سونىمەن قاتار جىلدىڭ باسىندا سەريالدىڭ كينونۇسقاسى - تولىق مەتراجدى «الماس قىلىش» فيلمى جالپى ۇلتتىق پروكاتقا شىعىپ، كوشباسشى كينوتۋىندىلاردىڭ قاتارىنان كورىندى.
