جاس ءوسپىرىم بالتامەن ادامدارعا شابۋىلدادى
استانا. قازاقپارات - جەكسەنبى كۇنى شۆەيتساريانىڭ فلۋمس كوممۋناسىندا (سانكت-گاللەن كانتونى) بالتامەن قارۋلانعان 17 جاستاعى جاس ءوسپىرىم ءوتىپ بارا جاتقان ادامدارعا شابۋىل جاسادى.
بۇل تۋرالى Tages Anzeiger گازەتى پوليتسياعا سىلتەمە جاساپ حابارلادى.
باسىلىمنىڭ اقپاراتى بويىنشا، كەشقۇرىم جاس جىگىت جەرگىلىكتى پوشتا بولىمشەسىنىڭ ماڭىندا ادامدارعا بالتامەن جۇگىرىپ، بىرنەشەۋىن جاراقاتتاعان. كەيىن بوتەننىڭ كولىگىن ايداپ اكەتىپ، وقيعا ورنىنان ءىزىن سۋىتقان.
بۇدان ءارى، جانارماي قۇيۋ ستانساسىنا جەتىپ، تاعى بىرنەشە ادامدى جاراقاتتادى. ول سول جەردە پوليتسيانىڭ قولىنا ءتۇستى.
قاسكۇنەمنىڭ ارەكەتىنىڭ سەبەبى ازىرگە بەيمالىم، الايدا قۇقىق قورعاۋ ورگاندارى بۇل وقيعانىڭ تەرروريزمگە قاتىسى بارىن تەرىسكە شىعاردى. زارداپ شەگۋشىلەردىڭ ناقتى سانى مەن ولاردىڭ جاعدايى ناقتىلانۋ ۇستىندە.
