اقتاۋلىق تۇرعىن اكۆاريۋمدەگى بەكىرەنى ۇرلايمىن دەپ ۇياتقا قالدى - ۆيدەو

استانا. قازاقپارات - اقتاۋداعى تەڭىز جاعاسىندا ورنالاسقان مەيرامحانالاردىڭ بىرىندە قىزىق جاعداي بولدى.

كەلۋشىلەردىڭ ءبىرىنىڭ وسى مەكەمەدە تۇرعان اكۆاريۋمدەگى بەكىرەنى ۇرلايمىن دەگەن ويى ىسكە اسپاي قالدى، - دەپ حابارلايدى ك ت ك ارناسى.

جاس جىگىتتىڭ جەڭسىك اسقا اڭسارى ابدەن اۋسا كەرەك، بەكىرەنى اۋلاۋدىڭ جەڭىل جولىن تاڭداپتى. ءسويتىپ، قۇندى بالىقتى وسىرۋمەن اينالىسىپ، كليەنتتەرگە كوزىنشە ءپىسىرىپ بەرەتىن مەيرامحانالاردىڭ بىرىنە كەلگەن. اينالادا ەشكىمنىڭ جوقتىعىن پايدالانعان ول سۋداعى بالىقتى ۇستاپ الىپ، سىرتقا بەتتەپتى.

ءبىراق، كيىمىنىڭ ىشىنە جاسىرعان بەكىرە سۋسىپ جەرگە تۇسكەن. ۇرى سونى قايتادان الامىن دەپ اۋرەگە ءتۇسىپ جاتقاندا، ونى كۇزەتشىلەر ۇستاپ الدى. بالىقتى باپپەن جەمەك بولعان ازاماتقا قاتىستى «ۇرلىق» بابى بويىنشا قىلمىستىق ءىس قوزعالدى. ەندى ول ءۇش جىلعا دەيىن سوتتالۋى مۇمكىن.