اقتوبەدە گاز بەكەتىن جارىپ جىبەرمەك بولعان كاسىپكەردىڭ كىم ەكەنى بەلگىلى بولدى
ول جانارماي بەكەتىندەگى گاز سيستەرناسىن سوعىپ، جارىلىس جاساۋدى كوزدەگەن دەپ حابارلايدى وڭىردەگى NUR. KZ ءتىلشىسى.
كاسىپكەردىڭ «تويوتا-حايليۋكس» كالىگى سيستەرنانى توڭكەرىپ تاستاعانىمەن، جارا الماپتى. ءوزىن ولتىرۋگە بەكىنگەن كاسىپكەر سول جەردە قالتاسىنان پىشاق شىعارىپ، قارنىن جارعانى ايتىلادى.
وقيعا 13- قازان كۇنى تاڭعى 5:20 ۋاقىتىندا تىركەلگەن. KNPS جانارماي بەكەتىندە تۇرعان گاز سيستەرناسى كاسىپكەر كولىگىمەن جاسالعان قاتتى سوققىدان اۋدارىلىپ قالعان. قالتاسىنداعى پىشاقپەن ءىشىن ءتىلىپ، قانسىراپ قالعان كاسىپكەر جەدەل جاردەم اۋرۋحاناسىنا جەتكىزىلەدى.
«ول ادامنىڭ ءوز رۇقساتىنسىز ونىڭ قانداي جاعدايدا تۇسكەنى تۋرالى اقپارات بەرە المايمىز. ناۋقاس تۋرالى اقپارات بەرۋ زاڭعا قايشى. ونىڭ ۇستىنە ول كىسى بۇگىن اۋرۋحانادان شىعارىلدى»، - دەيدى اقتوبە وبلىستىق جەدەل جاردەم اۋرۋحاناسى باس دارىگەرىنىڭ ورىنباسارى ازامات تۇرىشەۆ.
كوپشىلىكتىڭ ۇرەيىن ۇشىرعان وقيعاعا قاتىستى گاز قۇيۋ بەكەتىنىڭ باسشىلارى پوليتسياعا ارىز تۇسىرمەگەنىن ايتتى. ءبىراق، تىركەلگەن دەرەك بويىنشا قىلمىستىق كودەكستىڭ ەكى بىردەي بابىمەن ءىس قوزعالعان.
«كولىگىمەن گاز سيستەرناسىنا بارىپ سوققان دەرەككە قاتىستى تەرگەۋ جۇمىستارى ءجۇرىپ جاتىر. قىلمىستىق كودەكستىڭ «ءوزىن-ءوزى ولتىرۋگە دەيىن جەتكىزۋ»، «بوتەننىڭ مۇلكىن قاساقانا جويۋ نەمەسە ءبۇلدىرۋ» باپتارى بويىنشا سوت الدى تەرگەۋ جۇمىستارى باستالدى. ول جىگىت - جەكە كاسىپكەر»، - دەيدى اقتوبە وبلىسى پروكۋرورىنىڭ اپپارات جەتەكشىسى جاسۇلان داۋلەنبايەۆ.
