ماڭعىستاۋدا ەسەنعالي راۋشانوۆتىڭ شىعارماشىلىق كەشى ءوتتى - فوتو
«كەلىنتوبە»، «شولپان جۇلدىز تۋعانشا»، «عايشا ءبيبى»، «قارا باۋىر قاسقالداق» اتتى بىرنەشە كىتاپتىڭ اۆتورى ءارى كوپتەگەن قۇندى شىعارمالارىمەن ەسىمى ەلگە تانىس.
اقىننىڭ الپىس جىلدىق مەرەكەسى ماڭعىستاۋ جەرىندە كەڭىنەن اتالىپ وتۋدە، دەپ حابارلايدى اكىمنىڭ باسپا ءسوز قىزمەتى.
ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا ءارتۇرلى شارالار ۇيىمداستىرىلدى.
اتاپ ايتساق، نۇرمۇحان جانتورين اتىنداعى وبلىستىق مۋزىكالىق-دراما تەاترىندا «ءبىزدىڭ ەلدىڭ جىلقىسى كىل كوكمويناق» اتتى شىعارماشىلىق كەشى ءوتتى.
شاراعا اقىننىڭ ۇزەڭگىلەس دوستارى، شاكىرتتەرى، ستۋدەنتتەر جانە مىڭداعان جىر سۇيەر قاۋىم قاتىستى. اقىنعا جۇرەك جاردى، اق تىلەگىن ايتۋ ءۇشىن تولەن ابدىك ۇلى، قاجىعالي مۇحامبەتقالي ۇلى، ساراي انەس تولەندى ۇلى، ءامين تۇياقوۆ، ءابىش كەكىلبايەۆتىڭ جۇبايى كلارا جۇمابايەۆا، ساۋىتبەك ابدراحمانوۆ سىندى قوعام قايراتكەرلەرى كەلدى.
مەرەكەلىك كەشتە ماڭعىستاۋ وبلىسىنىڭ اكىمى ەرالى توعجانوۆ ءوزىنىڭ قۇتتىقتاۋ لەبىزىن ءبىلدىرىپ، ريزاشىلىعىن جەتكىزدى. سونداي-اق ول: «بۇگىنگى كەشتىڭ ورنى ايرىقشا قازاق ادەبيەتى ءۇشىن ايتۋلى كۇن. پاتريوتتىق جىرلارىڭىزبەن ەگەمەندىك العانعا دەيىنگى جىلدارداعى تىنىسىن تارىلتىپ، ۇلتتىق نامىسىنا باتقان قازاق حالقىنىڭ رۋحىن اسقاقتاتىپ، ۇلتتىڭ بىرلىگىن كۇشەيتۋ جولىندا قوسقان ەرەن ەڭبەگىڭىزدىڭ ۇلەسى مول. ولاي بولسا، ەلىمىزدىڭ جەتكەن جەتىستىكتەرى مەن العان اسۋلارى، تولاعاي تابىستارى ءسىز سەكىلدى حالقى ءۇشىن تۋعان اسىل ۇلدارىنىڭ ارقاسى. رۋحتى جىرلارىڭىز عۇمىرلى بولۋىن تىلەيمىن»، - دەدى، وبلىس اكىمى.
شىعارماشىلىق كەشتە كورەرمەن نازارىنا «ايشا ءبيبى» تەاترلاندىرىلعان قويىلىمى ۇسىنىلدى. كەش سوڭىندا اۆتور كورەرمەنگە ءوز العىسىن ءبىلدىردى. سونداي-اق ول، «ەلباسىنىڭ «بولاشاققا باعدار: رۋحاني جاڭعىرۋ» ماقالاسى ەل كۇتكەن ەڭ ۇلكەن جاڭالىق بولدى.
بۇل تۇستا اقىن-جازۋشىلارىمىزدىڭ باستى مىندەتى مەملەكەت باسىشىسى اتاپ وتكەن ءتول تاريحىمىزدى تۇگەندەپ، بابالار سالتىن ساقتاپ قالۋ. باسەكەگە قابىلەتتى، سانالى ۇرپاق تاربيەلەۋ»، - دەدى. سونىمەن قاتار، ەسەنعالي ءابدىجاپپار ۇلى قوعام قايراتكەرى رەتىندە جەرگىلىكتى جاستارمەن جۇزدەسىپ، اعالىق اقىل-كەڭىسىمەن ءبولىستى.
كەزدەسۋ بارىسىندا مەملەكەت باسشىسى ءوز ماقالاسىندا اتاپ وتكەن «رۋحى بيىك، ءبىلىمدى ۇرپاق بولۋ ءۇشىن ءاربىر ازامات زامانا كوشىنەن قالماي، عىلىم مەن تەحنولوگيانىڭ ءتىلىن مەڭگەرۋ كەرەك» ەكەنىن ەرەكشە اتاپ ءوتتى.
