كاسىپكەرلەر جامبىل جابايەۆقا ەسكەرتكىش ورناتتى - فوتو

تالدىقورعان. قازاقپارات - الماتى وبلىسىنىڭ ەڭبەكشى قازاق اۋدانى ەسىك قالاسىنداعى جاستار ساياباعىندا جىر الىبى جامبىلدىڭ ەسكەرتكىشى اشىلدى.

بيۋست «تۋعان جەر» باعدارلاماسى شەڭبەرىندە مەتسەنات قارجىسىنا جاسالدى، دەپ حابارلايدى قازاقپارات ءتىلشىسى.

ايتۋلى قۋانىشپەن كوپشىلىكتى وبلىس اكىمىنىڭ ورىنباسارى جاقسىلىق ومار قۇتتىقتادى. شارا ءانشى قايرات بەكتۇرسىننىڭ ورىنداۋىنداعى جامبىلدىڭ «اقىندارعا ارناۋ» اتتى تەرمەسىمەن اشىلدى.

«ەلباسى نۇرسۇلتان ءابىش ۇلى نازاربايەۆ «بولاشاققا باعدار: رۋحاني جاڭعىرۋ» باعدارلاماسىندا: «ۇلتتىق مادەنيەت ساقتالماسا، ەشقانداي جاڭعىرۋ بولمايدى»، - دەگەن ەدى.

وسى باعدارلاما اياسىندا قولعا الىنعان يگى ىستەردىڭ ءبىرى بۇگىنگى شارا دەپ بىلىڭىزدەر. ەسكەرتكىش - ەلدىڭ، حالىقتىڭ مادەني مۇراسىنىڭ جالپىلاما اتاۋى. ەندەشە، ەسكەرتكىش قويىلعان سول تۇلعانىڭ ءوزى حالىقتىڭ مۇراسىنا اينالدى دەگەن ءسوز. وسىنداي يگى شارانى قولعا الىپ، بەلسەندىلىك تانىتقان، جەكە قاراجاتىن بولگەن جەرگىلىكتى ازاماتتارعا كوپشىلىكتىڭ اتىنان شىنايى ريزاشىلىعىمىزدى بىلدىرەمىز. ۇلى تۇلعاعا ەسكەرتكىش ورناتۋ ەرەكشە ازاماتتىق ءىس دەپ بىلەمىن»، - دەدى ج. ومار ءوز قۇتتىقتاۋىندا.

مۇنان سوڭ قازاقستان جازۋشىلار وداعىنىڭ ءتوراعاسى نۇرلان ورازالين ءسوز سويلەپ، جاس اقىن جامبىل دۇيسەنوۆ جىراۋعا ارناعان ءوز ولەڭىن وقىدى.

ەسكەرتكىش الدىنا گۇل شوقتارى قويىلدى. بيۋستتى جاساۋعا مەتسەناتتاردىڭ 4,6 ميلليون تەڭگە قارجىسى جۇمسالدى.

ەسكەرتكىش اۆتورى - نۇرعالىم يسابايەۆ. بيۋست قولادان قۇيىلعان، پوستامەنتى - ءمارماردان، بيىكتىگى - 5 مەتر. اۋلاسى اباتتاندىرىلعان، تيان-شان شىرشالارى وتىرعىزىلىپ، گۇلزار جاسالعان.

اۆتور: سامال قابىشيەۆا