قازاقستاندا مۇنايدىڭ وندىرىلگەن ءار باررەلى تىركەلىپ وتىرماق

اقتوبە. قازاقپارات - ەلىمىزدەگى مۇناي ءوندىرۋشى كومپانيالار ءوندىرىس ورىندارىن اۆتوماتتاندىراتىن بولادى.

وسىلايشا، وندىرىلگەن مۇنايدىڭ ءار باررەلى ەنەرگەتيكا مينيسترلىگىندە اۆتوماتتى تۇردە تىركەلىپ وتىرادى، دەپ حابارلايدى قازاقپارات ءتىلشىسى.

اقتوبەدە مۇناي مەن گازدىڭ كولەڭكەلى اينالىمىن جويۋ ماسەلەلەرى تالقىلاندى. ق ر باس پروكۋرورىنىڭ ورىنباسارى اندرەي لۋكيننىڭ ايتۋىنشا، سوڭعى ءۇش جىلدا 1 ميلليون توننا مۇناي كولەڭكەلى اينالىمعا تۇسكەن. ەندى ەنەرگەتيكا مينيسترلىگى مۇناي ءوندىرۋ جۇيەسىن اۆتوماتتاندىرىپ، ءار باررەلىن ەسەپكە الادى.

«2020-جىلدىڭ قاڭتار ايىنان باستاپ مۇناي وندىرەتىن كومپانيالار ءوندىرىس ايماعىن جارىقتاندىرادى. ەسەپتەۋ قۇرالىن قوندىرىپ، ءدال سول اقپارات تىكەلەي ەنەرگەتيكا مينيسترلىگىنە ءتۇسىپ وتىراتىن بولادى. جوبا قۇنى - 2,7 ميلليارد تەڭگە. قارجى مينيسترلىگى ارقىلى رەسپۋبليكالىق بيۋدجەتتەن اقشا بولىنەدى. جۇمىس «سيفرلىق قازاقستان-2020» جوباسى اياسىندا ىسكە اسىرىلادى. نەگىزىنەن شاعىن مۇناي وڭدەۋ زاۋىتتارىندا ۇرلىق كوپ تىركەلەدى. ەنەرگەتيكا مينيسترلىگى مەن ۇلتتىق ەكونوميكا مينيسترلىگى ەكسپورتتىڭ كەدەندىك باج سالىعىن ارتتىرۋعا شارا قولدانىلىپ جاتىر. ماسەلەن، شاعىن وڭدەۋ زاۋىتتارى ارقىلى مۇناي وڭدەلىپ، وزگە ءونىمدى ەكسپورتتاۋ كەزىندە باج سالىعىنان قۇرىلىپ كەتەدى»، - دەدى ەنەرگەتيكا ۆيتسە-ءمينيسترى ماعزۇم مىرزاعاليەۆ.

مۇناي كومپانيالارى تەحنولوگيالىق شىعىندى جەلەۋ ەتىپ ناقتى مۇناي ءوندىرىسىن، تابىستى جاسىرادى. نورماتيۆتىك ەرەجەنى دە مەملەكەتتىك ورگاندار باقىلاعان ەمەس. سالدارىنان كولەڭكەلى اينالىم كولەمى ارتادى.

«2017-جىلى تەحنولوگيالىق شىعىن كولەمى 168 مىڭ توننانى قۇرادى. بۇل دەگەنىمىز - 3400 تسيستەرنا. نورماتيۆتىك-قۇقىقتىق اكت دايىنداپ، ورتاق ەرەجە ەنگىزىلۋى كەرەك»، - دەدى ينۆەستيتسيا جانە دامۋ ۆيتسە-ءمينيسترى تيمۋر توقتابايەۆ.

مۇناي ۇرلىعىمەن كۇرەس جۇمىسى كەزىندە ىشكى ىستەر ورگاندارى دا كەدەرگىلەر مەن قيىندىقتارعا تاپ بولۋدا. وڭىرلەردە سوت ساراپتاماسىن جاساۋ قيىنعا سوعىپ وتىر. ساراپتاما مۇناي كومپانيالارىنىڭ زەرتحاناسىندا جاسالادى، ال ونىڭ قۇنى ورتا ەسەپپەن 25 مىڭ تەڭگە.

بيۋدجەتتە بۇل ساراپتاماعا قارجى قاراستىرىلماعان. «ىشكى ىستەر ورگاندارىندا زاتتاي ايعاقتى ساقتايتىن جەر جوق. ال مۇناي مەن كولىكتەردى جەكە تەرمينالداردا ساقتاۋ مەحانيزمى قاراستىرىلماعان. سوندىقتان مۇناي تولى كولىكتەردى، تسيستەرنالاردى ورنالاستىرۋ قيىنعا سوعىپ تۇر»، - دەدى ىشكى ىستەر مينيسترلىگىنىڭ تەرگەۋ دەپارتامەنتىنىڭ باستىعى مۇحاران ءامىروۆ.