قازاقستاندا كەلەسى جىلى تۇڭعىش رەت بۇقتىرىلعان تۇيە ەتى وندىرىلەدى

استانا. قازاقپارات - الماتى وبلىسىنداعى «كۇن نۇرى» ج ش س كەلەسى جىلدان باستاپ بۇقتىرىلعان تۇيە ەتىنىڭ كونسەرۆىلەرىن نارىققا شىعارۋدى كوزدەپ وتىر، دەپ حابارلايدى «قازاقپارات» ح ا ا ءتىلشىسى.

«الماتى وبلىسىنداعى اقشي دەگەن جەردەگى «داۋلەت-بەكەت» دەگەن شارۋا قوجالىعىندا 5 مىڭ تۇيە بار. ونداعى شارۋا قوجالىقتىڭ باسشىلىعى ءبىزدىڭ كاسىپورىنعا جىلىنا 500 تۇيە بەرۋگە دايىن ەكەنىن ايتىپ وتىر. كاسىپورىننىڭ باستاپقى جۇمىسىن 500 تۇيە قاناعاتتاندىرادى دەگەن ويدامىز. قازاقستاندا بۇقتىرىلعان تۇيە ەتى ءبىرىنشى رەت وندىرىلگەلى وتىر. ساۋد ارابياسىندا مۇنداي كاسىپورىن بار. ءبىراق، ءبىزدىڭ جاڭالىعىمىز - تۇيە ەتىن تۇتىنۋشىلارعا ارنايى قاپتامالار مەن كونسەرۆىلەردە ۇسىنىپ وتىرعانىمىز. ءونىمنىڭ جارامدىلىق مەرزىمى - 24 اي»، - دەيدى جوبا جەتەكشىسى جۇلدىز سۇلەيمەنوۆا.

تىڭ ءونىمنىڭ باعاسى ءالى بەلگىلەنبەگەن. ءبىراق، تۇيە ەتىنىڭ باعاسى نارىقتا سيىر ەتىنەن ەكى ەسە ارزان بولعاندىقتان، وندىرۋشىلەر وسى ارالىقتان اسىپ كەتپەۋدى كوزدەيدى.

«كوبىنەسە تۇيە ەتىن اسكەري بولىمدەرگە ۇسىنامىز. ولاردا قازىرگى تاڭدا قىزىعۋشىلىق بار. ءبىزدىڭ نارىقتا تۇيە ەتى يمپورتتا كەلىپ جاتقان جوق. بۇل دا ءوز كەزەگىندە ءبىزدىڭ ونىمىمىزگە سۇرانىس پايدا بولار دەگەن كوپ ءۇمىتتىڭ ءبىرى»، - دەيدى جۇلدىز سۇلەيمەنوۆا.

ايتا كەتەرلىگى، بۇگىن استانادا «عىلىم مەن بيزنەستى بىرىكتىرۋ قۇرالى رەتىندە تەحنولوگيالاردى كوممەرتسياليزاتسيالاۋ» تاقىرىبىندا فورۋم وتكەلى جاتىر.

فورۋماعا قاتىسۋشىلار عىلىمي جانە عىلىمي-تەحنيكالىق قىزمەت ناتيجەلەرىنىڭ دامۋىنداعى وزەكتى ماسەلەلەردى تالقىلاپ، عىلىم مەن بيزنەستىڭ قارىم-قاتىناسىن تاجىريبە جۇزىندە ىسكە اسىرۋ جولدارىن قاراستىرماق.

اۆتور: ايان بەكەن ۇلى