استانادا قازاق تىلىندە سويلەيتىن ءتۇرلى ۇلت وكىلدەرى جارىسقا ءتۇستى
قالالىق بايقاۋ قازاقستانداعى وزگە ۇلت وكىلدەرىنىڭ مەملەكەتتىك ءتىلدى مەڭگەرۋىنە مۇمكىندىك جاساۋعا باعىتتالعان جانە بۇگىن سايىستىڭ شەشۋشى كەزەڭى اياقتالدى. «رۋحاني جاڭعىرۋ: قوعامدىق سانانى جاڭعىرتۋ» باعدارلاماسى اياسىندا مەملەكەتتىك ءتىلدىڭ مارتەبەسىن كوتەرىپ، ونىڭ قولدانۋ اياسىن كەڭەيتۋ ماقساتىندا ەتنومادەني بىرلەستىكتەردىڭ جاستار قاناتى اراسىندا ءتىل بايقاۋىن وتكىزدىك. بايقاۋ ەكى كەزەڭنەن قۇرالعان جانە بۇگىن العاشقى ىرىكتەۋ تۋرىنان وتكەن سايىسكەرلەر باق سىناستى» ، - دەپ اتاپ ءوتتى استانا اكىمدىگى ق ح ا حاتشىلىعىنىڭ باس مامانى گۇلنار تايگوكوۆا.
باس ماماننىڭ ايتۋىنشا، جىل وتكەن سايىن بايقاۋعا دەگەن قىزىعۋشىلىق ارتىپ كەلەدى جانە قاتىسۋعا نيەت بىلدىرگەن جاستار سانى كوبەيۋدە. الداعى ۋاقىتتا دا جاستاردىڭ ءۇش تۇعىرلى تىلگە كوشىپ، باسەكەگە قابىلەتتى بولۋى ءۇشىن ءتىل بايقاۋىن كوپتەپ وتكىزۋ جوسپارلانعان. بايقاۋ قاتىسۋشىلارىنا «مەنىڭ وتانىم - قازاقستان» تاقىرىبىندا تۋعان جەرلەرىن قازاق تىلىندە تانىستىرىپ، قازاقتىڭ تانىمال اقىن- جازۋشىلارىنىڭ شىعارمالارىن مانەرلەپ وقىپ، جۇرگىزۋشىلەر سۇراعىنا جاۋاپ بەرۋ مىندەتتەلگەن. ۇيىمداستىرۋشىلاردىڭ حابارلاۋىنشا، بايقاۋ ءۇشىن ارنايى باعدارلاما ازىرلەنگەن. «بايقاۋ بارىسىندا ادامنىڭ ءتىلدى قانشالىقتى مەڭگەرگەنىن باعامداۋعا بولادى. بولاشاقتا بايقاۋدان بولەك، فەستيۆالدەر، كەزدەسۋلەر، ادەبي- مۋزىكالىق كەشتەر سەكىلدى وزگە دە قوعامدىق- بۇقارالىق شارالار وتكىزۋ كوزدەلگەن» ، - دەپ ءوز ءسوزىن تۇيىندەدى گ. تايگوكوۆا.
اۆتور: ايجان سەرىكجان قىزى
