قىزىلوردادا قانات ءجۇنىسوۆتىڭ «عاشىقتار حيكاياسى» كومەدياسى ساحنالاندى

  قىزىلوردا. قازاقپارات -  قىزىلورداداعى ن. بەكەجانوۆ اتىنداعى تەاتر ساحناسىندا «عاشىقتار حيكاياسى» كومەدياسى ونەر سۇيەر قاۋىمنىڭ نازارىنا ۇسىنىلدى، دەپ حابارلادى قازاقپارات ءتىلشىسى.

 كومەديالىق تۋىندى كورەرمەن كوڭىلىن سەرگىتىپ، ستۋدەنتتىك جىلداردىڭ ءتاتتى شاقتارىنا جەتەلەگەنى راس. كورەرمەن زالىندا ينە شانشىر جەر بولمادى. ستۋدەنتتىك شاق.  قىزىعى مەن شىجىعى قاتار جۇرەتىن ەڭ ءبىر عاجاپ كەز. قيال الەمىنە جەتەلەيتىن عاشىقتىق سەزىمىن باستان كەشەسىڭ بۇل ساتتە. ءوز سۇيگەنىڭ ءۇشىن قانداي تاۋەكەلگە بولسا دا باراتىن باتىرلىق بولادى عوي بويىڭدا.

جاتاقحانا بولمەسىندەگى 4 جىگىتتىڭ تاعدىرى. جۇرەكتەرىن عاشىقتىق دەرتى بويلاپ، سەزىم تالكەگىنە تۇسكەن جىگىتتەر سۇيىكتىلەرىن قاراتۋ ءۇشىن قانداي امالعا بارادى؟ وقيعا وسىلايشا قىزا ءتۇستى. جاستاردىڭ باستى تاقىرىبى ماحاببات پەن شىنايى دوستىقتى سيپاتتايتىن سپەكتاكل كوپتىڭ كوڭىلىنەن شىعا ءبىلدى. سوڭعى اۋەن شىرقالعان ساتتە بارلىق كورەرمەن ورىندارىنان تۇرەگەلىپ، قوسىلا شىرقاپ، وسى قويىلىمدى بىرگە ويناپ شىققانداي سەزىمدە بولدى. كورەرمەننىڭ جۇرەگىنە جول تاپقان قويىلىمدا جاستاردىڭ كوڭىل- كۇيلەرى كوتەرىلىپ، ريزاشىلىقتارىن ءبىلدىردى. سونىمەن قاتار تەاتر ارتىستەرىنە دەگەن ىستىق تىلەكتەرىن ءبىلدىرىپ، گۇل شوقتارىن ۇسىندى.

 اۆتور: ەلۋباي اۋەزوۆ