قىتاي ازاماتىن قۇتقارعان قازاق ستۋدەنتى: ەلىمنىڭ مەديتسيناسىنا ءوز ۇلەسىمدى قوسسام دەيمىن
قازاقستاندىق ستۋدەنتتىڭ قيىن ساتتەگى باتىل قيمىلى قىتايلىق ب ا ق پەن ينتەرنەت پايدالانۋشىلارىنىڭ اراسىندا كەڭىنەن تالقىلانعان بولاتىن. وتانداسىمىزعا قىتايلىقتار زور العىستارىن ءبىلدىرىپ، يگى ءىسى ۇلگى تۇتارلىق دەگەن پىكىر قالدىرىپ جاتىر. وسى رەتتە «قازاقپارات» ح ا ا ءتىلشىسى شەتەلدە ءبىلىم الىپ جاتقان جاس مامانمەن سۇحباتتاسقان ەدى.
- عالىمجان، ءوزىڭىز تۋرالى قىسقاشا ايتا كەتسەڭىز.. . قىتايعا وقۋعا بارۋعا نە سەبەپ بولدى؟
- مەن الماتىدا تۋىپ ءوستىم. قازاق- تۇرىك ليتسەيىندە وقىپ، 2008 -جىلى بەيجىڭ قالاسىنا كەلدىم. قىتايعا كەلۋىمنىڭ سەبەبى دە بار. مەكتەپ وقىپ جۇرگەنىمدە ەۋروپاعا بارىپ، ءبىلىم وليمپياداسىنا قاتىسىپ قايتتىم. سول كەزدە قىتايلىق وقۋشىلاردىڭ ءبىلىمى مەنى قاتتى تاڭ قالدىرعان ەدى. سودان باستاپ شىعىس ازيا ەلدەرىنە قىزىعۋشىلىعىم ارتا ءتۇستى. جاپونيا، كورەيا جانە قىتاي ەلدەرىنىڭ بىرىنە بارىپ ءبىلىم السام دەگەن جوسپارىم بولدى. سوڭعى تاڭداۋىم قىتايعا ءتۇستى. باستاپقىدا قىتاي حالىقتىق ۋنيۆەرسيتەتىنە ەكونوميكا ماماندىعى بويىنشا وقۋعا ءتۇستىم. الايدا ماماندىققا كوڭىلىم تولماۋىنا بايلانىستى مەديتسيناعا اۋىستىم. قازىر نەيروحيرۋرگيا ماماندىعى بويىنشا ءبىلىم الىپ جاتىرمىن. كەلەسى جىلى قىتايعا كەلگەنىمە 10 جىل تولادى. وسىندا ومىرلىك جارىمدى كەزدەستىردىم، شاڭىراق كوتەردىم. ايەلىم - الماتى قالاسىنىڭ تۋماسى، ول دا ءداستۇرلى قىتاي مەديتسيناسى ماماندىعى بويىنشا ءبىلىم الىپ جاتىر.
- ءسىزدىڭ ەسىنەن تانىپ قالعان قاريانى قۇتقارىپ قالعانىڭىز تۋرالى ب ا ق بەتىندە كوپ جازىلدى. بولعان ءىس جايلى ءوز اۋىزىڭىزدان ەستىسەك.. .
- ءيا، بۇل مەن ءۇشىن كۇتپەگەن جاعداي بولدى. ماگيسترانت رەتىندە بەيجىڭ قالاسىنىڭ سيۋانۋ اۋرۋحاناسىندا رەزيدەنت بولىپ جۇمىس ىستەپ ءجۇرمىن. كۇندەلىكتى ۋاقىتتا مەترودان سيۋانۋ ايالداماسىنان تۇسكەن كەزىمدە كومەك سۇراعان ادامداردىڭ داۋىسىن ەستىپ، ەسىنەن تانىپ جاتقان قارت ادامدى كوردىم. جانىنا جۇگىرىپ باردىم. تىنىسى توقتاپ قالعان ەكەن. العان ءبىلىمىم بويىنشا جۇرەككە ماسساج جاساپ، العاشقى كومەك كورسەتتىم. وسىدان كەيىن كوپ كەشىكپەي، جەدەل جاردەم كولىگى كەلدى. قاريانى سيۋانۋ اۋرۋحاناسىنا الىپ كەتتى.
- قىتايدا ەسىنەن تانىپ نەمەسە تايىپ جىعىلعان ادامعا كومەك كورسەتكەندەرگە جالعان ايىپ ارتىلاتىن وقيعالار ءجيى بولاتىنى جونىندە ەستىپ ەدىك. ءسىز وسىنداي جاعدايعا دۋشار بولامىن دەپ ويلامادىڭىز با؟
- دارىگەر رەتىندە ادامدى قۇتقارۋ مەنىڭ ءبىرىنشى مىندەتىم دەپ سانايمىن. سوندىقتان ونداي ويلار مەندە بولعان جوق. ول ادامدى امان الىپ قالۋعا تىرىسقانىمدى كۋاگەرلەر كورىپ تۇردى. مەترو كۇزەتشىسى دە جانىما كەلىپ، ەگەر قانداي دا ءبىر ماسەلە تۋىنداپ جاتسا، ءوزى كۋاگەر بولاتىنىن ايتتى. وقيعادان كەيىن قارتتىڭ بالالارى مەنى ىزدەپ، سيۋانۋ اۋرۋحاناسىنا حابارلاسىپتى. مەن دە ناۋقاستىڭ جاعدايىن ءبىلۋ ءۇشىن ەمحاناعا جۇگىنگەن ەدىم. ءىستىڭ ءمان- جايىن بىلگەننەن كەيىن ۇستازدارىم كوپكە ۇلگى بولسىن دەگەن ماقساتپەن بۇل وقيعا تۋرالى جاريالاۋ كەرەك دەپ شەشتى. مەن كەلىسىمىمدى بەردىم. ال قاريانىڭ بالالارى مەنى اۋرۋحاناعا ارنايى ىزدەپ كەلىپ، العىسىن ايتتى.
- ەندى ءوزىڭىزدىڭ جوسپارىڭىزعا توقتالىپ وتسەڭىز.. . وقۋ بىتىرگەن سوڭ ەلىمىزگە ورالىپ ەڭبەك ەتەسىز بە؟
- ازىرگە ماماندىعىم بويىنشا ماگيستراتۋرانى وقىپ ءبىتىرۋ - باستى جوسپارىم. كەيىن وسى سالادا قازاقستان- قىتاي اراسىندا التىن كوپىر بولىپ، ەلىمىزدەگى ناۋقاستاردىڭ قىتايدا ەمدەلۋىنە، سونداي- اق، ەلىمىزدىڭ مەديتسينا سالاسىنىڭ وركەندەپ وسۋىنە ءوز ۇلەسىمدى قوسسام دەگەن ارمانىم بار. ارينە، ءالى دە ءبىلىمىمدى شىڭداپ، شەتەلدەن بولماسا وسى قىتايدان دوكتورلىق اتاعىن الىپ، ەلىمىزگە قىزمەت ەتۋدى دە جوسپارلاپ وتىرمىن.
- سۇحبات بەرگەنىڭىزگە راحمەت، ءىسىڭىز ىلگەرى جىلجىسىن!
- سىزگە دە راحمەت!
اۆتور: مۇحتار قاليموللا
