الماتىدا لاڭكەستەر تۋرالى دەرەكتى فيلم كورەرمەنگە جول تارتتى

الماتى. قازاقپارات - الماتىدا ق ر مادەنيەت جانە سپورت مينيسترلىگى جانە قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ قورى قولداۋىمەن ۇيىمداستىرىلعان قازاق دەرەكتى كينوسى كۇندەرى شەڭبەرىندە «سەنىم جولىندا» اتتى دەرەكتى فيلمنىڭ تۇساۋكەسەرى ءوتتى.

اتالعان كينوتۋىندىنى ش. ايمانوۆ اتىنداعى «قازاق فيلم» ا ق قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگىنىڭ قولداۋىمەن ءتۇسىردى.

رەجيسسەرى - ءاسيا بايعوجينا. فيلمدە قوعامىمىزداعى وزەكتى ماسەلەلەردىڭ ءبىرى - ءدىن جولىنداعى اداسۋشىلىق تۋرالى باياندالادى. نەگىزگى ەپيزود - ءدۇيىم ەلدى دۇرلىكتىرگەن، بىرنەشە ادامداردىڭ ءومىرىن قيىپ، 40 قا جۋىق جەرگىلىكتى تۇرعىندى جارالاعان قاندى وقيعا - 2016-جىلى ماۋسىمنىڭ 5 ىندە بولعان اقتوبەدەگى تەراكت.

بۇل فيلم مۇراعات ماتەريالدارىنا، لاڭكەستەردىڭ شابۋىلىنان امان قالعان جانداردىڭ، ءداستۇرلى ەمەس يسلام اعىمىن ۇستاۋشىلاردىڭ جاقىندارىنىڭ ەستەلىكتەرىنە نەگىزدەلگەن.

- يسلام دىنىنە قاتىستى كوتەرىلەتىن بارلىق ماسەلەلەر مەنى قاشان دا قىزىقتىرادى. ماعان وسى فيلمدى تۇسىرۋگە ۇسىنىس جاساعاندا، تاقىرىپتىڭ كۇردەلىلىگىنە قاراماستان بىردەن كەلىسىمىمدى بەردىم. وسى فيلمدى جاساۋدا بەدەلدى ءدىنتانۋشى اسقار سابدين ۇلكەن كومەك كورسەتتى. سونداي-اق، اسا تۇسىنۋشىلىكپەن قاراپ، توتەنشە جاعادايدا جۇمىس جاساعاندارى ءۇشىن فيلمنىڭ ءتۇسىرۋ توبىنا العىسىمدى بىلدىرەمىن، - دەدى فيلمنىڭ رەجيسسەرى ءاسيا بايعوجينا.

ايتا كەتسەك، دەرەكتى فيلم ءتورت بولىمنەن قۇرالعان. ءار ءبولىم كەيىپكەرلەردىڭ ەسىمدەرىمەن اتالادى، ولار: جازيرا - بەس بالاسىمەن جانە كۇيەۋىمەن بىرگە سيرياعا كەتكەن؛ جانسەرىك - اقتوبەدەگى تۇرمەدە تەراكت ءۇشىن جازاسىن ءوتىپ جاتىر؛ ديانا - 16 جاستاعى كوللەدج ستۋدەنتى، تۇركياعا بارىپ، كەيىن سيرياعا ءوتىپ كەتكەن؛ مارات - شىمكەنت قالاسىنىڭ 45 جاسار تۇرعىنى، ورىس ءتىلى ءپانىنىڭ مۇعالىمى، ايەلىن، التى بالاسىن الىپ سيرياعا كەتكەن...

جاستارىمىز نەگە ءدىن جولىندا اداسۋدا؟ بۇل جولعا ولاردى نە يتەرمەلەيدى؟ جاستاردىڭ ءدىني ساۋاتتىلىعى قانداي، ءداستۇرلى دىنگە بەت بۇرۋ امالدارى بار ما؟ فيلمدە وسى جايىندا بەلگىلى تەولوگتار جانە ءدىني قىزمەتكەرلەر، ساياساتكەرلەر مەن تاريحشىلار، مەملەكەتتىك ورگان قىزمەتكەرلەرى جانە قوعامدىق ۇيىمداردىڭ بەلسەندىلەرى ءوز ويلارىمەن بولىسەدى.

فيلمنىڭ ءتۇسىرۋ جۇمىستارى الماتى، اقتوبە، وڭتۇستىك قازاقستان جانە اتىراۋ وبلىستارىندا، ۋفا جانە ماسكەۋ قالالارىندا جۇرگىزىلگەن.

اۆتور: الماس مۇقاش ۇلى