الەمدىك تانىمال باسلىمى موڭعولياداعى قازاق بۇركىتشىلەرى تۋرالى جازدى

استانا. قازاقپارات - باتىس موڭعوليانىڭ تاۋلارىندا جىل سايىن كۇزدە بۇركىتشىلەر، ياعني قازاق بۇركىتشىلەرى اراسىندا فەستيۆال وتەدى.

بۇگىندە الەمدە مىڭداعان قۇسبەگى بار. الايدا، فەستيۆالداعى اڭشىلىق پەن تۇرمىستىق ماقساتتاعى اڭشىلىق اراسىندا ايىرماشىلىق بار. تەك ءبىر ەرەكشەلىگى، بۇل جارىستى ءوز كوزىمەن كورۋ ءۇشىن الەمنىڭ تۇكپىر-تۇكپىرىنەن تۋريستەر اعىلىپ جاتادى.

شەتەلدىكتەر ءۇشىن بۇل فەستيۆال تەگىن ەمەس. وسى فەستيۆال تۋرالى BBC باسىلىمى جازادى. موڭعوليالىق قۇسبەگىلەر بۇركىتتى اسىراۋدىڭ وڭاي ەمەستىگىن جانە سول سەبەپتى ونى كەز كەلگەن ءۇي اسىراي بەرمەيتىنىن ايتادى.

قىران قۇستى اسىراۋ ءۇشىن كۇنىنە كەم دەگەندە جارتى كەلى ەت قاجەت. موڭعوليادا بۇگىندە جۇزدەگەن بۇركىتشى بار. الايدا، ساناۋلىسى عانا قىران قۇستى تەك اڭشىلىق ماقساتتا پايدالانادى.



«بۇركىتتىڭ كوزى وتكىر ەكەنى بەلگىلى. ول ءتىپتى، ەكى شاقىرىم قاشىقتىقتاعى قوياندى انىق كورەدى. ەرەسەك قۇستى قولعا ۇيرەتۋ مۇمكىن ەمەس. سوندىقتان ونى بالاپان كۇنىندە ۇيادان الىپ اسىرايدى. ال اڭشىلىققا تەك ۇرعاشىسىن پايدالانادى.

سەبەبى، ەركەك قۇس السىزدەۋ كەلەدى. قولعا ۇيرەتۋ ءۇشىن بىرنەشە جىل ۋاقىت كەتەدى. وسى ۋاقىت ارالىعىندا قۇس ءوسىپ، يەسىنە تولىقتاي ۇيرەنەدى. ال يەسى قىرانعا قانداي كولەمدە تاماق بەرۋى كەرەكتىگىن جاقسى ءبىلۋى ءتيىس.

سەبەبى، قۇس توق بولسا، اڭ اۋلاۋعا قىزىعۋشىلىعى بولمايدى. ال قارنى اش جاعدايدا ۇستاعان جەمتىگىن يەسىنە بەرمەۋى مۇمكىن. يەسى ونى اتتىڭ جۇرىسىنە، تۇياعىنىڭ دۇرسىلىنە جانە شاقىرعان كەزدە كەرى قايتۋىنا ۇيرەتۋى ءتيىس. ۇزاق دايىندىقتان كەيىن جىرتقىش قۇس اڭ اۋلاۋعا دايىن بولادى.

ءارى وسى ۋاقىت ارالىعىندا قۇس پەن بۇركىتشىنىڭ اراسىندا ەرەكشە ءبىر بايلانىس پايدا بولادى. ءتىپتى، يەسىنەن ۇزاپ ەشقايدا ۇشپايتىن بولادى. كوزىندەگى توماعا وعان ەشقايدا الاڭداماۋىن، اياقباۋى ونىڭ ۋاقىتىنان بۇرىن ۇشىپ شىقپاۋىن قامتاماسىز ەتەدى. اڭشى بۇركىت جەمتىگىنە الدىمەن تىرناعىمەن جابىسىپ، جۇرەگىن شوقىپ تاستايدى. ال جۇگىرىپ جەتكەن يەسى ونى سيپاپ، استىنداعى اڭدى الادى. بۇل تۇستا يەسى وعان مىندەتتى تۇردە ءبىر ءتۇيىر ەت بەرۋى ءتيىس»، - دەپ جازادى BBC.

موڭعولياداعى قازاقتار جىلدا وتەتىن كۇزگى فەستيۆالگە جاقسىلاپ دايىندالادى. كونكۋرسقا موڭعوليانىڭ تۇكپىر- تۇكپىرىنەن ونداعان قازاقتار جينالادى. بۇل جولى دا فەستيۆال كەڭ كولەمدە، جۇزدەگەن تۋريستەردىڭ كوز الدىندا ءوتتى.

جارىستىڭ العاشقى كەزەڭىندە يەسى ۇشىپ شىققان بۇركىتىن شاقىرۋى ءتيىس. الدىمەن قىران قۇستى بيىك جوتانىڭ باسىنان ۇشىرادى. ال تومەندە تۇرعان اڭشى ونى ايقايلاپ شاقىرادى. بۇركىت وسى تۇستا يەسىنىڭ قولىنا بارىپ قونۋى قاجەت. مىنە، وسى تۇستا ناشار دايىندالعان قۇس مۇلدەم باسقا جاققا قاراي ۇشىپ كەتىپ، يەسىن ۇياتقا قالدىرادى. بۇل سىننان سۇرىنگەننەن كەيىن تيىسىنشە كەلەسى اينالىمعا وتە المايدى.

كەلەسى كەزەڭدە قىراننىڭ اڭ اۋلاۋ شەبەرلىگى سىنالادى. ياعني، بۇركىت اتقا بايلانعان قوياندى ۇستاۋى كەرەك.



مۇنداي فەستيۆال اتادان بالاعا ميراس بولىپ كەلە جاتقان اڭشىلىق ءداستۇردىڭ ءۇزىلىپ قالماۋىنا سەپتىگىن تيگىزەدى. ال وسى بايقاۋدى ءوز كوزىمەن كورۋگە كەلگەن شەتەلدىكتەردىڭ ارقاسىندا مەملەكەتتىڭ دە تۋريستىك الەۋەتى ارتادى.

دايىنداعان ايان ءابدۋالي، «ەگەمەن قازاقستان»