كوتەرىلىستەن كوز اشپاعان ۋكراينا حالقى تاعى ەرەۋىلگە شىقتى
جوعارعى رادا الدىنا بەس مىڭعا جۋىق ادام جينالىپ پرەزيدەنت پەتر پوروشەنكونىڭ وتستاۆكاعا كەتۋىن تالاپ ەتۋدە.
پوليتسيا مەن ۇلتتىق گۆارديا ۇكىمەتتىك كۆارتالدى تۇگەل قورشاۋعا الدى. ساراپشىلار جاپپاي نارازىلىقتى «ءۇشىنشى مايدانعا» بالاپ وتىر، دەپ حابارلايدى 31-ارنا.
ۋكراينانىڭ ونعا جۋىق قالاسىندا ەكى مىڭنان استام ادام ەرەۋىلگە شىقتى. جينالعاندار بيلىككە ءۇش تالاپ قويىپ وتىر. بۇل: جەمقورلىققا قارسى تاۋەلسىز سوت قۇرۋ، دەپۋتاتتاردىڭ قول سۇعىلماۋشىلىق قۇقىعىن الىپ تاستاۋ جانە سايلاۋ تۋرالى جاڭا زاڭ قابىلداۋ. نارازى توپتىڭ قاتارىندا ودەسسا وبلىسىنىڭ بۇرىنعى گۋبەرناتورى ميحايل سااكاشۆيلي مەن «بوستاندىق»، «دەموكراتيالىق اليانس»، «ۇلتتىق كورپۋس» سەكىلدى پارتيالاردىڭ بەلسەندىلەرى دە بار.
«ءبىز ەلدە ەشتەڭكە وزگەرمەيتىنىن انىق تۇسىندىك. 3 جىلدىڭ ىشىندە جاعداي جاقسارمادى. پوروشەنكو بار كەزدە، ىلگەرىلەۋ بولمايتىنى انىق. پوروشەنكو بيلىكتە وتىرعاندا جەمقورلىقپەن كۇرەس جۇرگىزىلمەيدى»، - دەيدى ساياساتكەر ميحايل سااكاشۆيلي.
جاپپاي نارازىلىققا بايلانىستى ءتارتىپ ساقشىلارى كۇشەيتىلگەن رەجيمگە كوشىپ، قالا كوشەلەرىنە 3,5 مىڭعا جۋىق پوليتسيا شىقتى. كيەۆتە «جاڭا كۇشتەر قوزعالىسى» پارتياسى مەن ونى قولدايتىن وپپوزيتسيا وكىلدەرى كۇشتىك قۇرىلىمدارمەن قاقتىعىسىپ، ءتورت ادام زارداپ شەكتى. جارالانعانداردىڭ اراسىندا پوليتسيا قىزمەتكەرى دە بار.
«مەن، بەيبىت شەرۋلەر دەموكراتيانىڭ ماڭىزدى بولىگى - دەپ سانايمىن. دەمونسترانتتاردى سىيلايمىن، ولارعا تۇسىنىستىكپەن قارايمىن. سونداي-اق، ءتارتىپ ساقشىلارىنان ەرەۋىلدىڭ بەيبىت كۇيىن ساقتاپ قالۋدى تالاپ ەتەمىن»، - دەيدى پەتر پوروشەنكو.
ءوز سوزىندە ۋكراينا پرەزيدەنتى حالىقتىڭ «دەپۋتاتتاردىڭ قول سۇعىلماۋشىلىق تۋرالى دەربەس قۇقىعىن جويۋ» ءوتىنىشىن قولدايتىنىن دا جەتكىزدى. دەسە دە ەرەۋىلشىلەر الاڭعا تىككەن شاتىرلارىن تالاپتارى تۇگەل ورىندالمايىنشا بۇزبايتىندارىن ايتىپ تابانداپ تۇر.
