پرەزيدەنتپەن كەزدەسكەن شەتەلدىك ديپلوماتتار قازاقشا سويلەدى

استانا. قازاقپارات - استاناداعى كەلىسسوزدەر سيرياداعى سوعىس وتىنىڭ سايابىرلاۋىنا سەپ بولدى.

ەلباسى نۇرسۇلتان نازاربايەۆ 18- قازاندا استانادا شەتەلدىك ديپلوماتتارمەن كەزدەسۋىندە وسىلاي دەپ مالىمدەدى، دەپ حابارلايدى ك ت ك.

كەزەدەسۋگە جەتى مەملەكەت ەلشىلەرىنىڭ اۋىسىپ، قىزمەتتەرىنە كىرىسۋى سەبەپ. ولاردىڭ قاتارىندا اۋعانستان، پولشا، كانادا، فينليانديا، بەلگيا، فرانسيا جانە ەستونيانىڭ ەلشىلەرى بار. نازاربايەۆقا ءوز پرەزيدەنتتەرىنىڭ سەنىم گراموتالارىن تابىستاۋ سالتاناتتى راسىمىنە كەلگەن ديپلوماتتار قىزىل كىلەممەن ءجۇرىپ، كوك بايراققا ەرەكشە قۇرمەت كورسەتتى. العاش بولىپ گراموتا تابىستاعان ەستونيا ەلشىسى سالەم ءسوزىن قازاقشا باستادى.

- توتەنشە جانە وكىلەتتى ەلشى قىزمەتىنە تاعايىندالۋ تۋرالى سەنىمحاتتى ۇسىنۋعا رۇقسات ەتۋىڭىزدى سۇرايمىن.

ديپلوماتتىڭ قازاق تىلىنە دەگەن قۇرمەتىن پرەزيدەنت جىلى قابىلداپ، قالجىڭ الماسىپ، ەستەلىككە سۋرەتكە ءتۇستى.

«بۇگىن سىزدەر ءۇشىن ەڭبەك جولدارىڭىزدىڭ جاڭا كەزەڭى باستالىپ وتىر. قازاقستانداعى ديپلوماتيالىق ميسسيالارىڭىز تابىستى بولادى دەپ سەنەمىن. سىزدەر ءبىزدىڭ ەل تاريحىنداعى جاڭا داۋىرگە كۋا بولاسىزدار. ءبىز قازاقستاننىڭ ءۇشىنشى جاڭعىرۋىن ىسكە اسىرۋعا كىرىستىك. رۋحاني جاڭعىرۋ اتتى اۋقىمدى باعدارلاما، ءاربىر ازامات ءۇشىن ەرەكشە مانگە يە بولادى»، - دەيدى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ.