الماتىلىق ۇستازدارعا ناۋقاس وقۋشىنىڭ ءومىرىن اراشالاپ قالاتىن قۇرىلعى تانىستىرىلدى

 الماتى. قازاقپارات - الماتىنىڭ قوعامدىق كەڭەسى مەكتەپتەگى قاۋىپسىزدىك تاقىرىبىندا جيىن وتكىزىپ، وقۋشى مەن ستۋدەنتتى اجالدان اراشالاپ قالاتىن قۇرىلعىنى تانىستىردى، دەپ حابارلايدى قازاقپارات ءتىلشىسى.

الماتىداعى «تۇران» ۋنيۆەرسيتەتىندە قالالىق قوعامدىق كەڭەس مەكتەپ وقۋشىسىنىڭ قاۋىپسىزدىگى تاقىرىبىندا جيىن وتكىزدى. جيىندا «اق جۇرەك» قوعامدىق قورىنىڭ ديرەكتورى رۋسلان ماسحۋتوۆ ادام كۇندەلىكتى ومىرىندە كۇتپەگەن جەردەن جۇرەك تالماسىنا ۇشىراعان كەزىندە جەدەل جاردەم كەلگەنگە دەيىن كورسەتىلەتىن مەديتسينالىق كومەك تۋرالى باياندادى. ونىڭ ايتۋىنشا، سوڭعى ۋاقىتتا مۇنداي وقيعا قازاقستانداعى مەكتەپ وقۋشىلارى اراسىندا دا كەزدەسىپ وتىر.

«دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنە سۇيەنسەك، اپتا سايىن 1 ميلليون ادامعا شاققاندا ورتا ەسەپپەن 30 ادامنىڭ جۇرەگى اياقاستى توقتاپ قالادى. ەگەر قازاقستاندا 17 ميلليون تۇرعىن بار دەپ ەسەپتەسەك، وندا اپتا سايىن ەلىمىزدە 500 ادامنىڭ جۇرەگى كۇتپەگەن جەردەن توقتاپ، قايعىلى جاعدايعا ۇشىراپ جاتادى. ال جىل سايىن، ەلىمىزدە 26 مىڭ ادام جۇرەك تالماسى بويىنشا مەديتسينالىق كومەككە مۇقتاج. وسى 26 مىڭ وقيعانىڭ 80 پايىزىندا ادامدار مەديتسينالىق عيماراتتان تىس جەردە، ياعني جۇمىستا، سپورتپەن شۇعىلدانىپ جاتقانىندا، ۇيدە نەمەسە كەز كەلگەن جەردە قايعىلى جاعدايعا دۋشار بولادى. بۇل مەديتسينالىق ەمەس، الەۋمەتتىك پروبلەماعا اينالدى»، - دەگەن رۋسلان ماسحۋتوۆ قازاقستاندا مەكتەپ وقۋشىلارىنىڭ دا جۇرەك تالماسىنا شالدىعىپ جاتاتىنىن ايتتى.

«بىلتىرعى وقۋ جىلىندا استانا قالاسىنداعى 84 مەكتەپ بويىنشا 2 وقيعا تىركەلدى. 1 وقۋشى دەنە شىنىقتىرۋدا قازا تاپسا، ەكىنشى وقۋشىنىڭ كەۋدە تۇسىنان ۇرعاندىقتان مەرت بولدى. قازاقستاندا ناقتى ستاتيستيكانى كەلتىرۋ مۇمكىن ەمەس. سەبەبى، بۇل ماسەلە باق ارقىلى ءجيى ايتىلمايدى. شامامەن، 10-15 وقۋشى قازاقستان بويىنشا جۇرەك تالماسىنا ۇشىراپ جاتادى. ناقتى ستاتيستيكا كەلتىرە المايتىن تاعى سەبەپ، جەدەل جاردەم كەلگەن ۋاقىتتا ناۋقاس دۇنيەدەن ءوتىپ كەتەدى. اياق استى جۇرەگى توقتاعان ادامعا العاشقى ەكى مينۋتتا كومەك كورسەتىلمەسە، ول قايتىس بولادى. سوندىقتان، بۇل ستاتيستيكا بىزدە ناقتى ەمەس»، - دەدى ول.

 رۋسلان ماسحۋتوۆتىڭ ايتۋىنشا، وسىنداي سەبەپتەردىڭ الدىن الۋ ءۇشىن بارلىق مەكتەپتەرگە جۇرەك توقتاعان كەزدە كومەك كورسەتەتىن قۇرىلعى - دەفيبريللياتور الۋ قاجەت.

 «ءبىز دەفيبريللياتوردى ورناتۋ تۋرالى ۇسىنىستى ءبىرىنشى «نۇر وتان» پارتياسىنا ايتتىق، قولدادى. پرەمەر- مينيستر ساعىنتايەۆقا دا كورسەتىپ، قولداۋ تاپتىق. ءبىزدىڭ جوبا «قاۋىپسىز مەكتەپ، قاۋىپسىز جوعارى وقۋ ورنى» دەپ اتالادى. ماقساتىمىز - بارلىق وقىتۋشى قۇرامدى العاشقى مەديتسينالىق كومەككە ۇيرەتۋ. ياعني، جۇرەك توقتاعان جاعدايدا، العاشقى 2 مينۋت ىشىندە كومەك كورسەتۋدى مەديتسينالىق ءبىلىمى جوق ادامدارعا ۇيرەتەمىز»، - دەدى ول.

بۇگىنگى تاڭدا استانا قالاسىندا №59- مەكتەپ العاشقىلاردىڭ ءبىرى بولىپ قۇرىلعىنى ساتىپ العان. رۋسلان ماسحۋتوۆ بىلتىرعى وقۋ جىلىندا 7- سىنىپ وقۋشىسى دەنە شىنىقتىرۋ ساباعى بارىسىندا ءدال وسى مەكتەپتە كوز جۇمعان. ەندى ماماندار دەفيبريللياتوردى الماتىنىڭ بارلىق مەكتەپتەرىنە ساتىپ الۋ قاجەت دەگەن ۇسىنىستارىن قالالىق اكىمدىككە جەتكىزبەك.

اۆتور: الماس مۇقاش ۇلى