الماتى جاستارىنىڭ تۇرعىن ءۇي الۋعا مۇمكىندىگى ارتا ءتۇستى

الماتى. قازاقپارات - الماتى جاستارىنىڭ ءتيىمدى شارت بويىنشا تۇرعىن ءۇي الۋعا مۇمكىندىگى ارتا ءتۇستى، دەپ حابارلايدى قازاقپارات ءتىلشىسى. بۇگىن اكىمدىكتە «تۇرعىن ءۇي جيناق قۇرىلىس بانكى» ا ق مەن قالانىڭ تۇرعىن ءۇي جانە تۇرعىن ءۇي ينسپەكتسياسى باسقارماسى ىنتىماقتاستىق تۋرالى ءتيىستى كەلىسىمگە قول قويدى.

 كەلىسىمگە سايكەس، جاستارعا ارنالعان «الماتى جاستارى» اتتى جاڭا تۇرعىن ءۇي باعدارلاماسى بارىسىندا 35 جاسقا دەيىنگى الماتىلىقتار جەكە پاتەرگە يە بولۋ ءۇشىن جەڭىلدەتىلگەن زايەمگە قول جەتكىزە الادى.

«الماتى جاستارى» باعدارلاماسىنىڭ باستى ەرەكشەلىگى پايىزدىق تولەمنىڭ تومەندىگىندە. كولەمى 10 ميلليون تەڭگەگە دەيىنگى نەسيە جىلىنا 5 پايىزبەن بەرىلەدى. باعدارلاما بويىنشا نەسيەنى قايتارۋ مەرزىمى (3-25 -جىل) تولەم قابىلەتىنە قاراي جەكە جاسالادى. الماتى اكىمى باۋىرجان بايبەك مەملەكەت باسشىسىنىڭ تاپسىرماسى بويىنشا بيىل الماتىدا «جاستار جىلى» دەپ جاريالانعانىن، سونىڭ اياسىندا جاستاردىڭ قالاداعى ومىرگە بەيىمدەلۋىنە، جان- جاقتى دامۋىنا، تۇلعا بولىپ قالىپتاسۋىنا وڭ ىقپال ەتەتىن ءتيىستى جول كارتاسىنىڭ جۇزەگە اسىپ جاتقاندىعىن اتاپ ءوتتى.

«بۇگىندە قالادا 35 جاسقا دەيىنگى 800 مىڭ ادام تۇرىپ جاتىر. جاستار ءۇشىن باسپانا ماسەلەسى بارىنشا وزەكتى. «الماتى جاستارى» اتتى جەڭىلدەتىلگەن تۇرعىن ءۇي باعدارلاماسىن ەنگىزۋ ءۇشىن قازىردىڭ وزىندە جەرگىلىكتى بيۋدجەتتەن 1 ميلليارد تەڭگە ءبولىندى. ونىڭ ۇستىنە، «الماتى جاستارى» باعدارلاماسى جاستاردى ىنتالاندىرۋمەن قاتار قارجىنىڭ قالادا قالۋىنا دا ىقپال ەتەدى. جەڭىلدەتىلگەن نەسيەمەن تەك الماتى قالاسىنداعى ءۇيدى ساتىپ الۋعا بولادى. ياعني، وسى قارجى ەسەبىنەن قۇرىلىسشىلار مەن جۇمىسشىلارعا جالاقى تولەنەدى، كاسىپورىندارعا تاپسىرىس بەرىلەدى، قۇرىلىس كومپانيالارى قالا بيۋدجەتىنە سالىق تولەيدى»، - دەدى ب. بايبەك.

 ايتا كەتەرلىگى، باعدارلاما جۇمىس ىستەيتىن جاستاردى ىنتالاندىرۋعا باعىتتالعان. قالا ۇيىمدارىندا جۇمىس ىستەيتىن جاستاردىڭ ءار جىلىنىڭ وتىلىنە 1 ۇپاي ەسەپتەلەدى. ال ەگەر جاس ادام الەۋمەتتىك سالادا، مىسالى مەكتەپتە نەمەسە بالاباقشادا ەڭبەك ەتسە، ونىڭ ەڭبەك ءوتىلىنىڭ ۇپايى ەكى ەسەلەنەدى. الەۋمەتتىك مۇمكىندىگى تومەن جاندار ءۇشىن دە جەڭىلدەتىلگەن جاعداي جاسالعان. ولاردىڭ قاتارىنا كوپ بالالى وتباسىلار، 1 جانە 2 توپ مۇگەدەكتەرى، تولىق ەمەس وتباسىلار، جەتىمدەر جانە باسقالارى كىرەدى. سونىمەن قاتار، قالا بيلىگى «الماتى» ا ك ك  ۇ ك» ا ق ارقىلى ستۋدەنتتەر ءۇشىن جاتاقحانا قۇرىلىسىن سالۋدى قولعا الماقشى.

قازىرگى كەزدە وسى جوباعا قاتىسۋعا «الماتى مەنەدجمەنت ۋنيۆەرسيتەتى» مەن س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى نيەت بىلدىرۋدە. الماتى جاستارىنا قولداۋ كورسەتۋدىڭ جول كارتاسى اياسىندا 2020 -جىلعا دەيىن 12 جاتاقحانا سالۋ جوسپارلانعان. بيىلعى جىلدىڭ اياعىنا دەيىن ءتورت جاتاقحانا قۇرىلىسى اياقتالادى.

«ءبىز تۇرعىن ءۇي- قۇرىلىس جيناعى جۇيەسىندە العاش رەت اكىمدىكپەن سالىمشىلاردى قولداۋعا باعىتتالعان كەلىسىمگە قول قويىپ وتىرمىز. الماتى بويىنشا ءبىزدىڭ قورجىنىمىز قوماقتى. بۇگىنگى كۇنى ءبىزدىڭ فيليالدا 147 مىڭ ادامنىڭ دەپوزيتى بار، ونىڭ 50 مىڭى، ءبىز ەسەپتەپ كوردىك، 20-30 جاس ارالىعىنداعى جاس ادامدار. ءارى ولاردىڭ 13 مىڭى بيىل كەلگەندەر»، - دەدى «تۇرعىن ءۇي قۇرىلىس جيناق بانكى» ا ق باسقارما ءتورايىمى لياززات يبراگيموۆا.

باعدارلاماعا قاتىسۋ ءۇشىن 10 كۇن ىشىندە ءوتىنىش بەرۋ قاجەت. ونى ارنايى almaty-zhastary.kz   سايتى ارقىلى جاساۋعا بولادى. اۆتوريزاتسيا ءۇشىن جاقىن ماڭداعى ح ق ك و- دان ەلەكتروندى سيفرلى قولتاڭبا الۋ كەرەك. ءوتىنىش قابىلداۋ مەرزىمى اياقتالعان سوڭ قاتىسۋشىلاردى ىرىكتەۋ باستالادى. جەڭىلدەتىلگەن نەسيە الۋدىڭ كانديداتتار پۋلىنا جاس الماتىلىقتارعا قولداۋ بىلدىرەتىن «الماتى جاستارى» باعدارلاماسىنىڭ بارلىق تالاپتارىنا سايكەس ارنايى ۇپاي بويىنشا جۇيە ارقىلى ىرىكتەلگەندەر ەنەدى. ۇپايعا نەكەدە تۇرعان جىلى، بالالار سانى، جۇمىس ءوتىلى مەن ەڭبەك ەتەتىن جەرى، جەكە كاسىپكەرلىگى، الماتىدا تىركەلگەن مەرزىمى جانە باسقالارى ىقپال ەتەدى. پۋل تولىق جاسالعاننان كەيىن عانا «تۇرعىن ءۇي قۇرىلىس جيناق بانكى» ءوز جۇمىسىنا كىرىسەدى. بانك كانديداتتىڭ تولەم قابىلەتىن تەكسەرىپ، سونان سوڭ 5  پايىزدىق جەڭىلدەتىلگەن نەسيە بەرەدى.

جاستارعا بەرىلەتىن نەسيەنىڭ جالپى كولەمى 10 ميلليون تەڭگە. قارىز تەك جاڭا ءۇي ساتىپ الۋعا بەرىلەدى، پاتەردى باعدارلاماعا قاتىسۋشى ءوزى تاڭدايدى. باستى تالاپتار ءوتىنىش بەرۋ كەزىندە قاتىسۋشى مەن ونىڭ جۇبايىنىڭ جاسى 35 جاستان اسپاۋى ءتيىس. باعدارلاماعا جۇبايلاردىڭ تەك بىرەۋى عانا قاتىسا الادى. ەرلى- زايىپتىلار مەن ولاردىڭ وتباسى مۇشەلەرىنىڭ (ەگەر ولار وتباسى بولسا) الماتى قالاسىندا 1 جىلدىق تۇراقتى تىركەۋى بولۋى شارت. باعدارلاماعا قاتىسۋشىنىڭ جانە ونىمەن بىرگە تۇراتىن وتباسى مۇشەلەرىنىڭ قازاقستان رەسپۋبليكاسى اۋماعىندا جەكە تۇرعىن نەمەسە ارەندالىق ۇيلەرى بولماۋى ءتيىس.

باعدارلاماعا قاتىسۋشى قازاقستان رەسپۋبليكاسى اۋماعىندا سوڭعى 5 جىل ىشىندە تۇرعىن ءۇي جاعدايىن ادەيى تومەندەتكەن فاكتىسى جوق بولعانى ءجون؛ سونداي- اق قاتىسۋشىنىڭ الماتى قالاسىنداعى جۇمىس ءوتىلى جارتى جىلدان از بولماۋى قاجەت. بۇل تالاپتار الەۋمەتتىك جاعدايى تومەن جاندارعا جۇرمەيدى، ولار: 1 جانە 2 توپ مۇگەدەكتەرى؛ مۇگەدەك بالالارى بار جانە ولاردى تاربيەلەۋشى وتباسىلار؛ اتا- انا قاراۋىنسىز قالعان جەتىمدەر؛ 4 جانە ودان دا كوپ كامەلەتكە جەتپەگەن بالالارى بار وتباسىلار؛ 1 جانە ودان كوپ بالالارى بار تولىق ەمەس وتباسىلار.

اۆتور: گۇلميرا عوسمانالي