استانا تۇرعىندارىنا كوندومينيۋمدارعا تىركەلۋ ۇسىنىلدى
اۋدان اكىمدىكتەرىمەن بىرلەسىپ جۇرگىزىلگەن جۇمىستاردىڭ ناتيجەسىندە تىركەلگەن كوندومينيۋم سانى %95 جەتكىزىلدى. وسىلايشا، استانا اتالمىش كورسەتكىش بويىنشا رەسپۋبليكادا كوش باستاپ تۇر.
كوندومينيۋمنىڭ تىركەلۋى پاتەر يەلەرىنە وزدەرىنىڭ ورتاق مۇلكىن تولىق تۇردە پايدالانۋ، ءوز ءۇيىن باسقارۋدىڭ كەز كەلگەن فورماسىن تاڭداۋ قۇقىعىن بەرەدى.
مۇنىمەن قوسا، «109» ديسپەتچەرلىك قىزمەتى تۇرعىنداردىڭ قىزمەت كورسەتۋ جانە باسقارۋشى كومپانيالار مەن پ ي ك-نىڭ ەسكەرتۋلەرى بويىنشا وتىنىشتەرى مەن شاعىمدارىن قابىلدايدى.
«جابىندىلاردى، پودەزدەردى، ليفتىلەردى، قاسبەتتەردى كۇردەلى جوندەۋدەن وتكىزۋ، قوماقتى قارجىنى تالاپ ەتەتىن جابدىقتاردى، سورعىشتاردى، جىلۋ الماستىرعىشتاردى اۋىستىرۋ شارالارى قازىرگى تاڭدا اي سايىن تولەنىپ جاتقان تولەمدەردىڭ ەسەبىنەن جۇرگىزىلۋى ءتيىس نەمەسە جەرگىلىكتى بيلىك اتالمىش ماقساتتارعا قارجى ءبولىپ، قىزمەت كورسەتۋشى ۇيىمدى اۋىستىرۋى قاجەت»، - دەلىنگەن قالانىڭ تۇرعىن- ءۇي ينسپەكسياسىنىڭ حابارلاماسىندا.
سونىمەن قاتار، ورىن (پاتەر) يەلەرى كوندومينيۋم نىسانى بولىپ تابىلاتىن ورتاق مۇلكىن كۇردەلى جوندەۋ جۇمىستارىنا كەتەتىن قاراجاتتى جيناۋ ءۇشىن كوندومينيۋم نىسانىن باسقارۋشى ورگاننىڭ جيناق ەسەبىنە ورىن (پاتەر) يەلەرىنىڭ جينالىستارىندا انىقتالعان كولەمدە اي سايىن جارنا تولەپ وتىرۋى كەرەك.
ۆەدومستۆونىڭ مالىمەتىنشە، بۇگىنگى تاڭدا كەيبىر كوپپاتەرلى تۇرعىن ۇيلەردە الداعى جىلىتۋ ماۋسىمىنا دايىندىق كەزىندە جىلۋ الماستىرعىشتاردى اۋىستىرۋ بويىنشا پروبلەمالاردىڭ بارشىلىعىن ساراپتاما كورسەتىپ وتىر. تۇرعىندار جينالىستارعا قاتىسپاعاندىقتان، ولقىلىقتاردى جويۋعا جۇمسالاتىن تۇرعىنداردىڭ ۇلەسكەرلىك قارجىسى باياۋ جينالادى.
ءۇي ىشىندەگى ينجەنەرلىك جەلىلەرمەن، جابىندىلارمەن، قاسبەتتەرمەن بايلانىستى پروبلەمالار دا بار.
وسىعان بايلانىستى استانا تۇرعىندارىنا كوندومينيۋمداردى تىركەۋ كەرەكتىگى جايلى كەڭەس بەرىلەدى.
ەستەرىڭىزگە سالايىق، قالادا 2513 كوپپاتەرلى ءۇي بار. ولارعا 431 پ ي ك مەن قىزمەت كورسەتۋشى ۇيىمدار قىزمەت كورسەتەدى.
ايتا كەتۋ كەرەك، ءبىر وبەكتىنى، كوبىنە جىلجىمايتىن مۇلىكتى بىرلەسىپ يەلەنۋ؛ ءبىر اۋماقتى بىرنەشە مەملەكەتتىڭ بىرلەسىپ باسقارىلۋى كوندومينيۋم دەپ اتالادى.
