الماتىنىڭ گاندبولشى قىزدارى ەل چەمپيوناتىندا قارسىلاستارىنان باسىم ءتۇستى

استانا. قازاقپارات - الماتىنىڭ «دوستىق» سپورت كەشەنىڭدە گاندبولدان ق ر چەمپيوناتىنىڭ ەكىنشى تۋرى اياسىندا قىزدار اراسىنداعى جوعارى جانە سۋپەرليگا كوماندالاردىڭ ەكىنشى جانە ءۇشىنشى ويىندارى ءوتتى، دەپ حابارلايدى قازاقپارات قالالىق سپورت حابىنا سىلتەمە جاساپ.

جوعارى ليگادا ونەر كورەستىپ جۇرگەن الماتىلىق ۇجىم «سيەۆەر» كومانداسىمەن جولىعىپ، 36:23 ەسەبىمەن باسىم ءتۇستى. وتە تارتىستى ءارى قىزىقتى وتكەن ويىنعا جينالعان جانكۇيەرلەر الماتىلىقتاردىڭ قۋانىشتارىمەن ورتاقتاستى.

سونىمەن قاتار، سۋپەرليگادا وتكەن ويىندار دا ەل نازارىنان تىس قالمادى. «الماتى» مەن «استانا» كومانداسى ءبىرىنشى بولىپ باستاعان ويىندا 50 گول سوعىلىپ، كوپتەگەن ناتيجەسىز ساتتەر دە از بولمادى. ارسەن بەردىبەكوۆتىڭ شاكىرتتەرى 33:17 ەسەبىمەن استانالىقتاردى ۇتىپ وسى تۋرداعى ەكىنشى جەڭىسىنە كول جەتكىزىپ، العا شىقتى. ءبىرىنشى وتكەن كەزدەسۋدە الاڭ قوجايىندارى «التاي» كلۋبىن ۇتقان بولاتىن.

- بارلىق ويىنشىلارىم ناتيجەلى ويىندار كورسەتۋدە. ولار جانكۇيەرلەرىنە قۋانىش سىيلاپ، مەنىڭ نۇسقاۋلارىمدى ورىنداپ ءجۇر. مەن ريزامىن. الدا قيىن ويىندار كۇتىپ تۇر. بارلىعىن ۇتۋ كەرەك دەگەن ماقسات قويدىق. بيىل دا جەڭىسكە جەتۋىمىز كەرەك، - دەدى «الماتى» گ ك باپكەرى ارسەن بەردىبەكوۆ.

سونىمەن قاتار، ارسەن بەردىبەكوۆ جوعارى ليگاعا قاتىسىپ جۇرگەن جاس قىزداردان دا ءۇمىتى زور ەكەندىگىن ايتىپ ءوتتى. سەبەبى ولاردى بىلىكتى ماماندار دايىنداپ، بارلىعى دا كەلەشەكتە جاقسى ويىنشى بولاتىندىعىنا سەنىمدى.

ايتا كەتەر جايت، وسى ماۋىسىمدا جوعارى ليگادا 11، ال سۋپەرليگادا 6 قىزدار كومانداسى ونەر كورسەتۋدە. ەل چەمپيوناتىنىڭ ەكىنشى تۋرى وسى سەنبى كۇنى 21- قازان كۇنى اياقتالادى.