عالىمدار: ارتىق سالماقتىڭ ءار كەلىسى ادام ءومىرىن ەكى ايعا قىسقارتادى

استانا. قازاقپارات - عالىمدار ارتىق سالماقتىڭ ءار كەلىسى ادام ءومىرىن ەكى ايعا قىسقارتاتىنىن دالەلدەدى دەپ حابارلايدى Baq.kz.

ەدينبۋرگ ۋنيۆەرسيتەتىنىڭ گەنەتيك-عالىمدارى مەن ديەتولوگتارى ارتىق سالماقتىڭ ءار كەلىسى ادام ءومىرىن ەكى ايعا قىسقارتاتىنىن دالەلدەگەن.

عالىمدار 600 مىڭنان استام ادامنىڭ گەنەتيكالىق دەرەكتەرى مەن ەرەكشەلىكتەرىنە تالداۋ جۇرگىزگەن. ولار ونكولوگيالىق اۋرۋلار مەن جۇرەك اۋرۋلارىن تۋدىراتىن ىشىمدىك ءىشۋ نەمەسە تەمەكى شەگۋ سياقتى زياندى ادەتتەردەن باسقا ارتىق سالماقتىڭ ءوزى ادام ءومىرىن قىسقارتاتىنىن زەرتتەگەن.

ناتيجەسىندە، باسقا فاكتورلاردى ەسەپتەمەگەندە، ارتىق سالماقتىڭ ءار كەلىسى ءومىر ءسۇرۋ ۋاقىتىنىڭ ورتاشا جاسىن ەكى-ءتورت ايعا قىسقارتاتىنىن انىقتاعان.

ەگەر ادام ارتىق سالماعىنان بولەك كۇنىنە ءبىر قوراپ تەمەكى تارتاتىن بولسا، وندا ونىڭ ءومىر ءسۇرۋ ۇزاقتىعى 7-12 جىلعا قىسقارۋى مۇمكىن.

سول سەبەپتى سەمىزدىكتەن ارىلۋدىڭ جولدارىن دا قاراستىرعان ءجون.