ءابىليازوۆتىڭ سىبايلاستارى قازاقستانعا وزدەرى كەلدى - ۇلتتىق بيۋرو

استانا. قازاقپارات - حالىقارالىق ىزدەۋ جاريالانعان ءابىليازوۆتىڭ سىبايلاستارى ءوز ەرىكتەرىمەن قازاقستانعا ورالدى.

بۇل تۋرالى قازاقپارات سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ باسپا ءسوز قىزمەتىنە سىلتەمە جاساپ حابارلايدى.

ءابىليازوۆتىڭ سىبايلاستارى بولىپ سانالاتىن ب ت ا بانكىنىڭ 6№ كورپوراتيۆتىك بيزنەس باسقارماسىنىڭ بۇرىنعى زاڭگەرى ماكسيم حابلوۆ پەن ءابىليازوۆتىڭ باقىلاۋىنداعى كومپانيالاردىڭ شارتتى جەتەكشىسى انار ءابدىحايموۆا 2017-جىلى 16- قازاندا رەسەي فەدەراتسياسىنىڭ ماسكەۋ قالاسىنان قازاقستانعا ءوز ەرىكتەرىمەن كەلدى.

«ولارعا مۇحتار ءابىليازوۆتىڭ ۇيىمداسقان قىلمىستىق توبىنا ب ت ا بانكىنىڭ اقشالاي قاراجاتىن جىمقىرۋعا جاردەمدەستى دەگەن ايىپ تاعىلىپ وتىر. حابلوۆ پەن ءابدىحايموۆا رەسەيلىك ازاماتتىق العان جانە بۇل ولاردى قازاقستانعا ەكستراداتسيالاۋعا كەدەرگى كەلتىرەدى. ءبىراق ولار سىبايلاس جەمقورلىققا قارسى ءىس-قيمىل ۇلتتىق بيۋروسىنا حات جازىپ، قازاقستانعا ءوز ەرىكتەرىمەن كەلۋگە دايىن ەكەندىكتەرىن جەتكىزگەن. سىبايلاس جەمقورلىققا قارسى قىزمەت اتالعان جايت پەن ءىس بويىنشا جينالعان ماتەريالداردى ەسكەرە وتىرىپ، ولارعا قاتىستى بۇرىن تاعايىندالعان بۇلتارتپاۋ شارالارىن وزگەرتتى. وسىدان كەيىن حابلوۆ پەن ءابدىحايموۆا قازاقستانعا كەلدى»، - دەلىنگەن ۇلتتىق بيۋرو تاراتقان حابارلامادا.

تەرگەۋ ورگانىنىڭ مالىمدەۋىنشە، بۇعان دەيىن دە ب ت ا بانكىنىڭ اقشالاي قاراجاتىن جىمقىرۋ ءىسى بويىنشا بىرنەشە كۇدىكتى قازاقستانعا ءوز ەرىكتەرىمەن كەلگەن.

«بيىلعى شىلدە جانە قىركۇيەك ايلارىندا بۋداپەشت قالاسىنان (ماجارستان) ءابىليازوۆتىڭ كەزىندە پروبلەمالىق نەسيەلەر باسقارماسى باسشىسىنىڭ ورىنباسارى بولعان ەرجان قادەسوۆ جانە ب ت ا بانكىنىڭ 6№ كورپوراتيۆتىك بيزنەس باسقارما باسشىسىنىڭ بۇرىنعى ورىنباسارى زاۋرە ءجۇنىسوۆا قازاقستانعا ەرىكتى تۇردە كەلگەن ەدى.

ولار 2009-جىلدان بەرى ىزدەۋدە جۇرگەن جانە قازاقستانعا ورالعان سوڭ، بۇرىن تاعايىندالعان «قاماۋعا الۋ» بۇلتارتپاۋ شاراسى جەڭىلدەتىلدى. قازىرگى ۋاقىتتا جوعارىدا كورسەتىلگەن فيگۋرانتتاردىڭ قاتىسۋىمەن قاجەتتى تەرگەۋ امالدارى ءجۇرىپ جاتىر.

ولار ءوز ايىپتارىن تولىق مويىنداپ، ب ت ا اقشالاي قاراجاتتارىن ميللياردتاپ جىمقىرۋ، باقىلاۋداعى كومپانيالارعا زاڭسىز نەسيە بەرۋ جانە قىمبات اكتيۆتەردى ساتىپ الۋ ارقىلى ولاردىڭ ءىزىن جاسىرۋ جونىندەگى ءابىليازوۆ ارەكەتتەرىنىڭ زاڭعا قايشى ەكەنىن راستادى»، - دەپ حابارلادى ۇلتتىق بيۋرو.

ولار ءابىليازوۆتىڭ نۇسقاۋىمەن كومپانيالاردىڭ شارتتى جەتەكشىسى بولعان جانە قاجەتتى قۇجاتتارعا قول قويعان، دەپ اتاپ ءوتتى مەكەمە.

«سونداي-اق، ولار قىلمىستىق ءىس قوزعالعان سوڭ، بانك باسشىسىنا قارسى كۋالىك بەرۋدى بولدىرماۋ ماقساتىندا ءابىليازوۆتىڭ تاپسىرماسىمەن سىبايلاستارى بانك قىزمەتكەرلەرىن جانە باقىلاۋداعى كومپانيالاردىڭ باسشىلارىن قورقىتۋ جانە بوپسالاۋ جولىمەن قازاقستاننان شىعارۋدى ۇيىمداستىرعان. سول سەبەپتى ءابىليازوۆتىڭ كەزىندە ب ت ا بانكتە جۇمىس ىستەگەن كوپتەگەن قىزمەتكەر ەلدەن كەتۋگە ءماجبۇر بولعان. جىراقتا جۇرگەندە دە قورقىتىپ-ۇركىتۋلەر جالعاسىپ، ولاردىڭ قازاقستانعا ورالۋىنا مۇمكىندىك بەرمەگەن.

قازىرگى ۋاقىتتا جوعارىدا اتالعان تۇلعالارعا قاتىستى سوتقا دەيىنگى تەرگەۋ جالعاسۋدا، ولار تەرگەۋگە بەلسەنە كومەك كورسەتىپ، ءابىليازوۆتىڭ قىلمىستىق توبىنىڭ زاڭعا قايشى ءىس-ارەكەتتەرى تۋرالى جاڭا فاكتىلەردى اشتى»، - دەلىنگەن سىبايلاس جەمقورلىققا قارسى قىزمەتتىڭ حابارلاماسىندا.