20:59, 17 - قازان 2017 | GMT +5
جارتى ميلليون قازاقستاندىق تۇماۋعا قارسى ەكپە جاساتتى
استانا. قازاقپارات - جارتى ميلليونعا جۋىق قازاقستاندىق تۇماۋعا قارسى ەكپە جاساتتى.
بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ق ر دەنساۋلىق ساقتاۋ مينيسترلىگى قوعامدىق دەنساۋلىقتى ساقتاۋ كوميتەتىنىڭ ءتوراعاسى جانداربەك بەكشين ايتتى، دەپ حابارلايدى قازاقپارات ءتىلشىسى.
«قازىرگى ۋاقىتتا شامامەن 500 مىڭ ادام ەكپە جاساتتى. ولار نەگىزىنەن مەديتسينا قىزمەتكەرلەرى، جۇكتى ايەلدەر مەن بالالار. ال جۇمىس بەرۋشىلەر بولسا وزدەرىنىڭ 45 مىڭ قىزمەتكەرىنە تۇماۋعا قارسى ەكپە جۇرگىزدى»، - دەدى ول ب ا ق وكىلدەرىنىڭ ساۋالىنا وراي.
سونىمەن قاتار كوميتەت باسشىسىنىڭ دەرەگىنە سايكەس، شامامەن 10 مىڭ قازاقستاندىق ءوز قاراجاتتارىنا تۇماۋعا قارسى ەكپە جاساتقان.
«بۇگىنگى كۇنى تۇماۋ تيگىزۋ دەرەكتەرى تىركەلگەن جوق. اۋرۋدىڭ باستالۋى جەلتوقساننىڭ ورتاسىنا قاراي باستالادى دەپ كۇتۋدەمىز»، - دەدى جانداربەك بەكشين.
اۆتور: مارلان جيەمباي
