قاسىم-جومارت توقايەۆ ۆەتنام پارلامەنتىنىڭ باسشىسىمەن كەزدەستى

استانا. قازاقپارات - ۆەتنام ۇلتتىق جينالىسىنىڭ ءتورايىمى نگۋەن تحي كيم نگانمەن كەزدەسۋ بارىسىندا سەنات ءتوراعاسى قاسىم-جومارت توقايەۆ ۆەتنام پارلامەنتى باسشىسىنىڭ قازاقستانعا العاشقى رەسمي ساپارىنا قولداۋ ءبىلدىردى.

بۇل تۋرالى سەناتتىڭ باسپا ءسوز قىزمەتى حابارلادى.

ونىڭ ايتۋىنشا، ديپلوماتيالىق قاتىناستار ورناعان 25 جىلدا ءبىزدىڭ ەلدەرىمىز اراسىنداعى بارلىق سالاداعى، اسىرەسە، ساياسي جانە ساۋدا-ەكونوميكاداعى ىنتىماقتاستىق ءىس جۇزىندە دامي ءتۇستى. سونىمەن بىرگە، ەكى ەلدىڭ مۇمكىندىكتەرى مەن مۇددەلەرىنە ساي كەلەتىن ىنتىماقتاستىقتى ورىستەتۋ جونىندەگى اۋقىمدى جۇمىستار اتقارىلاتىن بولادى.

ەكىجاقتى ءوزارا ءىس-قيمىل تۋرالى ايتا كەلە، ق. توقايەۆ قازاقستاندا حالىقارالىق لوگيستيكالىق حاب قۇرۋعا باعىتتالعان ترانسقۇرلىقتىق ينفراقۇرىلىم جوبالارىنىڭ ىسكە اسۋىنا بايلانىستى ۆەتنام بيزنەسى ءۇشىن اشىلاتىن مۇمكىندىكتەرگە توقتالدى.

سەنات ءتوراعاسى ە ا ە و مەن ۆەتنام اراسىنداعى ەركىن ساۋدا تۋرالى كەلىسىمدى ىسكە اسىرۋ تۇرعىسىندا ءبىزدىڭ ەلدەرىمىز اراسىنداعى تاۋار اينالىمىن ودان ءارى ۇلعايتۋدىڭ كەلەشەگى زور ەكەنىن اتاپ ءوتتى.

استانادا وتەتىن الەمدىك جانە ءداستۇرلى دىندەر ليدەرلەرىنىڭ سەزىن شاقىرۋ جونىندەگى قازاقستاننىڭ تاجىريبەسى جانە وندا ءدىني جانە ساياسي قايراتكەرلەر قازىرگى زامانداعى اسا ماڭىزدى ماسەلەلەردى تالقىلايتىنى تۋرالى سەنات ءتوراعاسىنىڭ اقپاراتى مەيمانداردىڭ زور ىقىلاسىن تۋعىزدى.

ۆەتنام دەلەگاتسياسى باسشىسىنىڭ پىكىرىنشە، بۇل فورۋم ۇلتارالىق جانە ءدىنارالىق بەيبىتشىلىك جانە كەلىسىم جونىندەگى قازاقستان باسشىلىعىنىڭ جەمىستى ساياساتىنىڭ جارقىن كورىنىسى بولىپ تابىلادى. تاراپتار ەكى ەل اراسىنداعى ساۋدا، ءوزارا گۋمانيتارلىق ءىس-قيمىل، مادەني جانە تۋريستىك ساپارلار ماسەلەلەرىن تالقىلادى.