توقتار سەرىكوۆ تورەعاليدى اتاققا ماس بولماي، «جۇلدىز اۋرۋىنان» ساق بولۋعا شاقىردى
الايدا، تۋعان كۇنىن ايحايلاتىپ وتكىزگەن سەرىگە اعا بۋىن وكىلدەرىنىڭ ايتار اقىلى مەن كەڭەستەرى كوپ كورىنەدى. ماسەلەن، Stan.kz تىلشىسىنە ەكسكليۋزيۆتى سۇحبات بەرگەن توقتار سەرىكوۆ، تانىمال ءانشىنىڭ «جۇلدىز اۋرۋىنان» ساق بولۋىن ءوتىندى.
«اتاققا جەتۋ دە وڭاي دۇنيە ەمەس. ەڭ قيىنى ۇستاپ قالۋ عوي. قىراندا، شىرشىعادا ءبىر بيىكتە قالىقتاپ تۇرا بەرمەيدى. ونىڭ دا قاناتى تالادى، ولدا جەرگە قونادى. اتاقتى ۇستاپ تۇرۋدى ادامعا عانا اللا تاعالا سولاي جاساپ قويعان. ادامنىڭ ءوزى تايقىپ كەتەدى. شاراپقا ماس بولساڭ ەشتەڭە ەتپەس، ال اتاققا ماس بولساڭ ايىعۋ وتە قيىن. ەڭ جامان نارسە وسى» ، - دەيدى توقتار سەرىكوۆ.
اتاق، مانساپ، جۇلدىز اۋرۋى، تانىمالدىلىق! بۇل حالىقتىڭ جۇرەگىنەن ورىن العان ونەرپازعا عانا بۇيىراتىن باق! الايدا، تاعدىردىڭ تارتۋىن دەر كەزىندە ۇستاپ، حالىقتىڭ ماحابباتىنا ماڭگىلىك بولەنۋ ءۇشىن جوعارىداعى جەتىستىكتەر ازدىق ەتەتىن كورىنەدى. سوندىقتان، توقتار سەرىكوۆ تورەشتىڭ قاراپايىم قالپىنان تانباۋىن قالايدى.
«وسى اتاقتى ءوز بيىگىندە، ءوز دارەجەسىندە ۇستاپ قالۋ دەگەن ەرلىك. ناعىز ونەردىڭ يەسى سول. وسى اتاقتى ۇستاپ قالۋ ءۇشىن قاراپايىمدىلىق، يماندىلىق، ادالدىق، مارتتىك، مىقتىلىق، سابىرلىقتىڭ بارلىعى قوسىلعان كەزدە وسى اتاقتى ساقتاپ قالاسىڭ. ەگەر دە وسىنىڭ ىشىندە بىرەۋى كەم بولاتىن بولسا، اتاعىڭدا، بارلىعى جەرگە قۇلايدى. اتاق شاڭىراق سياقتى، ونى بىرنەشە ۋىق ۇستاپ تۇرادى» ، - دەيدى ءانشى سەرىكوۆ.
ءيا، وسىدان 15 جىل بۇرىن مۇنداي قوشەمەتكە مەيرامبەك پەن توقتاردا بولەنگەن ەدى. «ايحاي25»-تى دۇركىرەتىپ وتكىزگەن قوس جۇلدىز ءالى كۇنگە دەيىن حالىق نازارىندا بولۋدىڭ قۇپياسىمەن ءبولىستى.
«ءوزىمنىڭ جەكە باسىم ساقتاناتىن نارسەم ەلدىڭ سوزىنە قالماۋ. ءبىر جەردە ءوزىمنىڭ وسال تۇسىمدى كورسەتىپ قويماۋ. جانىم كۇيزەلىسكە ۇشىراپ، اۋىرىپ تۇرسامدا جىميىپ كۇلىپ، ول جاساندىلىق ەمەس. حالىقتىڭ كوڭىلىن قالدىرماۋعا تىرىسامىن. سەبەبى، حالىقتان اۋليە ەشكىم جوق. ءبىز دە ءدال وسى تورەعاليدىڭ دارەجەسىندە بولدىق. ول كەزدە جاس بولدىق، بۋىنىمىز قاتپاعان. كەرەمەت قىزدار عاشىق بولىپ، ارتىمىزدان جۇگىردى. سولاردىڭ بارلىعىن وكپەلەتكەن جوقپىز. شامامىز جەتكەنشە شىن اعالىق نيەتىمىزدى، دوستىق ىقىلاسىمىزدى ءبىلدىرىپ كەتتىك» ، - دەيدى اعالىق اقىلىن ايتقان توقتار سەرىكوۆ.
