قازاقستان-قىرعىزستان شەكاراسىندا زيانكەستەرمەن زاقىمدانعان جەمىستىڭ ءىرى كولەمى انىقتالدى
بۇل جايىندا ق ر اقپارات جانە كوممۋنيكاتسيالار مينيسترلىگىنەن ءمالىم ەتتى، دەپ حابارلايدى قازاقپارات.
قازاقستاننىڭ مەملەكەتتىك شەكاراسىنىڭ قىرعىز ۋچاسكەسىندە كەدەندىك، كولىكتىك، فيتوسانيتارلىق جانە ۆەتەرينارلىق باقىلاۋدى كۇشەيتۋ جونىندەگى جوسپارلى وپەراتسيا جالعاسۋدا. ماسەلەن، قازاننىڭ 10-17 ءسى ارالىعىندا قىرعىز تاسىمالداۋشىلارىنىڭ 835 كولىك قۇرالى تەكسەرىلدى جانە ولاردىڭ ءار سەگىزىنشىسىندە قازاقستاننىڭ كولىك زاڭناماسىن ورەسكەل بۇزۋ انىقتالدى. ناتيجەسىندە 5 ميلليون 644 مىڭ تەڭگە سوماسىنا اكىمشىلىك ايىپپۇل سالىندى.
فيتوسانيتارلىق باقىلاۋ كۇشەيتىلگەننەن باستاپ 127 جۇك كولىگى تەكسەرىلىپ، بۇزۋشىلىقتىڭ 20 فاكتىسى انىقتالدى. كەرى قايتارىلعان ءونىمنىڭ جالپى سالماعى 202 توننانى قۇرايدى. ءۇش فاكتى بويىنشا كومستوك سىمىرى، شىعىس جەمىس كوبەلەگى جانە ازيالىق جيدەك شىبىنى سىندى كارانتيندىك جاندىك انىقتالدى.
16- قازاندا جامبىل وبلىسىنا قاراستى قاراسۋ شەكارالىق باقىلاۋ بەكەتىندە قىرعىزستاننان كەلە جاتقان Volvo جۇك كولىگىندەگى 20,6 توننا جۇكتى (قۇرما، گرانات جانە ءجۇزىم) تەكسەرۋ بارىسىندا كومستوك سىمىرى زيانكەسى انىقتالدى. ءدال وسى كۇنى جامبىل وبلىسىنىڭ قورداي شەكارالىق وتكىزۋ بەكەتىندە شىمكەنتكە كەلە جاتقان Mercedes كولىگىندەگى 2,9 توننا كولەمىندەگى المانى تەكسەرۋ بارىسىندا شىعىس جەمىس كوبەلەگى تابىلدى.
سونىمەن قاتار 16- قازاندا جامبىل وبلىسىنىڭ قورداي اۋدانىنداعى بارىس ۋچاسكەسىندە الماتىعا اپارا جاتقان 3 توننا جۇزىمنەن ازيالىق جيدەك شىبىنى انىقتالدى. انىقتالعان بارلىق جەمىس-جيدەك قىرعىزستانعا كەرى قايتارىلدى. قىرعىزستان تاراپىنان فيتوسانيتارلىق تالاپتاردىڭ ءجيى بۇزىلۋى انىقتالعان جاعدايدا قازاقستاننىڭ فيتوسانيتارلىق قىزمەتى قىرعىزستاننان باقىلاۋعا جاتاتىن ونىمدەردى تاسىمالداۋعا جانە اكەلۋگە شەكتەۋ ەنگىزۋگە ءماجبۇر بولادى.
اۆتور: مارلان جيەمباي
