14:36, 17 - قازان 2017 | GMT +6
شىمكەنت اكىمى ءجۇرىپ كەتكەن اۆتوبۋستى جاياۋ قۋىپ جەتىپ الدى - ۆيدەو
استانا. قازاقپارات - شىمكەنت اكىمى عابيدۋللا ءابدىراحىموۆ ءوز قىزمەتكەرلەرىنە قىزمەتتىك كولىكتەن باس تارتىپ، قوعامدىق كولىكتىڭ تاۋقىمەتىن تارتۋدى تاپسىرعان بولاتىن.
ءوز سوزىنە ءوزى بەرىك بولۋى ءۇشىن قالا باسشىسى قوعامدىق كولىك قىزمەتىن تۇتىنۋ تۇرعىسىنان ۇلگى كورسەتۋدى باستاپ كەتتى.
«مەن ءوز اۆتوبۋسىما ءسال بولماعاندا كەشىگىپ قالا جازدادىم. مەن جەتىپ الامىن دەگەنشە اۆتوبۋس كۇتىپ تۇردى. تۇرىپ كەلگەنىمە قاراماستان اۆتوبۋس ماعان ىڭعايلى كورىندى. قانشاما جاستار وتىر، ولارعا قاراپ جاستىق شاعىم ەسىمە ءتۇستى»، - دەيدى اكىم.
ادام تولى اۆتوبۋسقا ءمىنىپ كەلگەن ءابدىراحىموۆ قالاعا اۋقىمى كەڭ اۆتوبۋستار كەرەك ەكەن دەگەن شەشىمگە كەلگەن. 10 مينۋتتا جۇمىسىنا جەتكەن اكىم ءوزىن ادەتتەگى قالالىق تۇرعىن سەكىلدى سەزىنىپ ۇلگەرگەن.
