وڭىرلەردەگى كومىر باعاسى بەلگىلى بولدى

استانا. قازاقپارات - بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ەنەرگەتيكا ءمينيسترى قانات بوزىمبايەۆ ەلىمىزدىڭ وڭىرلەرىندە كومىردىڭ ناقتى باعالارىن اتادى، دەپ حابارلايدى قازاقپارات.

«وبلىستاعى كومىردىڭ باعاسى كەن ورنىمەن اراداعى قاشىقتىق پەن كومىردىڭ جىلۋ ءبولۋ سيپاتتاماسىنا قاراي وزگەرىپ وتىرادى. ماسەلەن، شۇباركول كەن ورنىنىڭ كومىرى قاراعاندى وبلىسىنىڭ نۇرا اۋدانىندا 8 مىڭ بولسا، وڭتۇستىك قازاقستان وبلىسىندا 18 مىڭ تەڭگەگە جەتەدى. ءوندىرۋشى باعاسى تونناسىنا 5 مىڭ تەڭگە. مايكۇبەن كەن ورنىنىڭ كومىرى ەكىباستۇز قالاسىندا 8 مىڭ تەڭگە بولسا، وڭتۇستىك قازاقستان وبلىسىندا 16 مىڭ تەڭگەگە جەتەدى. ال ءوندىرۋشى باعاسى تونناسىنا 3200 تەڭگە»، - دەدى مينيستر.

 ونىڭ ايتۋىنشا، ءوندىرۋشىنىڭ باعاسى 3650 تەڭگەنى قۇرايتىن قاراجىرا كومىرى سەمەيدە 7 مىڭ بولسا، قوستانايدا 15500 تەڭگە جەتىپ جىعىلادى. ال ءوندىرۋشى باعاسى نەبارى 1680 تەڭگەنى قۇرايتىن بوگاتىر كومىرى پاۆلودار وبلىسىندا 7 مىڭنان، ال قوستاناي وبلىسىندا 9700 تەڭگەدەن ساۋدالانۋدا.

«جىلۋ بەرۋ ماۋسىمىندا كومىردىڭ قازاقستاننىڭ وڭىرلەرىنە كەدەرگىسىز جەتكىزىلۋىن قامتاماسىز ەتۋ ءۇشىن كومىر تاسۋ ءۇشىن قاجەتتى ۆاگوندارمەن قامتاماسىز ەتۋگە باقىلاۋدى كۇشەيتۋ، وبلىستاردىڭ، استانا مەن الماتى قالالارىنىڭ اكىمدەرى كوممۋنالدىق- تۇرمىستىق قاجەتتىلىك پەن حالىققا كومىردىڭ جەتكىزىلۋىنە ۇنەمى مونيتورينگ جاساۋ قاجەت دەپ ەسەپتەيمىن»، - دەدى بوزىمبايەۆ.

اۆتور: مارلان جيەمباي