قازاقستاندا كومىر تاپشىلىعى جوق - قانات بوزىمبايەۆ

استانا. قازاقپارات - قازاقستاننىڭ بارلىق وڭىرىندە كومىر تاپشىلىعى جوق. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ەنەرگەتيكا ءمينيسترى قانات بوزىمبايەۆ ايتتى، دەپ حابارلايدى قازاقپارات.

  «2017 -جىلدىڭ 9 ايىندا 75,3 ميلليون توننا كومىر ءوندىرىلدى. بۇل 2016 -جىلدىڭ سايكەس كەزەڭىمەن سالىستىرعاندا 13,2 پايىزعا ارتىق. ىشكى نارىققا  54,7  ميلليون توننا كومىر جەتكىزىلدى. ونىڭ 41,1 ميلليون تونناسى ەنەرگيا ءوندىرۋشى كاىسىپورىندارعا جونەلتىلدى. ەكسپورت 21,1 ميلليون توننانى قۇرادى. بۇل وتكەن جىلدىڭ سايكەس كەزەڭىمەن سالىستىرعاندا 16,6 پايىزعا كوپ. ءدال وسى كەزەڭدە كوممۋنالدىق- تۇرمىستىق قاجەتتىلىككە جانە حالىققا 1 ميلليوننان استام كومىر جەتكىزىلدى. بۇل وتكەن جىلدىڭ سايكەسىنشە كەزەڭدەگى دەڭگەيدەن 26,8 پايىزعا كوپ»، - دەدى مينيستر.

ونىڭ ايتۋىنشا، جىل سايىن جىلۋ بەرۋ ماۋسىمى كەزىندە كوممۋنالدىق- تۇرمىستىق قاجەتتىك پەن حالىققا سىرتقى اۋا تەمپەراتۋراسىنا بايلانىستى شامامەن 10-112 ميلليون تونا كومىر جەتكىزىلەدى. بۇل ساناتقا ارنالعان كومىردىڭ باعاسى كەن ورنىنا بايلانىستى 2,5 مىڭ تەڭگەنى قۇرايدى. قازىرگى ۋاقىتتا ەلىمىزدەگى كومىر وندىرەتىن كاسىپورىندار تۇراقتى جۇمىس ىستەپ، كومىر ءوندىرۋ كولەمىن ارتتىرا تۇسۋدە. «بۇگىنگى كۇنى ەلدە كومىر تاپشىلىعى جوق. قىركۇيەكتىڭ ورتاسىندا كۇننىڭ كۇرت سۋۋىنا بايلانىستى ورتالىق جانە سولتۇستىك وبلىستاردا كومىرگەن سۇرانىس ارتا ءتۇستى»، - دەدى ول.

ءمينيستردىڭ دەرەگىنشە، قازىرگى ۋاقىتتا اقمولا وبلىسىنىڭ ساۋدا نۇكتەلەرىندە 40-تان 700 تونناعا دەيىن، الماتى وبلىسىندا شامامەن 300 توننا، جامبىل وبلىسىندا 490،  سولتۇستىك قازاقستان وبلىسىندا 600،  وڭتۇستىك قازاقستان وبلىسىندا 20 مىڭ، استانادا شامامەن 1 مىڭ توننا كومىر بار.

 اۆتور: مارلان جيەمباي