گۇلزيرا ايداربەكوۆا كەلىنىن جىلدار بويى جاسىرۋىنىڭ سەبەبىن اشىپ ايتتى
گۇلزيرا ايداربەكوۆا العاش رەت كەلىنى جۇلدىزدى ەل كوزىنەن تاسادا ۇستاۋىنىڭ سەبەبىن اشىپ ايتتى. ول جەلىدەگى جازباسىندا قايراتتىڭ شىعارماشىلىعىن ءبىرىنشى ورىنعا قويعاندىقتان، جۇلدىزدى تانىتۋدى ەكىنشى جوسپارعا قالدىرعانىن مويىندادى.
الايدا ەشتەڭەگە قاراماستان، شاڭىراققا كەلىن بولىپ تۇسكەن كۇننەن باستاپ جۇلدىزدى ءوز قىزىنداي جاقسى كورگەنىن مالىمدەدى، دەپ جازادى Stan.kz.
«ءيا، راسىندا دا، ءبىز قايراتتىڭ جەكە ءومىرىن جاسىرىپ ۇستاۋدى، جەكە ءومىرى جونىندەگى اقپاراتتاردى قۇپيا ۇستاۋدى ءجون كوردىك. قازاق وتتىڭ باسىن، شاڭىراقتى كيە تۇتىپ، تۇنىعىن لايلاتپاعان. قايرات تا سول كيەلى شاڭىراقتىڭ باسى بولدى. جەكە ءومىردىڭ اتى جەكە ءومىر بولعاننان كەيىن قايرات تا جەكە ومىرگە كەلگەندە وڭاشالىقتى قالادى.
ونان كەيىنگى سەبەپ قايراتتىڭ جارى جۇلدىزدىڭ ماماندىعى - اكتريسا. ءبىز قايرات وتاۋ قۇرىپ، وتباسىن قۇرىپ جاتقان ۋاقىتتا قايراتپەن جۇمىس جاساپ، وعان ادەمى اندەر جازۋ ارقىلى تىڭدارمان جيناپ، جۇلدىزعا اينالۋى جولىندا قىزۋ قىزمەت ۇستىندە بولعانبىز. سوندىقتان، جۇلدىزدى ەكىنشى كەزەككە قويا تۇرۋعا تۋرا كەلدى. ەندى مەن بۇل ءۋاجدى پروديۋسسەر رەتىندە ايتىپ وتىرمىن.
ەڭ باستىسى قايراتتى حالىق شىعارماشىلىق ادامى رەتىندە تانيدى، سوندىقتان ونەر ادامى رەتىندەگى قىر-سىرىن عانا ساراپقا سالعان دۇرىس سەكىلدى. سول سەكىلدى جۇلدىز دا ونەردەن الىس ادام ەمەس. ۇيدە مەن ولاردى بالالارىم رەتىندە تاربيەلەگەنىممەن، شىعارماشىلىققا كەلگەندە ولارعا مەن پروديۋسسەر رەتىندە كاسىبي تۇرعىدا قارايمىن.
اللاعا شۇكىر، بۇگىنگى كۇنى قايرات تولىق شىعارماشىلىق ادامى رەتىندە قالىپتاسىپ ۇلگەردى. ەندى جۇلدىزدىڭ دا شىعارماشىلىق قارىم-قابىلەتىن كوپشىلىككە تانىستىرۋدى ارىپتەستەرىممەن بىرگە اقىلداسا وتىرىپ، ءجون كوردىك. مىنا فيلم دە وسى ءسوزىمنىڭ دامدەمەسى.
فيلم جونىندە قىسقاشا مالىمەت بەرسەم - فيلم قايراتتىڭ جەكە ءومىرى جونىندە ەكەن دەگەن سەكىلدى ويلاردى ەستىپ قالىپ ءجۇرمىز. الايدا، ولاي ەمەس! حالىقتان «قايرات ۇيلەنگەن با؟، ايەلىن نەگە جاسىراسىز، گۇل قۇشاقتاپ وتىرعانشا، نەمەرەلەرىڭىزدى قۇشاقتاپ وتىرمايسىز با؟»، دەگەن سياقتى اۋىر سوزدەردى ەستىدىم. سول كەزدە قايراتتىڭ جەكە ءومىرى جايلى فيلم تۇسىرەم، سول كەزدە كورەسىزدەر دەپ جاۋاپ بەرگەنمىن. راشيد سۇلەيمەنوۆ «ارمان» فيلمىنىڭ سەناريىن ۇسىنعاندا، كوپ ويلاندىم، قولىم بارمادى. وتباسىمىزبەن بۇل تاقىرىپتا فيلم تۇسىرۋگە قارسى بولدىق. ءتۇرلى ويلار سانامدى مازالادى.
ەل قالاي قابىلدار ەكەن؟ بۇكىل جۇرتقا 10 جىل جاسىرىپ كەلگەن كەلىنىمدى زورلاتىپ قويىپ قالاي ۇسىنام دەگەن ويلار مازا بەرمەدى. ءبىراق... تاۋەكەلگە بەل بۋىپ، قايراتىمنىڭ وتباسىن تۇسىرگەننەن مەن ەلگە، قوعامعا اسا ءبىر ماڭىزدى كومەك كەلتىرمەيتىنىمدى ءبىلىپ، وتباسىمىزبەن اقىلداسىپ، رەجيسسەرگە كەلىسىمىمىزدى بەردىك. ءبىر جاعىنان ماقساتىم كەلىنىم جۇلدىزدىڭ اكتەرلىق شەبەرلىگىن كورسەتۋ بولدى. دەگەنىمە جەتكەن سياقتىمىن.
وسى كۇندى 10 جىل بويى ارماندادىم. اقىلدى، سۇلۋ جۇلدىزىمدى بۇكىل ەلگە پاش ەتكىم كەلدى. 10 جىل بويى ءوزىمنىڭ تۋعان قىزىمداي تاربيەلەپ، قورعاشتاپ ءوسىردىم. ءبىزدىڭ شاڭىراقتىڭ تابالدىرىعىن اتتاعان كۇننەن باستاپ، جانىمنان ارتىق، جۇرەگىممەن جاقسى كوردىم. بار شىندىق وسى. ال، ەندى فيلمگە كەلەتىن بولسام، «ارمان/ كوگدا انگەلى سپيات» فيلمى قوعامداعى قاتەرلى دۇنيەلەردى، ادامشىلىقتان اسىپ كەتىپ، تالاي وتباسىن قان جىلاتقان، تاعدىردى تالقىعا سالىپ، پەندەنىڭ ومىرىمەن ويناعانداردى بۇكپەسىز، بوياماسىز اسپەتتەيتىن فيلم»، - دەيدى گۇلزيرا ۇسەن قىزى.
