وتاندىق فيلم وڭتۇستىك كورەياداعى حالىقارالىق بايقاۋدا باق سىناپ جاتىر

استانا. قازاقپارات - قازاق رەجيسسەرى اقان ساتايەۆتىڭ فيلمى پۋسان حالىقارالىق كينوفەستيۆالىنىڭ كونكۋرستىق باعدارلاماسىنا قاتىسىپ جاتىر.

 جاقىندا عانا «ول» تريللەرىنىڭ الەمدىك پرەمەراسى وتكەن ەدى. فيلم قالادا جالعىز ەمەس ەكەنىن تۇسىنەتىن مەگاپوليس تۇرعىندارى -  ايەل جانە ونىڭ قىزى تۋرالى. باستى كەيىپكەر ءرولىن ايسۇلۋ ازىمبايەۆا سومداعان.

 كينو «ازيا كينو تەاترىنا تەرەزە» بولىمىندە كورسەتىلەدى. وسى نوميناتسيا بويىنشا جۇلدەگە «ول» تريللەرىنەن باسقا 55 فيلم باقتارىن سىنايدى. قازاق كينوسىنىڭ پرەمەراسى ۇلكەن جەتىستىكپەن ءوتتى. پۋساندا وقيتىن قازاقستاندىق ستۋدەنتتەر الدىن الا كورسەتىلىمدە بولىپ، ءوز اسەرلەرىمەن ءبولىستى. ال حالىقارالىق قازىلار القاسىنىڭ مۇشەلەرى قالاي باعالاعانى 21 - قازان كۇنى پۋسان حالىقارالىق فەستيۆالىنىڭ جابىلۋ سالتاناتىندا بەلگىلى بولادى.

اقان ساتايەۆ، «ول» فيلمىنىڭ رەجيسسەرى:

-  جالپى تريللەر جانرىن جاقسى كورەمىن. بۇعان دەيىن وسى جانرداعى «جوعالعاندار» دەگەن فيلمىم بولعان ەدى. ياعني بۇل -  ەكىنشى تريللەرىمىز. مەن ادامنىڭ دەپرەسسياعا ۇشىراعانىن، ءوزىن جالعىز سەزىنۋى تاقىرىبىنداعى وقيعالاردى ءجيى ەستىپ جاتامىن. سوندىقتان بۇل وتە وزەكتى ماسەلە دەپ سانايمىن.

ايسۇلۋ ازىمبايەۆا، اكتريسا:

 -  بەدەۋلىك، مەديتسينالىق قاتەلىكتەر جانە بالانى جوعالتۋ -  بۇل ايەل ءۇشىن وتە قورقىنىشتى تاقىرىپ. دەگەنمەن كەز كەلگەن ادامنىڭ باسىنا ءتۇسۋى مۇمكىن. سوندىقتان ءبىز وسى كينوتۋىندى ارقىلى ءومىردى ارى قاراي جالعاستىرىپ، ماسەلەنى شەشۋدىڭ جولدارىن تابۋ كەرەك ەكەنىن كورسەتتىك دەپ ويلايمىن.

www.24.kz