باتىس قازاقستاندا وقۋشىعا قاسقىر شاپتى
قازتالوۆ اۋدانى اكىمىنىڭ الەۋمەتتىك ماسەلەلەر جانە ىشكى ساياسات بويىنشا ورىنباسارى ءزايلىم ماجيتوۆانىڭ ايتۋىنا قاراعاندا، 14 - قازاندا تاڭەرتەڭ 8 - سىنىپ وقۋشىسى قويلارى تۇرعان قوراعا بارعان.
«ول قوراعا كىرگەندە قاسقىردى كورگەن، الايدا بوتەن ءيت ەكەن دەپ ويلاعان. جىرتقىش بالاعا تاپ بەرگەن. الايدا ول قورانىڭ توبەسىنە شىعىپ ۇلگەرىپ، قۇتىلعان. ۇل بالا ۇلكەندەردى كومەككە شاقىرعان. وعان العاشقى مەديتسينالىق كومەك كورسەتىلدى. ساعات 8.40-تا جاسوسپىرىمدى جالپاقتال اۋداندىق اۋرۋحاناسىنا جەتكىزدى، سول جەردە وعان قۇتىرۋعا قارسى ەكپە سالىندى. قاسقىر جاسوسپىرىمنىڭ وڭ جاق سانىن قاۋىپ العان. قازىر ونىڭ جاعدايى ءبىرقالىپتى»، - دەدى ءزايلىم ءماجيتوۆا.
ونىڭ ايتۋىنشا، جىرتقىشتى جەرگىلىكتى تۇرعىندار اتىپ تاستاعان. «جىرتقىشتىڭ قاجەتتى مۇشەلەرى ساراپتاماعا جىبەرىلدى. ساراپتامانىڭ ناتيجەسى 10 كۇن ىشىندە بەلگىلى بولادى»، - دەپ اتاپ ءوتتى اۋداندىق اكىمدىكتەگىلەر.
اۆتور: جانىبەك امانگەلدى
