شىمكەنتتىك شەنەۋنىكتەرگە قىزمەتتىك كولىكپەن جۇرۋگە تىيىم سالىندى - فوتو، كەسكىن
اكىم ءبىر اي ۋاقىت ارالىعىندا قوعامدىق كولىكپەن ءجۇرۋ جونىندە تاپسىرما بەردى. بۇل تۋرالى قالا باسشىسى قوعامدىق كولىكتەر ماسەلەسى تالقىلانعان جينالىستا ايتتى، دەپ حابارلايدى قازاقپارات ءتىلشىسى.
قىزمەتتىك كولىكتەرمەن جۇرۋگە تىيىم قالا اكىمىنىڭ وزىنەن باستاپ ورىنباسارلارىنا، اپپارات جەتەكشىلەرىنە، ءبولىم باسشىلارىنا، قالاعا قاراستى اۋدان اكىمدەرى مەن ورىنباسارلارىنا، مەملەكەتتىك كوممۋنالدىق كاسىپورىندار مەن مەكەمەلەر جەتەكشىلەرىنە قاتىستى بولىپ وتىر. شاھار باسشىسى وسىلايشا ۇنەمدەلگەن اقشانى ورتا جانە قاتارداعى قىزمەتكەرلەرگە سىياقى بەرۋگە جۇمساماق. سەبەبى، قوعامدىق كولىكتەر ماسەلەسى قانشا ايتىلعانىمەن ونداعى پروبلەمالار شەشىلەر ەمەس.
عابيدوللا ءابدىراحىموۆ قاراماعىنداعى باسشىلارعا جۇمىس ورنىنا ءبىر اپتا بويىنا قوعامدىق كولىكتەرمەن كەلىپ كەتۋدى مىندەتتەدى. شەندىلەر وسى ءادىس ارقىلى اۆتوبۋستار مەن قوعامدىق كولىكتەردەگى كەمشىلىكتەردى كوزبەن كورىپ، انىقتاۋى ءتيىس بولادى. مەملەكەتتىك قىزمەتكەرلەر مەن قالا تۇرعىندارىنىڭ سىن ەسكەرتپەلەرى ارنايى كوميسسيانىڭ قاراۋىنا جىبەرىلمەك. ال، كەمشىلىكتەر جىبەرگەن، تارتىپكە باعىنباعان كولىك كومپانيالارى كوميسسيا قورتىندىسىنىڭ شەشىمىمەن جولاۋشى تاسىمالداۋ قىزمەتىنەن شەتتەتىلمەك. سونداي- اق، ولارعا قاتىستى ارىز شاعىمداردىڭ ناتيجەسىندە ارنايى رەيتينگى شىعىپ، قىزمەت كورسەتۋ ساپاسى ناشارلارىنا شارا قولدانىلادى، - دەدى شىمكەنت قالاسىنىڭ اكىمى.
شاھار باسشىسى سونىمەن قاتار قىزمەتكەرلەرىنە اكىمدىكتە مۇمكىندىگىنشە جينالىس جيىنداردى ازايتىپ، قاجەت بولعان جاعدايدا تەلەفون نەمەسە سەلەكتر سەكىلدى ەلەكتروندىق بايلانىس تۇرلەرىن قولدانۋدى تاپسىردى.
ال، تۇرعىنداردى وسى باعىتتاعى جۇمىستارعا بەلسەندى تۇردە اتسالىسۋعا شاقىردى. اتاپ ايتقاندا اۆتوبۋستار نەمەسە باعىتتاعى كولىكتەر تاراپىنان كەمشىلىكتەردى انىقتاعان جاعدايدا 545545 ءنومىرى ارقىلى call-ورتالىققا نەمەسە 77778858513+ نومىرىمەن WhatsApp جەلىسىنە، سونداي-اق اكىمدىكتىڭ Instagram جانە Facebook الەۋمەتتىك جەلىلەرىندەگى پاراقشالارعا حابارلاسىپ، جازىپ جىبەرۋلەرىنە بولادى.
