ەكسپو- دا ۇسىنىلعان جوبالار اقمولا وبلىسىندا جۇزەگە اسپاق
بۇل تۋرالى ايماق باسشىسى مالىك مىرزاليننىڭ توراعالىعىمەن وتكەن اپپاراتى كەڭەسىندە ايتىلدى، دەپ حابارلايدى قازاقپارات ءتىلشىسى اكىمدىكتىڭ باسپا ءسوز قىزمەتىنە سىلتەمە جاساپ.
كەڭەستە استانا قالاسىندا وتكىزىلگەن «ەكسپو-2017» حالىقارالىق كورمەسىنە ۇسىنىلعان اقمولا وبلىسىنىڭ جاڭا تەحنولوگيالارىن ءىس جۇزىندە قولدانۋ جانە 2017-2018 -جىلدارداعى جىلۋ بەرۋ ماۋسىمىنىڭ باستالۋى تۋرالى وبلىستىق ەنەرگەتيكا جانە تۇرعىن ءۇي- كوممۋنالدىق شارۋاشىلىق باسقارماسىنىڭ باسشىسى ۆيكتور رادچەنكو ەسەپ بەردى.
ونىڭ سوزىنشە، ماماندار «ەكسپو-2017» كورمەسىندە ەنەرگەتيكا جانە مۇنايگاز سالاسىندا ۇسىنىلعان 130 جاڭا تەحنولوگيالارمەن تانىسقان. ارناي قۇرىلعان جۇمىس توبى وسى جاڭا تەحنولوگيالاردىڭ ىشىنەن وڭىردە جۇزەگە اسىرۋعا ءتيىمدى دەگەن 5 جوبانى تاڭداپ العان. اقمولا وبلىسى ءۇشىن «جاسىل ەنەرگەتيكا» ەرەجەسى بويىنشا «قۇبىرسىز» گاز تارتۋ جوباسى ءتيىمدى.
«بۇل جوبا ەكونوميكالىق جانە ەكولوگيالىق جاعىنان ءتيىمدى»، دەدى ۆ. ن. رادچەنكو.
سونىمەن قاتار كەلەشەكتە ارشالى اۋدانىنىڭ قوستومار اۋىلىندا قۋاتى 100 م ۆ ت جەل ەلەكتر ستانساسى سالىناتىن بولادى. ال، «كوكشەتاۋ سۋ ارناسى» كوممۋنالدىق كاسىپورىنى يننوۆاتسيالىق جولمەن تۋربوگەنەراتوردى ىسكە قوسۋدى كوزدەپ جوسپارلاپ وتىر. تاعى ءبىر نوۋ- ناۋ ستەپنوگور قالاسىنداعى سۋ تازالاۋ نىسانىن جاڭعىرتۋ بولسا، ەندى ءبىرى «كوكشەتاۋ مينەرالدى سۋلارى» ا ق ەلەكترتاراتقىش جەلىسىندە كومپيۋتەرلىك باقىلاۋ تەحنولوگياسىن ەنگىزۋ كوزدەلگەن.
اپپارات كەڭەسىندە بيىلعى جىلۋ بەرۋ ماۋسىمى دا ءسوز بولدى. بيىل جىلۋ ماۋسىمى وبلىس بويىنشا ويداعىداي باستالدى. الا جازداي جىلۋ قازاندىقتارى، قۇبىرلار جوندەلىپ، وتىننىڭ قورى جاسالدى. ءالى دە بولسا وتىن قورى تولىقتىرىلىپ جاتىر.
جىلۋ بەرۋ ماۋسىمىنا قاتىستى وبلىس باسشىسى وبلىس اكىمى م. مىرزالين كوكشەتاۋ جانە ستەپنوگور قالالارىمەن بارلىق اۋدانداردىڭ اكىمدەرىن الەۋمەتتىك نىساندارعا جىلۋ بەرۋدىڭ تۇراقتى ءنورماتيۆىن ساقتاۋدى جانە تۇرعىنداردى سۋمەن، ەلەكتر قۋاتىمەن، جىلۋمەن ۇزدىكسىز قامتاماسىز ەتۋدى تاپسىردى.
سونىمەن بىرگە، بارلىق قالالار مەن اۋدانداردا وتىن قورىنا تولىق ەسەپ جۇرگىزۋ قاجەتتىگى ايتىلدى. بۇلاندى مەن بۋراباي اۋداندارىنىڭ اكىمدەرى بيىلعى جىلدىڭ 20 -جەلتوقسانىنا دەيىن مازۋتپەن جاعىلاتىن قازاندىقتار ءۇشىن سۇيىق وتىن ساتىپ الۋعا قاجەتتى قارجى كوزدەرىن ىزدەستىرۋ مىندەتى قويىلدى. وڭىردە جىلۋ بەرۋ ماۋسىمى قاتاڭ باقىلاۋعا الىناتىن بولدى.
