ومۋربەك بابانوۆ سايلاۋداعى جەڭىلىسىنە قاتىستى مالىمدەمە جاسادى
قىرعىزستاننىڭ ورتالىق سايلاۋ كوميسسياسىنىڭ مالىمەتىنشە، بابانوۆتى قىرعىزستاندىقتاردىڭ 33,74 پايىزى قولداعان.
«سايلاۋشىلارىمىزدىڭ نازارىن اۋدارعىم كەلەتىنى - ءبىز قىرعىزستاندا سايلاۋعا قاتىسىپ، ءوز باعدارلامامىزدى تانىستىرىپ، حالقىمىزعا ەلىمىزدى دامىتۋدىڭ نۇسقالارىن ۇسىنۋعا بولاتىنىن كورسەتە الدىق، - دەيدى ومۋربەك بابانوۆ.
- كىمنىڭ دۇرىس بولعانىن، كىمنىڭ بۇرىس بولعانىن ۋاقىت كورسەتەدى. ءبىز جەڭىسكە جەتتىك. ءبىزدىڭ جەڭىسىمىز - ول ءبىزدىڭ حالقىمىزدىڭ ساناسىن وزگەرتە الۋىمىزدا. ادامدار ءوز پىكىرىن ايتا الاتىنداي ولارعا سەنىمدىلىك بەردىك، وزىندىكى دۇرىس ەكەندىگىن زاڭدى تۇردە دالەلدەۋگە بولاتىنىن كورسەتتىك».
سونداي-اق، ومۋربەك بابانوۆ بيلىكتى باسىپ الۋ تۋرالى جوسپارى جوق ەكەنىن جانە ءوزىنىڭ جاقتاستارىنان ارانداتۋ مازمۇنىنداعى سوزدەرگە ەرىپ كەتپەۋىن سۇرادى. «سايلاۋشىلارىمنان مۇنداي ارانداتۋلارعا ەرىپ كەتپەۋىن سۇراعىم كەلەدى. «16 -قازاندا ساعات 12.00 دە الاڭدا جينالامىز» دەلىنگەن ارانداتۋ مانىندەگى حابارلاما الدىم. بۇعان ەرىپ كەتپەۋدى سۇرايمىن. مەن ەشقاشان بيلىكتى باسىپ العان ەمەسپىن، قازىر دە، بولاشاقتا دا بيلىكتى باسىپ الاتىن ويىم جوق. ءبىز ءوز جاقتاستارىمىزدىڭ قۇقىقتارىن تەك زاڭدى تۇردە قورعايتىن بولامىز. ءبىز ءالى جەڭىسكە جەتەمىز دەپ سەنەمىن. وسى سايلاۋ مەنى جانە مەنىڭ كوماندامدى بىرىكتىرىپ، ودان دا مىقتى ەتتى»، - دەدى بابانوۆ.
ال «جەڭىلىسىڭىزدى مويىندايسىز با؟» دەگەن سۇراققا ول بىلاي دەپ جاۋاپ بەردى:
«سايلاۋ ءوتتى. قورىتىندىسى شىقتى. سىزدەر «مويىندايسىز با؟» دەپ سۇراپ جاتسىزدار. نەگىزى زاڭدى تۇردە الىپ قاراعاندا مويىنداۋ دەگەن ءسوز جوق. سايلاۋدان وتكەندەر بولادى، بارلىعىنان كوپ داۋىس جيناعان ۇمىتكەر بولادى. سايكەسىنشە سول ادام سايلاۋدا جەڭىسكە جەتەدى». سونداي-اق، بابانوۆ نازاربايەۆپەن وتكەن كەزدەسۋگە قاتىستى پىكىر ءبىلدىردى.
«ول كەزدەسۋدە ءبىز تەك ءبىر ماسەلە جايىندا سويلەستىك: شەكاراداعى توسقاۋىلداردى الىپ تاستاۋ. قالعان ايتىلعانداردىڭ بارلىعى وسەك-اياڭ. ونى قالاي جەتكىزدى، نە دەپ ايتىپ جاتتى - ول سۇراقتاردىڭ بارلىعىن سول ادامدارعا قويىڭىزدار. نۇرسۇلتان ءابىش ۇلى تاعى دا كەزدەسكىسى كەلەتىنىن ايتسا، مەن وندا تاعى دا بارۋعا دايىنمىن. رەسەي، وزبەكستان پرەزيدەنتتەرىمەن كەزدەسۋگە دايىنمىن، سەبەبى بۇل مەنىڭ ەلىم ءۇشىن كەرەك»، - دەدى ومۋربەك بابانوۆ.
ەسكە سالا كەتەيىك، سوتسيال-دەموكراتيالىق پارتيانىڭ اتىنان شىققان سوورونباي جەەنبەكوۆ قىرعىزستانداعى پرەزيدەنت سايلاۋىندا 54,75 پايىز داۋىس جيناپ، جەڭىسكە جەتكەن بولاتىن. ال قىرعىز رەسپۋبليكاسىنىڭ ەكس-پرەمەر-ءمينيسترى ومۋربەك بابانوۆ 33,8 پايىز داۋىس جيناپ، ەكىنشى ورىن الدى. ءۇشىنشى ورىندا «بۋتۋن قىرعىزستان» پارتياسىنىڭ باسشىسى اداحان مادۋماروۆ - 6,47 پايىز داۋىس جيناعان.
Tengrinews.kz
