دەرەكتى فيلمدەر نە دەيدى؟
ءار سارسەنبىدە ەلىمىزدىڭ دەرەكتى كينو مەترلارى جانە جاس رەجيسسەرلەرىنىڭ ءتۇرلى تاقىرىپتا تۇسىرگەن تۋىندىلارى كوپشىلىك نازارىنا ۇسىنىلادى.
«قازاق دەرەكتى كينو كۇندەرى» دەپ اتالاتىن مادەني شارا ش. ايمانوۆ اتىنداعى «قازاق فيلم» كينوستۋدياسى، مادەنيەت جانە سپورت مينيسترلىگى جانە قازاقستان رەسپۋبليكاسىنىڭ تۇڭعىش پرەزيدەنتى - ەلباسى قورىنىڭ قولداۋىمەن العاش رەت ۇيىمداستىرىلىپ وتىر.
كينو مەرەكەسىنىڭ اشىلۋى سالتاناتىندا، جاقىندا عانا ەكاتەرينبۋرگ قالاسىندا وتكەن «رەسەي» دەرەكتى كينو فەستيۆالىندە قازىلار القاسى تاعايىنداعان «ءومىردى سۇيەتىن كەيىپكەردىڭ وبرازىن كورسەتە العانى ءۇشىن» اتتى جۇلدەسى «13 شاقىرىم» فيلمىنىڭ رەجيسسەرى ۆلاديمير تيۋلكينگە تابىستالدى.
وزىندىك سەبەپتەرمەن بۇل دەرەكتى فيلمدەر پروكاتقا شىقپايتىندىقتان، زاماناۋي قازاقستاننىڭ وزەكتى ماسەلەلەرى جونىندە باياندايتىن وتاندىق دوكۋمەنتاليستەردىڭ سوڭعى ەكى جىلدا تۇسىرگەن جۇمىستارىنىڭ ءارقايسىسى بىرەگەي تۋىندى سانالادى. «ويتكەنى جاقسى كورەمىن»، «تۇستەردىڭ ۇيلەسىمدىلىگى»، «نايري» اتتى فيلمدەر يدەياسى، تاقىرىبى جاعىنان ءبىر- بىرىنە ۇقسامايدى.
مىسالى، ك. بەردىمۇراتوۆا مەن ك. ابدەلدينوۆا تۇسىرگەن «ويتكەنى جاقسى كورەمىن» اتتى دەرەكتى فيلمدە ەلىمىزدەگى ۇلتارالىق قاتىناستار، ارالاس نەكە جايى جاس بۋىن وكىلدەرىنىڭ كوزقاراسىمەن باياندالادى. فيلمنىڭ بارلىق كەيىپكەرلەرى قازاقستاندا تۇرادى، ولاردىڭ نەكەسىنە سىن كوزبەن قارايتىندار كوپ بولسا دا، وزدەرى وتباسىندا شىن باقىتتى بولعاندىقتان، ءسوز بەن سىن سەزىم مەن ماحابباتتىڭ الدىندا ءالسىز. ال ەۆگەني لۋمپوۆتىڭ «تۇستەردىڭ ۇيلەسىمدىلىگى» فيلمى استانادا قۇرىلعان «قىزىل كادمي» شىعارماشىلىق ۇجىمىنىڭ جۇمىسىن كورسەتۋگە ارنالعان.
فيلم كەيىپكەرلەرى - جاس سۋرەتشىلەر. ەلىمىزدىڭ تۇكپىر- تۇكپىرىنەن كەلگەن سۋرەتشىلەر استانادا باس قوسقان. پاتەردە جۇرسە دە، جەكە شەبەرحاناسى بولماسا دا، ولار بەينەلەۋ ونەرىن ءداستۇر ساباقتاستىعىنان ءنار الا وتىرىپ ناسيحاتتايدى جانە ءبارى دە قىلقالام ونەرىندە جاڭالىق اشۋعا ۇمتىلعان جىگەرلى جاستار. قولبايلاۋ بولىپ جۇرگەن قات- قابات قيىندىقتاردى ەلەگىسى كەلمەيدى، سەبەبى ونەرگە دەگەن ىڭكارلىك، وتانىن سۇيگەن شەكسىز ماحابباتى بارىنەن بيىك تۇر.
ارميان ۇلتتىق- مادەني ورتالىعىنىڭ جانىنان قۇرىلعان «نايري» ءبي انسامبلى تۋرالى تولعاعان رەجيسسەر قايشا راحيموۆا كورەرمەنگە كوپ ۇلتتى ءبىر وتباسىنا اينالىپ كەتكەن ونەر ۇجىمىن ۇلگى ەتەدى. انسامبلدىڭ قۇرامىندا قازاقتار مەن تۇرىكتەر، ورىستار مەن ازەربايجاندار، ارمياندار مەن دۇڭگەندەر دە بار. ولاردى تابىستىرعان - ونەر ەكەنىن ايتادى. ءۇش ءفيلمنىڭ دە تاقىرىبى - وزەكتى، ءورىلۋى - وتكىر. ەركىن ويلى رەجيسسەرلەردىڭ بيىك تانىمىمەن قوعامداعى نازىك ماسەلەلەر قاز- قالپىندا شىنايى كورىنىس تاپقان. سول سەبەپتى بولار، مۇنداي تۋىندىلارمەن تانىسۋعا ستۋدەنتتەر، شىعارماشىلىق وكىلدەرى مولىنان جينالىپ، مادەني شارانى جاڭالىق رەتىندە باعالاپ، كەلەسى سارسەنبىنى اسىعا كۇتەتىندەرىن ايتىپ تارقاسىپ جاتتى.
ايگۇل احانباي قىزى، «ەگەمەن قازاقستان» الماتى
