ەلىمىزدەگى «جايىلىمدار تۋرالى» زاڭ نەلىكتەن ورىندالماي وتىر؟

استانا. قازاقپارات - پارلامەنت ءماجىلىسىنىڭ كوپ جىلداردان بەرگى دەپۋتاتى، اۋىل شارۋاشىلىعى سالاسىنىڭ بىلىكتى مامانى جەكسەنباي دۇيسەبايەۆ «جايىلىمدار تۋرالى» زاڭنىڭ نەگىزگى اۆتورلارىنىڭ ءبىرى بولعانىن ءبىز بۇرىن بىرنەشە رەت جازعانبىز.

الايدا قابىلدانعانىنا جارتى جىل وتسە دە وسى زاڭ ورىندالماي جاتىر. وسىعان بايلانىستى دەپۋتاتتىڭ پرەمەر-مينيستر باقىتجان ساعىنتايەۆتىڭ اتىنا جولداعان ساۋالىن بەرىپ وتىرمىز. قۇرمەتتى باقىتجان ءابدىر ۇلى، پارلامەنتتىڭ التىنشى شاقىرىلىمىنىڭ ءۇشىنشى سەسسياسىندا مەملەكەت باسشىسى قابىلدانعان زاڭداردىڭ ورىندالۋىن باقىلاۋ ىسىنە ايرىقشا نازار اۋداردى.

ارينە پارلامەنت قابىلداپ، ودان پرەزيدەنت بەكىتىپ قول قويعان ۋاقىتتان بيلىكتىڭ اتقارۋشى تارماعىنا جەتكەنشە جانە ولاردىڭ زاڭنامالىق نورماتيۆتىك- قۇقىقتىق قۇجاتتار قابىلداعانىنشا اجەپتاۋىر ۋاقىت وتەتىنىن جۇرتتىڭ ءبارى دە بىلەدى.

الايدا ولاردىڭ كەيبىرىنىڭ ورىندالۋىنىڭ شەكتەن تىس ۇزاق ۋاقىتقا سوزىلىپ كەتكەنىنە الاڭداۋشىلىق تۋىپ وتىر.

ماسەلەن، ءماجىلىس دەپۋتاتتارىنىڭ باستاماسىمەن ازىرلەنىپ، ۇزاق ۋاقىت تالقىلانىپ، قايناۋى جەتكەن وزەكتى ماسەلەنى زاڭنامالىق تۇرعىدان شەشۋگە تىرىسقان «جايىلىمدار تۋرالى» زاڭنىڭ قابىلدانعانىنا جارتى جىلدان ارتىق ۋاقىت وتسە دە ونىڭ ءالى كۇنگە ورىندالماي جاتقانىنا نە ايتۋعا بولادى؟

ۇكىمەتتىڭ جۇمىس رەگلامەنتىنىڭ تالاپتارىنا قاراساق، ورتالىق جانە جەرگىلىكتى اتقارۋشى ورگاندار زاڭنامالىق نورماتيۆتىك-قۇقىقتىق اكتىلەردى 2017 -جىلدىڭ ءساۋىر ايىنىڭ اياعىنا دەيىن قابىلداۋى كەرەك ەدى. سوعان قاراماي جەرگىلىكتى بيلىك ورىندارى اۋىلدىق وكرۋگتەر مەن اۋداندىق باعىنىستاعى قالالارعا قارايتىن جەرلەردىڭ اراسىنداعى جايىلىمداردى باسقارۋدىڭ جوسپارلارىن جاساپ، ونى ءماسليحاتتاردىڭ سەسسيالارىندا بەكىتپەگەنىن ءبىلىپ وتىرمىز. مۇنداي قۇجاتتار جاسالماسا، زاڭنىڭ نورمالارى ورىندالمايتىنى بەلگىلى.

قازىر رەسپۋبليكامىزدا 2548 اۋىلدىق وكرۋگ پەن اۋداندىق باعىنىستاعى قالالار بار، بۇگىنگى كۇنگە دەيىن سونىڭ 175 ىنە عانا اتالعان جوسپار جاسالعان نەمەسە ازىرلەنۋ ۇستىندە. بۇل 7-اق پايىز دەگەن ءسوز. «جايىلىمدار تۋرالى» زاڭ اۋىل تۇرعىندارى اراسىندا جايىلىم جەتپەگەندىكتەن تالاس تۋدىرىپ وتىرعان وتە وتكىر ماسەلەنى شەشىپ، مال باسىنىڭ وسۋىنە جاعداي تۋعىزۋىنا، مال شارۋاشىلىعى ءوندىرىسىن ارتتىرۋعا، اۋىل شارۋاشىلىعىنا ارنالعان جەرلەردىڭ توزۋىن توقتاتۋعا باعىتتالعانىنا قاراماستان، وسىنداي كۇي كەشىپ وتىر.

ايماقتارداعى اۋىل تۇرعىندارىمەن كەزدەسۋ بارىسىندا ءبىز ولاردىڭ «جايىلىمدار تۋرالى» زاڭدى، ونداعى وزدەرىنىڭ قۇقىقتارى مەن مۇمكىنشىلىكتەرىن بىلمەيتىندىگىنە كوزىمىزدى جەتكىزدىك. كوپتەگەن ب ا ق تا زاڭنىڭ ورىندالماي جاتقانىن كورسەتىپ ءجۇر. وسى ماسەلەلەردى ەسكەرە وتىرىپ، باقىتجان ءابدىر ۇلى، سىزدەن «جايىلىمدار تۋرالى» زاڭنىڭ ورىندالۋى ءۇشىن قاجەتتى شارالار جاساۋىڭىزدى سۇرايمىز».

جەكسەنباي دۇيسەبايەۆ، ءماجىلىس دەپۋتاتى