جىل سوڭىنا دەيىن دوللار باعامى قالاي وزگەرەدى؟
وسى ورايدا ساراپشىلار بۇل قادامنىڭ تەڭگەنى نىعايتا تۇسەتىنىن ايتىپ وتىر، دەپ جازادى LS.
قازاقستان قارجىگەرلەر قاۋىمداستىعىنىڭ باسقارۋشى ديرەكتورى پاۆەل افاناسيەۆتىڭ پىكىرىنشە، اتالعان سومانىڭ كونۆەرتاتسياسى ۇزاق ۋاقىتتى قاجەت ەتەدى.
«ءبىزدىڭ ەسەبىمىز بويىنشا، قازاقستان قور بيرجاسىنداعى ورتاشا ساۋدا كولەمى بيىل كۇن سايىن شامامەن $134 ميلليوندى قۇرايدى. بۇل دەگەنىڭىز، ۇلتتىق بانكتىڭ نارىققا ءجۇز پايىز قاتىسۋى كەزىندە اتالعان 1 ميلليارد دوللاردى ءبىر- اق اپتادا ساتىپ جىبەرۋگە بولادى دەگەندى بىلدىرەدى. بۇل ءوز كەزەگىندە كۋرسقا ريەۆالۆاتسيالىق قىسىم كورسەتەدى. جىل سوڭىنا دەيىن قازىر 54 جۇمىس كۇنى بار. دەمەك كۇنىنە شامامەن 18,5 ميلليون دوللاردان ساتۋ كەرەك. ال بۇل سوما بيىلعى ساۋدانىڭ تەك 14 پايىزىن عانا قۇرايدى. كەز كەلگەن ەلدىڭ ورتالىق بانكى قاتتى قۇبىلمالى كەزدە كۋرستى ءبىرقالىپتى ۇستاپ وتىرۋعا تىرىسادى. سونىمەن قاتار، نارىقتا دوللاردى ساتۋشى وزگە دە قاتىسۋشىلاردىڭ بولاتىنىن دا ەستەن شىعارماۋ كەرەك»، دەيدى ساراپشى.
افاناسيەۆتىڭ ايتۋىنشا، جىل سوڭىنا قاراي 1 دوللار 344,5 تەڭگە اينالاسىندا بولادى. بۇل بولجام قىركۇيەكتىڭ ورتاسىنداعى ساۋالناما ناتيجەسىنەن الىنىپ وتىر. ول كەزدە دوللار باعامى قازىرگىدەن ارزان بولعان ەدى.
«ال كەي ساراپشىلار مۇناي نارىعىنداعى جايلىلىق پەن ۇلتتىق بانكتىڭ بازالىق مولشەرلەمەنى بۇرىنعى دەڭگەيىندە ساقتاپ قالۋى جىل سوڭىنا قاراي تەڭگەنىڭ نىعايۋى مۇمكىندىگىن العا تارتادى»، دەيدى قارجىگەرلەر قاۋىمداستىعىنىڭ وكىلى.
ءوز كەزەگىندە تاۋەلسىز ساراپشى الەكساندر يۋريننىڭ ايتۋىنشا، ۇلتتىق بانكتىڭ 1 ميلليارد دوللاردى ساتۋعا ەشقانداي دا مۇقتاجدىق جوق. ونىڭ ۇستىنە مۇنداي شارا تۇراقتى تۇردە جۇرگىزىلىپ كەلەدى.
«ۇلتتىق بانك جالپى ءوزىنىڭ جۇمىستارى تۋرالى تەرەڭ مالىمەت بەرمەيدى. ال بۇل جولعى جوسپارىمەن ءبولىسۋى ادەتتەن تىس. مۇمكىن، بۇل جولى ۇلتتىق بانك «اۋىزشا ينتەرۆەنتسيا» جاسالعالى وتىر»، دەيدى ساراپشى.
«بيىلدىققا ۇلتتىق بانكتىڭ دوللاردى ساتۋ كولەمى 200 ميلليون دوللاردان اسقان جوق. ال بىردەن 1 ميلليارد دوللار ساتۋ تەڭگەنىڭ كۇرت كوتەرىلۋىنە الىپ سوعۋى ىقتيمال»، - دەيدى.
