باس پروكۋراتۋرا ەلەكتروندىق فورمات قىلمىستىق پروتسەسكە نە بەرەتىنىن ءتۇسىندىردى

استانا. قازاقپارات - پارلامەنت ماجىلىسىندە ق ر باس پروكۋرورىنىڭ ورىنباسارى مارات احمەتجانوۆ ءىس جۇرگىزۋدى ەلەكتروندىق تارتىپكە كوشىرۋ جايىندا ايتىپ بەردى، دەپ حابارلايدى قازاقپارات.

«زاڭ جوباسىنا سيفرلاۋدى ەنگىزدىك. ەندى ءىستى ەلەكتروندىق تۇردە جۇرگىزۋگە بولادى. بۇل نە ءۇشىن قاجەت؟ الدىمەن، سيفرلى فورمات ادامنىڭ قۇقىعىن قورعاۋدى نىعايتادى. سەبەبى بارلىق پروتسەسس الاقانداعىداي كورىنىپ تۇرادى. باستىسى - سوت پەن پروكۋروردىڭ باقىلاۋى ارتادى. ەندى جاسىرۋ، جالعان قۇجات جاساۋ دەگەن مۇمكىن ەمەس. سونىمەن قاتار سىبايلاس جەمقورلىق پەن قىزمەت بابىن تەرىس پايدالانۋ فاكتىلەرى دە ازايادى. بۇل - سيفرلاندىرۋدىڭ ەڭ باستى ماقساتى»، - دەدى م. احمەتجانوۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىقتىق قورعاۋ قىزمەتىنىڭ پروتسەستىك نەگىزدەرىن جاڭعىرتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرۋ بارىسىندا.

ونىڭ سوزىنە قاراعاندا، اتالعان فورمات سالاداعى ۇدەرىستى ءتيىمدى ءارى قولايلى ەتەدى.

«ەلەكتروندى ءىس جۇرگىزۋگە كوشكەن كەزدە ءبىراز ۇيىمداستىرۋ شارالارى جويىلادى. ءبىر جاپىراق قۇجات الۋ ءۇشىن قازىرگى تارتىپكە ساي ءۇش تاۋلىك وتەدى، ال ەندى سونىڭ بارلىعىن ءبىر ساعاتتا ۇيىمداستىرۋعا بولادى. بۇل رەتتە تەرگەۋشىنىڭ ۋاقىتىن ۇنەمدەيدى، اسا اۋىر قىلمىستارعا كوبىرەك نازار اۋدارۋعا مۇمكىندىك بەرىلەدى»، - دەدى ول.

م. احمەتجانوۆتىڭ ايتۋىنشا، ق ر ىشكى ىستەر مينيسترلىگىمەن جانە قارجى مينيسترلىگىمەن بىرلەسە قاناتقاقتى جوبا ىسكە اسىرىلۋدا. وسى ورايدا 400 دەن استام ءىس ەلەكتروندى فورماتتا اياقتالدى. سوتتار 200 ەلەكتروندى سانكسيا بەردى.

«ءى ت- جۇيەنى پروكۋراتۋرادا جاسادىق. بيۋدجەتتەن ەشقانداي قارجى تالاپ ەتكەن جوقپىز. بۇل باعىتتاعى شارالار بارلىق قىلمىستىق پروتسەستى تولىق قامتيدى، ياعني قىلمىستىق تىركەۋدەن باستاپ، سوتقا دەيىنگى تەرگەۋدى جانە جازانىڭ ورىندالۋى ۇدەرىسىن ەسكەرەدى»، - دەدى باس پروكۋروردىڭ ورىنباسارى.

اۆتور: رۋسلان عابباسوۆ