سپورت جاناشىرلارى الەم چەمپيوناتىنىڭ كۇمىس جۇلدەگەرىنە كولىك مىنگىزدى - فوتو

استانا. قازاقپارات - كەشە تالدىقورعان قالاسىندا كونفەدەراتسيا كۋبوگىنىڭ «ا» توبىنىڭ ىرىكتەۋ كەزەڭى مارەسىنە جەتتى، دەپ حابارلايدى قازاقپارات ءتىلشىسى.

وندا الماتى، پاۆلودار، باتىس قازاقستان جانە اتىراۋ وبلىستارى سىنعا ءتۇستى. سايىستىڭ اشىلۋ سالتاناتىنا كۇش قولدانىلاتىن سپورت تۇرلەرى جانە الماتى وبلىسىنىڭ باسشىلارى قاتىستى.

ءوز جەرىندە الماتى وبلىسى ەركىن جانە گرەك-ريم كۇرەسى مەن تاەكۆوندودان قارسىلاس شاق كەلتىرمەي، كونفەدەراتسيا كۋبوگىنىڭ فينالىنا جولداما الدى.

ايتا كەتۋ كەرەك، الماتى وبلىسى قۇراماسى تاجىريبەلى سپورتشىلاردان قۇرالعان. مىسالى 2017-جىلعى فرانسيا استاناسىندا وتكەن الەم چەمپيوناتىنىڭ كۇمىس جۇلدەگەرى دەمەۋ جادىرايەۆ جانە ازيا ويىندارىنىڭ 2 دۇركىن جەڭىمپازى نۇرماحان تىناليەۆ بار.

كونفەدەراتسيا كۋبوگى دوداسىنىڭ اياسىندا سپورت جاناشىرلارى مەن كاسىپكەرلەر الەم چەمپيوناتىنىڭ كۇمىس جۇلدەگەرى دەمەۋ جادىرايەۆقا كولىكتىڭ كىلتىن تابىس ەتتى.

دزيۋدو كۇرەسىنىڭ جارىستارى دا وتە تارتىستى ءوتتى. اقتىق سىندا پاۆلودار مەن اتىراۋ قۇرامالارى سىنعا ءتۇسىپ، اتىراۋ وبلىسى 3:2 ەسەبىمەن جەڭىسكە جەتتى.

ەندى اقتىق كەزەڭ 2-3- جەلتوقسان كۇندەرى الماتى قالاسىنداعى «بالۋان شولاق» سپورت كەشەنىندە وتەدى.

ەستەرىڭىزگە سالا كەتەيىك، سايىستىڭ جالپى جۇلدە قورى 125 ميلليون تەڭگە.

اۆتور: كۇنسۇلتان وتارباي