باتىس قازاقستان تەاترىنىڭ جاڭا ماۋسىمى «شىعىستىڭ شەرلى ماحابباتىمەن» اشىلدى - فوتو
قويىلىمدى قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى، رەجيسسەر، پروفەسسور تۇڭعىشباي ءال-تارازي ساحنالادى. سۋرەتشىسى - مۇرات مامبەتوۆ. سپەكتاكلدى تەاتر ارتىستەرى قوس قۇرامدا وينايدى. باستى رولدەر فارحادتى جىلقىباي جۇباتوۆ پەن جاسقايرات ۆاليۋلليەۆ، مەحمەنەبانۋدى اقمارال اماندىقوۆا مەن نارگيز شادىيەۆا سومدادى. سونداي-اق قازاقستاننىڭ ەڭبەك سىڭىرگەن قايراتكەرلەرى ەربول ەسەندوسوۆ، گۇلجيان شىنتەمىر، «دارىن» مەملەكەتتىك جاستار سىيلىعىنىڭ يەگەرى اسەل مامبەتوۆا، ق ر مادەنيەت سالاسىنىڭ ۇزدىگى تەمىرجان ماتايەۆ جانە باسقا تەاتر اكتەرلەرى وينايدى.
اق جايىق جۇرتشىلىعى تۇركى حالىقتارىندا «جەتى عاشىقتىڭ» ءبىرى رەتىندە قۇرمەتتەلەتىن فارحاد- شىرىننىڭ ماحابباتىن باياندايتىن تەرەڭ ءپالساپالىق ءمانى بار قويىلىمدى جىلى قابىلدادى. پرەمەرا سوڭىندا ب ق و مادەنيەت، ارحيۆتەر جانە قۇجاتتاما باسقارماسىنىڭ باسشىسى قادىربولات مۇساعاليەۆ كەزىندە بۇل قويىلىمدى ساحنالاۋعا ءقازىر باتىسقازاقستاندىق تەاتر ەسىمىن يەلەنىپ جاتقان ك س ر و حالىق ءارتىسى، مەملەكەتتىك سىيلىقتىڭ لاۋرەاتى حاديشا بوكەيەۆانىڭ اتسالىسقانىن، مەحمەنەبانۋدى ءوزى دە سومداپ، حالىق سۇيىسپەنشىلىگىنە بولەنگەنىن اتاپ ءوتتى. تۇڭعىشباي ءال- تارازي دا جاڭاشا ساحنالانعان بۇل قويىلىمدى بيىل 100 جىلدىعى تويلانعان اتاقتى اكتريسانىڭ رۋحىنا ارنايتىنىن جەتكىزدى.
ايتا كەتەيىك، دراما وقيعاسى تومەندەگىشە ءوربيدى. ءسىڭلىسىن ايىقپاس اۋرۋدان الىپ قالۋ ءۇشىن سۇلۋلىعىن قۇرباندىققا شالعان شىعىس پاتشايىمى مەحمەنەبانۋ شىرىنداي اياۋلىسى ەكەۋى ءبىر شەبەرگە عاشىق بولىپ قالامىز دەپ مۇلدە ويلاعان جوق. تۋعان سىڭلىسىنە دەگەن باۋىرمالدىق ماحابباتى سۇيگەن جانىنا دەگەن عاشىقتىعىمەن ارپالىسىپ، اياۋسىز ازاپقا تۇسكەن مەحمەنەبانۋ فارحاد شەبەردى اسا قيىن سىناققا سالدى - ادامدار اسا مۇقتاج بولىپ وتىرعان وزەن سۋىن بوگەگەن جارتاستى جولدان الىپ تاستاۋدى شارت قىلدى. كەڭ جۇرەگىنە شىرىنىنا دەگەن عاشىقتىعىن عانا ەمەس، حالقىنا دەگەن ماحابباتىن دا سىيعىزا العان فارحادقا تاق تا، تاۋ دا كەدەرگى بولا المايدى.
