استانادا اكەلەر فورۋمى ءوتتى
فورۋمعا پارلامەنت دەپۋتاتتارى، قوعام قايراتكەرلەرى، حالىقارالىق جانە ۇكىمەتتىك ەمەس ۇيىمداردىڭ وكىلدەرى، سونداي- اق، ەلوردا مەكتەپتەرىنىڭ بەتكە ۇستار وقۋشىلارى قاتىستى.
بيىل شارا ەركىن فورماتتا وتكىزىلگەن بولاتىن. قاتىسۋشىلار ءوزىن قىزىقتىرعان سۇراققا بىردەن جاۋاپ الدى.
«ءبىز وزەكتى دەگەن بىرنەشە ماسەلەنى كوتەردىك. بۇل - وسكەلەڭ ۇرپاققا تاربيە بەرۋ پروبلەماسىمەن، اكەلەردىڭ بالا تاربيەسىنە قاتىسۋىمەن، جاڭا تەحنولوگيالاردىڭ بالالاردىڭ دامۋىنا اسەر ەتۋىمەن بايلانىستى سۇراقتار. ءبىزدىڭ باستى ماقساتىمىز - تاربيە سالاسىنداعى بىلىممەن، تاجىريبەمەن ءبولىسۋ» ، - دەدى فورۋم بارىسىندا ءسوز سويلەگەن استانا قالاسى ءبىلىم بەرۋ باسقارماسى جەتەكشىسىنىڭ ورىنباسارى دۋلات جەكەبايەۆ.
كەزدەسۋ بالالاردى تاربيەلەۋ ىسىندەگى اكەلەردىڭ مارتەبەسى مەن جاۋاپكەرشىلىگىن جوعارىلاتىپ، وتباسىلىق قۇندىلىقتاردىڭ دامۋى مەن نىعايۋىنا سەپتىگىن تيگىزدى. اكەلەر وداعىنىڭ ءتوراعاسى قۋانىش جۇماتايەۆتىڭ اتاپ وتۋىنشە، تاجىريبە جۇزىندە وتكىزىلەتىن مۇنداي فورۋمدار اكەلەر ءۇشىنعانا ەمەس، انالار ءۇشىن دە ماڭىزدى.
«بۇگىنگى كۇنى ءبىزدىڭ وداقتا 17 بەلسەندى اكە بار. الايدا ەل بويىنشا قاتارىمىزداعى اكەلەردىڭ سانى بۇدان بىرنەشە ەسە ارتىق. رەسپۋبليكانىڭ 8 قالاسىندا ءبىزدىڭ وداقتىڭ وكىلدەرى بار. قازىر ءبىز 15 مىڭعا تارتا ادامدى قامتىپ وتىرمىز. ولار ءبىزدى بىلەدى دە، قولدايدى دا» ، - دەدى قۋانىش جۇماتايەۆ.
قالالىق اكەلەر فورۋمى ءبىلىم بەرۋ باسقارماسىمەن 2015 -جىلدان وتكىزىلىپ كەلەدى. ونى وتكىزۋ جونىندەگى نەگىزگى يدەيا وسىدان 5 جىل بۇرىن استانا قالاسىنىڭ №59 مەكتەپتىڭ بازاسىندا تۋعان ەدى.
