موڭعوليا قازاعى مينيستر بولىپ تاعايىندالۋى مۇمكىن - شەتەلدەگى قازاق ءتىلدى ب ا ق- قا شولۋ
وتاندىق «كومپوزيتور» فيلمىنىڭ قىتاي جەرىندەگى ءتۇسىرىلىمى باستالدى - «جەنمين جيباو» (People Daily)
قىتايدىڭ يان- ان قالاسىندا قازاقستان مەن قىتاي بىرىلەسىپ تۇسىرەتىن «كومپوزيتور» اتتى كوركەم فيلمىنىڭ ءتۇسىرىلىم جۇمىسى باستالدى. وسىعان وراي سالتاناتتى ءراسىم ءوتتى، دەپ حابارلايدى kazakh.people.com سايتى.
اتالعان سايتتىڭ جازۋىنشا، فيلمدى ش. ايمانوۆ اتىنداعى «قازاقفيلم» كينوستۋدياسى مەن قىتايلىق «Shineworks Pictures» جانە «China film coproduction corporation» كومپانيالارى بىرلەسىپ تۇسىرەدى.فيلمنىڭ قىتاي جەرىندەگى ءتۇسىرىلىمىنىڭ باستالۋىنا وراي وتكەن شاراعا فيلم وندىرىسىمەن شۇعىلدانىپ جاتقان ەكى ەلدىڭ كينوكومپانيالارىنىڭ وكىلدەرى قاتىسقان.
«بۇل «كومپوزيتور» اتتى كوركەم فيلمگە قوس كومپوزيتور باقىتجان بايقاداموۆ پەن سي سينحايدىڭ دوستىعى ارقاۋ ەتىپ الىنعان. فيلمدە سوعىس جىلدارىنداعى ازاپتى كۇندەردە دوستىق ورناتقان ەكى تۇلعانىڭ جان تەبىرەنتەرلىك حيكاياتتارى باياندالعان. ياعني، ومىردە بولعان وقيعانىڭ ىزىمەن تۇسىرىلمەك. سي سينحاي 1941 -جىلى رەسەي جەرىندە جۇرگەن كەزىندە ەكىنشى دۇنيەجۇزىلىك سوعىس باستالىپ، ونىڭ وتانعا ورالۋى كەدەرگىگە ۇشىرايدى. سودان ول الماتى قالاسىنا كەلەدى. ەشقانداي تانىسى جوق، قيىن - قىستاۋ كەزىندە باقىتجان بايقاداموۆ وعان جاردەم بەرىپ، قىتاي - قازاقستان حالقىنىڭ دوستىق تاريحىنىڭ تىڭ پاراعىن اشادى» ، - دەپ جازادى اتالعان دەرەككوز.
ەسكە سالا كەتەيىك، فيلمنىڭ 80 پايىزى الماتىدا، ال جيىرما پايىزى قىتايدا تۇسىرىلەتىنى جانە مونتاجداۋ، كومپيۋتەرلىك گرافيكا جاعىمەن تولىقتاي قىتاي تاراپى اينالىساتىنى وسىعان دەيىن ب ا ق- تا جاريالانعان بولاتىن. سي سينحاي - قىتاي حالىق رەسپۋبليكاسىنىڭ حالىق كومپوزيتورى اتاعىنا يە بولعان، قىسقا عانا عۇمىرىندا 300 دەن اسا شىعارمالار تۋدىرعان دارا تالانت يەسى. ەكىنشى دۇنيەجۇزىلىك سوعىس كەزىندە ساياسي قۋعىن- سۇرگىن كورگەن ول ءومىرىنىڭ سوڭعى جىلدارىن قازاقستاندا وتكىزگەن. قازاقتىڭ كورنەكتى كومپوزيتورى باقىتجان بايقاداموۆپەن دوس بولعان. دۇرىسى، سي سينحايدى باقىتجان بايقاداموۆ اشتىق، قايىرشىلىق كۇيدەن قۇتقارعان، قايتادان شىعارماشىلىق ورتاعا ورالۋىنا سەپتىگى تيگەن.
موڭعوليا قازاعى مينيستر اتانۋى مۇمكىن - kaznews.mn
موڭعوليانىڭ جاڭادان جاساقتالعان ۇكىمەتىنىڭ مينيسترلەر كابينەتىنە بايان- ولگي ايماعىنان پارلامەنتكە سايلانعان دەپۋتات بادەلحان قابدىسىلام ۇلى ەنۋى مۇمكىن. بۇل تۋرالى kaznews.mn اقپاراتتىق پورتالى حابارلاپ وتىر.
دەرەككوز مالىمەتىنشە بادەلحان قابدىسىلام ۇلى جاڭا جاساقتالعان ۇكىمەتكە قۇرىلىس جانە قالا قۇرىلىسى ءمينيسترى لاۋازىمىنا تاعايىندالماق.
«موڭعوليا قازاقتارىنان 21 جىل بۇرىن ينفراقۇرىلىم ءمينيسترى لاۋازىمىن ساندالحان رازدىق ۇلى اتقارعان بولاتىن. بۇدان كەيىن ۆيتسە- مينيستر لاۋازىمىنا بىرنەشە ساياساتكەرلەر تاعايىندالىپ وتىرعانىمەن، مينيستر لاۋازىمى ەشبىر قازاققا بۇيىرعان جوق. بادەلحان قابدىسىلام ۇلى بۇعان دەيىن بايان- ولگەي ايماعىنىڭ اكىمى، پارلامەنت مۇشەسى، ونەركاسىپ ۆيتسە- ءمينيسترى لاۋازىمدارىن اتقارىپ كەلگەن» ، - دەپ جازادى اقپاراتتىق پورتال.
اتالعان سايتتىڭ جازۋىنشا، موڭعوليادا 7 - قىركۇيەكتە شاقىرىلعان كەزەكتى سەسسيا وتىرىسىندا پرەمەر- مينيستر ج. ەردەنەبات (ەردىنبات) وتستاۆكاعا كەتىپ، 4 - قازاندا ۋ. حۇرەلسۇح (كۇرەلسۇك) موڭعوليانىڭ پرەمەر- ءمينيسترى بولىپ تاعايىندالعان.
قازاقستان رەسەي مەن قىتايعا تەمىر جول ارقىلى ەكسپورت مەن يمپورت كولەمىن ارتتىردى - «فارس» اقپارات اگەنتتىگى
قازاقستان 2017 -جىلدىڭ قاڭتار جانە قىركۇيەك ايلارى ارالىعىندا تەمىر جول ارقىلى ەكسپورت كولەمىن 12 پايىزعا، يمپورت كولەمىن 19 پايىزعا ارتتىردى، دەپ جازادى parstoday اقپارات اگەنتتىگى.
«2017 -جىلدىڭ قاڭتار جانە قىركۇيەك ايلارى ارالىعىندا قازاقستاننان قىرعىزستانعا جۇك تاسىمالداۋ كولەمى 24 پايىزعا، قىتايعا 19 پايىزعا، رەسەيگە 12 پايىزعا ارتتى. اعىمداعى جىلدىڭ العاشقى 9 ايىندا قازاقستانعا قىتايدان تەمىر جول ارقىلى كەلگەن يمپورت كولەمى 26 پايىزدى، رەسەيدەن 19 پايىزدى، وزبەكستاننان 16 پايىزدى قۇرادى. وسى ۋاقىت ارالىعىندا كاسپي حالىقارالىق ترانزيت تەڭىز جولدارىنىڭ جۇك تاسىمالدارى ارقىلى ەكسپورت كولەمى وتكەن جىلمەن سالىستىرعاندا 62 پايىزعا ۇلعايدى» ، - دەپ حابارلايدى «فارس» اقپارات اگەنتتىگى.
ق ر پارلامەنتى ءماجىلىسىنىڭ دەپۋتاتى ازات پەرۋاشيەۆ «جەنمين جيباوعا» سۇحبات بەردى - «جەنمين جيباو» (People Daily)
قىتايلىق kazakh.people.com سايتى ق ر پارلامەنتى ءماجىلىسىنىڭ دەپۋتاتى، «اق جول» پارتياسىنىڭ ءتوراعاسى ازات پەرۋاشيەۆتىڭ «جەنمين جيباوعا» بەرگەن سۇحباتىن جاريالادى. اتالعان گازەتتىڭ قازاقستاندا تۇراتىن مەنشىكتى ءتىلىشىسى جوۋ حانبودىڭ ق ر دەپۋتاتى ازات پەرۋاشيەۆتان العان سۇحباتى كورشى ەكى ەل اراسىنداعى ساياسي، ەكونوميكالىق بايلانىستار تۋراسىندا وربىگەن. ول سۇحباتىندا شي جينپيننىڭ « ءبىر بەلدەۋ - ءبىر جول» باستاماسى مەن ن. نازاربايەۆتىڭ «نۇرلى جول» ستراتەگيالىق باعدارلاماسى ءبىر- بىرىمەن ۇندەستىك تاۋىپ، قازاقستانداعى ەكونوميكالىق بەلسەندىلىككە جانە ورتالىق ازياداعى بارلىق ايماقتارعا پوزيتيۆتى ىقپال ەتىپ جاتقانىن ايتادى.
«قازاقستان پرەزيدەنتىنىڭ «نۇرلى جول» جاڭا ەكونوميكالىق باعدارلاماسى مەن ق ح ر ءتوراعاسىنىڭ «ءبىر بەلدەۋ - ءبىر جول» باستاماسى قازاقستان مەن ورتالىق ازيا ەكونوميكاسىنىڭ دامۋىنا تىڭ سەرپىن بەرىپ، وسى ەلدەردىڭ ەكونوميكالىق جانە مادەني بايلانىستارى ارتا ءتۇستى. «ءبىر بەلدەۋ، ءبىر جول» ستراتەگياسى اياسىندا قۇرىلعان قازاقستان مەن قىتايدىڭ بىرلەسكەن كاسىپورىندارى كوبەيىپ كەلەدى. «اقجول» پارتياسى «ءبىر بەلدەۋ - ءبىر جول» ستراتەگياسىنىڭ وسىنداي ماڭىزدى قادامدارىن قولداپ وتىرۋعا نيەتتى» ، - دەگەن ازات پەرۋاشيەۆ.
سونداي- اق، سۇحباتتا 18- قازاندا وتەتىن قىتاي كوممۋنيستىك پارتياسىنىڭ 19- سەزى قازاقستان- قىتاي قارىم- قاتىناسىنىڭ ودان ءارى دامۋى ءۇشىن دە ماڭىزدى ءرول اتقاراتىنى اتاپ وتىلگەن. ازات پەرۋاشيەۆتىڭ ايتۋىنشا، الدا اشىلاتىن 19- سەزدىڭ ماڭىزى جوعارى، بۇكىلقىتايلىق قۇرىلتاي جينالىسى قىتاي حالقىنىڭ الداعى 5 جىلداعى ەل ءومىرىنىڭ باسىم باعىتتارىن جوسپارلاۋمەن بىرگە، ونداعى شەشىمدەر قازاقستان مەن باسقادا كورشى ەلدەر ءۇشىن دە وزەكتى بولماق. ا. پەرۋاشيەۆ ق ك پ بۇكىلقىتايلىق سەزىنىڭ قازاقستان مەن قىتاي قارىم- قاتىناسىندا بەلسەندى ءرول اتقارۋىن ءۇمىت ەتىپ، بۇل كەزەكتى قۇرىلتايدىڭ ءساتتى اشىلۋىنا تىلەكتەستىك بىلدىرگەن.
قىرىم تاتارى دجامالا ب ۇ ۇ ەلشى اتاندى - ت ر ت اگەنىتتىگى
قىرىم تاتارى، ءانشى دجامالا ب ۇ ۇ حالىقارالىق كوشى- قون ۇيىمىنىڭ يگى نيەت ەلشىسى اتاندى، دەپ حابارلايدى تۇركيا راديو تەلەديدار اگەنتتىگى.
«ب ۇ ۇ- دان جاسالعان حابارلامادا دجامالانىڭ يگى نيەت ەلشىسى رەتىندە ادام ساۋداسىنا قارسى جۇرگىزىلەتىن كۇرەسكە قاتىساتىنى ءمالىم ەتتى. دجامالا زامانداس قۇلدىققا قارسى ۇيىمداستىرىلاتىن اقپاراتتىق اكسياعا اتسالىسقان، ول وسى ماسەلەگە قاتىستى ويىن ارنايى تۇسىرلگەن ۆيدەوروليكتە ءمالىم ەتتى. وتكەن جىلى شۆەتسيانىڭ باس قالاسى ستوكگولمدە بولعان Eurovision ءان بايقاۋىندا قىرىم تاتارلارىنىڭ تراگەدياسىن «1944» اتتى انىمەن جەتكىزگەن دجامالا ۋكرايناعا ءبىرىنشى ورىندى سىيلاعان ەدى» ، - دەپ جازادى ت ر ت اقپاراتتىق اگەنىتتىگى.
قىتايلىقتار ساحارا مەرۋەتى اتاعان اقساي - قىتايدىڭ «ورتالىق حالىق راديوسى» (CNK)
قىتايدىڭ kazakcnr.com سايىتى قىتايداعى قازاق حالقى قونىستانعان اقساي قازاق اۆتونوميالىق اۋدانىنىڭ بۇگىنگى تىنىس- تىرشىلىگى، ەكونوميكالىق دامۋ ءۇردىسى تۋرالى اۋدان اكىمى قاليبەك سولتان ۇلىمەن بولعان سۇحباتىن جاريالادى.
اتالعان سايتتىڭ جازۋىنشا، قىتايداعى ءۇش قازاق اۆتونوميالىق اۋدانىنىڭ ءبىرى سانالاتىن - اقساي قازاق اۆتونوميالىق اۋدانى 1954 -جىلى قۇرىلعان. اۋداندا قازاقتاردان باسقا قىتاي، ۇيعىر، دۇنگەندەر مەكەندەيدى. اۋدان گانسۋ، شىڭجان جانە شينحاي ولكەلەرىنىڭ توعىسقان جەرىندە ورنالاسقان. جەر بەدەرى كۇردەلى، اينالاسى تاۋ، بيىك ءۇستىرت، قۇمدى ءشول دالا. اۋدان تابيعي رەسۋرستارعا باي. بۇل ولكەگە قازاقتار 1934 - 1939 -جىلدارى التاي، باركول جەرلەرىنەن اۋىپ بارعان. قىتايلىق ب ا ق- قا سۇحبات بەرگەن اۋدان اكىمى قاليبەك سولتان ۇلى اقساي قازاق اۆتونوميالىق اۋداننىڭ بۇگىنگى كۇنگى جەتكەن جەتىستىكتەرى مەن ەل ومىرىندەگى جاڭالىقتار تۋرالى جان- جاقتى توقتالادى.
«مەملەكەت تاراپىنان اۋدانداردى جان- جاقتى سارالاپ باعالاۋدا ءبىزدىڭ اۋدان قوعامدىق ءتارتىبى تىنىش، ۇلتتار ىنتىماعىندا ۇلگىلى اۋدان، جاسىل جەلەكتى، تازا اۋدان اتاعىنا يە بولدى. اۋدان ەكونوميكاسى قارىشتى دامىپ، بۇرىنعى ۇلتىمىزدىڭ تاۋ ساعالاپ، بۇلاق جاعالاعان كوشپەندى ءومىرى تۇبەگەيلى وزگەردى. حالقىمىز ۇلتتىق مادەني قۇندىلىقتارىن ساقتاي وتىرىپ، قالا سالىپ، وتىراقتاسۋعا بەت الدى. اۋىلداعى اتپەن عانا جۇرەتىن جالعىز اياق جولدار، وسى زامانعى اۆتوموبيل جۇرەتىن تاس جولعا اينالدى. تەزەك تۇتاتىپ، وتىن جاعۋدان تابيعي گازدى جاعىپ پايدالانۋعا وتتىك» ، - دەيدى اۋدان اكىمى.
قاليبەك سولتان ۇلى بۇدان باسقا دا اۋداننىڭ وزەكتى جاڭالىقتارىن تىلگە تيەك ەتىپ، ەل ءومىرىنىڭ تىنىس- تىرشىلىگىن بايانداپ بەرگەن. اتالعان سايت سونىمەن بىرگە اقساي اۋدانىنىڭ اسەم دالاسىنىڭ تابيعاتىن، ءساندى قالاسىن تۇسىرگەن سۋرەتتەردى دە ۇسىنادى.
اۆتور: باقىتجول كاكەش
