پرەزيدەنت نەمىس ينۆەستورلارىن جەكەشەلەندىرۋدىڭ ءۇشىنشى كەزەڭىنە قاتىسۋعا شاقىردى
كەلىسسوزدەر بارىسىندا مەملەكەت باسشىسى قازاقستان مەن گەرمانيا اراسىندا ساۋدا- ەكونوميكالىق سەرىكتەستىك ورنىققانىن اتاپ ءوتتى.
«تاۋەلسىزدىك جىلدارىندا گەرمانيا قازاقستانعا 5 ميلليارد دوللارعا جۋىق ينۆەستيتسيا قۇيدى. بۇل رەتتە، ونىڭ 90 پايىزى شيكىزاتتىق ەمەس سەكتورعا سالىنعانىن اتاپ وتكەن ءجون. بيىلعى 8 ايدا ەلدەرىمىز اراسىنداعى تاۋار اينالىمى 1,5 ميلليارد دوللارعا ءوستى. سوڭعى 5 جىل ىشىندە قازاقستاندا 19 ءىرى ينۆەستيتسيالىق جوبا ىسكە اسىرىلدى»، - دەدى قازاقستان پرەزيدەنتى.
نۇرسۇلتان نازاربايەۆ قازاقستاننىڭ ەتنوس ارالىق كەلىسىمدى ساقتاۋ سالاسىندا جۇرگىزىپ وتىرعان ساياساتىنا توقتالىپ، ەلىمىزدە تۇرىپ جاتقان نەمىس دياسپوراسىنا قولداۋ كورسەتۋ جونىندەگى ءوزارا ىنتىماقتاستىققا نازار اۋداردى. قازاقستان پرەزيدەنتى ءبىزدىڭ ەلىمىزدە نەمىس كاپيتالىنىڭ قاتىسۋىمەن ىسكە اسىرىلىپ جاتقان جوبالارعا توقتالدى.
«قازاقستاندا بۇگىندە نەمىس كاپيتالىنىڭ قاتىسۋىمەن ءتۇرلى سالادا، سونىڭ ىشىندە قۇرىلىس، كولىك، اۋىل شارۋاشىلىعى، وڭدەۋ ونەركاسىبى سالالارىندا 900-دەن استام كاسىپورىن تابىستى جۇمىس ىستەۋدە»، - دەدى مەملەكەت باسشىسى.
سونىمەن قاتار، نۇرسۇلتان نازاربايەۆ قازاقستان باستى ءرول اتقاراتىن ەۋرازيالىق كولىك ءدالىزىنىڭ الەۋەتىن اتاپ ءوتتى.
«بۇگىندە قازاقستان ارقىلى حالىقارالىق 5 تەمىر جول جانە 6 اۆتوموبيل جولى وتەدى. وسىلايشا، سىزدەر پايدالانا الاتىن ستراتەگيالىق كولىك دالىزدەرى قالىپتاسىپ وتىر»، - دەدى مەملەكەت باسشىسى.
قازاقستان پرەزيدەنتى ەلىمىزدە قولايلى ينۆەستيتسيالىق جانە ىسكەرلىك احۋالدى قالىپتاستىرۋ ءۇشىن قابىلدانىپ جاتقان نەگىزگى شارالارعا توقتالدى.
«بيزنەسپەن اينالىساتىنداردىڭ قۇقىقتارىن قورعاۋ قامتاماسىز ەتىلىپ، كاسىپكەرلىك سالاسىنداعى زاڭناما جەتىلدىرىلۋدە. بىلتىر ءبىز دۇنيەجۇزىلىك بانكتىڭ رەيتينگىندە 35-ورىنعا يە بولدىق. وسى جىلدىڭ باسىندا قازاقستان ەكونوميكالىق ىنتىماقتاستىق جانە دامۋ ۇيىمىنىڭ ينۆەستيتسيالار جونىندەگى كوميتەتىنىڭ قاۋىمداستىرىلعان مۇشەسى بولىپ، حالىقارالىق ينۆەستيتسيالار دەكلاراتسياسىنا قوسىلدى»، - دەدى نۇرسۇلتان نازاربايەۆ.
مەملەكەت باسشىسى قازاقستان رەسپۋبليكاسىنىڭ پرەزيدەنتى جانىنداعى شەتەلدىك ينۆەستورلار كەڭەسىنىڭ جۇمىسىنا توقتالىپ، ەلىمىزدە بيزنەسمەندەر ءۇشىن جاسالعان جاعدايلاردى، سونىڭ ىشىندە ولاردىڭ ينۆەستيتسيالىق جوبالار بويىنشا كورپوراتيۆتىك سالىقتان بوساتىلاتىنىن جانە ءبىرقاتار ەلدەرمەن ۆيزاسىز رەجىم ورناتىلعانىن اتاپ ءوتتى. قازاقستان پرەزيدەنتى گەرمانيا ينۆەستورلارىن ەلىمىزدەگى جەكەشەلەندىرۋ ۇدەرىسىنىڭ ءۇشىنشى كەزەڭىنە اتسالىسۋعا، سونداي- اق «استانا» حالىقارالىق قارجى ورتالىعىمەن ىنتىماقتاستىقتى بەلسەندى دامىتۋعا شاقىردى. «كاسىپكەرلەر بيزنەسىن دامىتىپ، ءوزارا ءتيىمدى سەرىكتەستىكتى ىلگەرىلەتۋ ءۇشىن بارلىق مۇمكىندىكتى پايدالانۋى قاجەت. ءبىزدىڭ بۇگىنگى كەزدەسۋىمىز ارىپتەستىگىمىزدى نىعايتا تۇسەتىنىنە سەنىمدىمىن»، - دەدى مەملەكەت باسشىسى.
